Read Central Bicolano Esther 7 Bible Online

Esther 7 - Central Bicolano bible

Esther 7

¹Kaya nagkakan sa kaibahan ni Esther an hade saka si Haman

²sa ikaduwang beses. Mantang nag-iinom sinda nin arak, naghapot giraray an hade, “Reyna Esther, ano an nasa boot mo? Sabihan sako asin mapapasaimo iyan. Maski an kabanga kan sakong imperyo itatao ko saimo.”

³Nagsimbag si Reyna Esther, “Kun mawilihan kan Mahal na Hade na itao an sakong kahagadan, an sakong mawot iyo na ako mabuhay siring man an sakong mga kahimanwa.

⁴Ako asin an sakong mga kahimanwa ipinabakal tanganing gadanon. Kun kami ipinabakal sana nganing magin oripon, dai na ako naggirong, huli ta an samong kasakitan dai pwedeng ipantay sa kapurisawan kan hade; alagad madali na kaming gadanon—puhoon!”

⁵Hinapot ni Hadeng Jerjes si Reyna Esther, “Siisay an tawong nangahas na gumibo nin siring? Haen siya?”

⁶Nagsimbag si Esther, “An samong kaiwal asin kalaban iyo ining maraot na si Haman!” Dangan natakot si Haman sa atubangan kan hade asin reyna.

⁷Anggot nin marahay na nagtindog an hade, nagluwas sa kwarto, dangan nagduman sa tatamnan kan palasyo. Nahiling ni Haman na desidido an hade na padusahan siya, kaya nagpawalat siya tanganing makimaherak ki Reyna Esther.

⁸Minadapa pa sana si Haman sa tukawan ni Esther kan magbalik an hade hale sa tatamnan. Pakahiling kaini, nagkurahaw an hade, “Lulupigan pa kan lalaking ini an reyna digdi mismo sa atubangan ko, sa sadiri kong palasyo?” Pakataram kaini kan hade, tinahoban tolos kan mga eunuko an payo ni Haman.

⁹Saro sainda na an ngaran Harbona an nagsabi, “Bako sana iyan an ginibo ni Haman. Nagpatindog pa siya nin bitayan harani sa saiyang harong na beynte y dos metros an langkaw. Ipinagibo niya idto para ki Mardokeo, na nagligtas kan saimong buhay, Mahal na Hade!” Nagboot an hade, “Bitayon nindo duman si Haman!”

¹⁰Kaya binitay ninda si Haman sa bitayan na inandam niya para ki Mardokeo. Dangan napara an kaanggotan kan hade.