Read Central Bicolano Esther 6 Bible Online

Esther 6 - Central Bicolano bible

Esther 6

¹Kan bangging idto dai nangangatorog an hade, kaya ipinakua niya an opisyal na talaan kan imperyo dangan ipinabasa idto mantang nagdadangog siya.

²Nabasa ninda an kabtang saen nasusurat an manongod kan pakaaram ni Mardokeo kan plano ni Bigtana saka ni Teres, an duwang eunuko kan hade na nagbantay kan mga kwarto kan hade, na gadanon si Hadeng Jerjes.

³Naghapot an hade, “Anong pag-omaw saka balos an itinao ki Mardokeo huli kan ginibo niyang ini?” “Mayo lamang nin ginibo para saiya,” an simbag kan mga sorogoon kan hade.

⁴“Siisay sa sakong mga opisyal an yaon sa patyo?” an hapot kan hade. Minalaog pa sana kaidto si Haman sa patyo; nagduman siya tanganing hagadon sa hade na bitayon si Mardokeo sa bitayan na pinatindog niya para ki Mardokeo.

⁵Kaya nagsimbag an mga sorogoon, “Yaon duman si Haman.” ‘Palaogon nindo siya,” an sabi kan hade.

⁶Kaya naglaog si Haman, dangan naghapot an hade saiya, “Ano an dapat gibohon sa sarong tawo na nawiwilihan kong omawon?” Nagsaboot si Haman, “Siisay pa an boot omawon kan hade kundi ako?”

⁷Kaya nagsimbag siya sa hade, “Para sa tawong nawiwilihan mong omawon,

⁸ipakua mo an gubing na saimo mismong isinulot, saka an kabayo na saimong linunadan na may samno sa payo.

⁹Dangan pagbotan mo an saro kan saimong ginagalangan na prinsipe tanganing isulot an gubing sa tawong boot mong omawon. Pakatapos ililibot niya an oomawon, na nakalunad duman sa kabayo, sa plasa kan syudad, mantang nagpapahayag siya nin siring: ‘Hilinga nindo kun paano binabalosan kan hade an tawong nawiwilihan niyang omawon!’”

¹⁰Dangan sinabihan kan hade si Haman, “Magmadali ka, kuahon mo an gubing saka an kabayo asin giboha an mga pag-omaw na sinabi mo para sa Judiong si Mardokeo, na nagtutukaw sa may trangkahan kan palasyo. Hare paglingawe an ano man kan sinabi mo.”

¹¹Kaya kinua ni Haman an gubing saka an kabayo. Sinanglean niya si Mardokeo, pinalunad sa kabayo, dangan ilinibot sa plasa kan syudad mantang nagpapahayag nin siring: “Hilinga nindo kun paano binabalosan kan hade an tawong nawiwilihan niyang omawon!”

¹²Pakatapos, nagbalik si Mardokeo sa trangkahan kan palasyo. Alagad hidaling nagpuli si Haman na igwa nin tahob an payo huli sa kasosopgan.

¹³Inosip niya sa saiyang agom na si Zeres asin sa gabos niyang katood an gabos na nangyari saiya. Dangan nagsabi an madonong niyang mga katood saka an agom niyang si Zeres, “Nagpoon nang makua ni Mardokeo an saimong kapangyarihan. Saro siyang Judio, asin dai mo siya madadaog. Dadaogon ka nanggad niya.”

¹⁴Nag-oorolay pa sinda kan nag-abot an mga eunuko kan hade asin hidaling ipinag-iba si Haman sa bangkete ni Esther.