Read Central Bicolano Esther 8 Bible Online

Esther 8 - Central Bicolano bible

Esther 8

¹Kan aldaw man sanang idto, itinao ni Hadeng Jerjes ki Reyna Esther an gabos na pagsadiri ni Haman, an kaiwal kan mga Judio. Sinabihan ni Esther an hade na kadugo niya si Mardokeo, kaya magpoon kaidto pwede na ining mag-atubang sa hade.

²Hinale kan hade sa saiyang muro an singsing na igwa kan saiyang selyo (na binawi niya ki Haman) asin itinao idto ki Mardokeo. Ibinugtak ni Esther si Mardokeo na parapamahala kan pagsadiri ni Haman.

³Nakiolay giraray si Esther sa hade; naghihibi siyang nagdapa sa pamitisan kaini. Nakimaherak siya sa hade na ontokon an maraot na planong ginibo kan Agageong si Haman laban sa mga Judio.

⁴Iginawgaw kan hade an saiyang bulawan na setro ki Esther, kaya nagtindog ini saka nagsabi,

⁵“Kun mawilihan kan hade, saka kun may pagmakulog ka sako asin kun pagmarahayon mo, ipasurat mo an sarong pagboot tanganing mahalean nin halaga an pagboot ni Haman na aking lalaki ni Hammedata, na Agageo—an pagboot na itinao niya para sa pagpuho kan gabos na Judio sa imperyo.

⁶Huli ta paano ko matatagalan an paghiling sa kasakitan na maabot sa sakong banwaan? Paano ko matatagalan an paghiling kan pagkatunaw kan sadiri kong mga kadugo?”

⁷Dangan nagsabi si Hadeng Jerjes ki Reyna Esther saka ki Mardokeo, na Judio, “Itinao ko na ki Esther an pagsadiri ni Haman asin ipinabitay ko na si Haman huli kan saiyang plano laban sa mga Judio.

⁸Alagad an sarong pagboot na pinaluwas sa ngaran kan hade asin sinelyohan kan singsing kan hade dai na pwedeng bawion. Alagad pwede kamong magsurat sa mga Judio kan boot nindong mangyari. Isurat nindo iyan sa ngaran ko asin selyohan nindo kan sakong singsing.”

⁹Kan ikabeynte y tres na aldaw kan ikatolong bulan, an bulan nin Sivan, ipinaapod an mga sekretaryo kan hade. Sinurat ninda an gabos na pagboot ni Mardokeo para sa mga Judio, sa mga gobernador, mga administrador, asin para sa mga opisyal kan syento beynte y syeteng probinsya na minapoon sa India sagkod sa Etiopia. An pagboot na ini sinurat sosog sa paagi nin pagsurat kan lambang probinsya asin sosog sa lengwahe kan lambang tawo. An surat sa mga Judio sosog man sa sadiri nindang paagi nin pagsurat saka lengwahe.

¹⁰Isinurat ini sa ngaran kan hade saka sinelyohan kan saiyang singsing. An mga surat dinara kan mga sugo, na nakalunad sa maririkas na kabayong hale sa kwadra kan hade.

¹¹An mga surat na ini nagpahayag na an hade minatugot sa mga Judio sa lambang syudad na magtiripon asin depensahan an saindang buhay, na gadanon saka puhoon an mga armadong lalaki sa arin man na banwa o probinsya na masalakay sainda asin sa saindang mga agom saka mga aki, asin samsamon an pagsadiri kan mga kaiwal.

¹²Gigibohon ninda ini sa bilog na imperyo sa laog nin sarong aldaw, sa ikatreseng aldaw kan ikadoseng bulan, an bulan nin Adar.

¹³An kopya kan isinurat na pagboot ipapaluwas bilang sarong dekreto sa lambang probinsya, asin ipapahayag sa gabos na tawo tanganing makaaram sinda, saka tanganing makaandam an mga Judio laban sa saindang mga kaiwal.

¹⁴Sa pagboot kan hade, nagluwas tolos an mga sugo, na nakalunad sa maririkas na kabayo kan hade. An dekreto ipinahayag man sa Susa, an pangenot na syudad.

¹⁵Nagluwas sa palasyo si Mardokeo na nakasulot nin gubing na panghade, na kolor asul saka puti; igwa siya nin dakulang bulawan na korona sa payo asin alikboy na pinong lino na kolor purpura. Dangan nadangog an kurahaw nin kaogmahan sa syudad nin Susa.

¹⁶Huli ta igwa nin kagayagayahan, kaginhawahan, asin kapangganahan para sa mga Judio.

¹⁷Kan basahon an pagboot kan hade sa lambang syudad saka probinsya, maogmang nagpyesta an mga Judio, nagbangkete saka nag-ogma. Dakul na tawo an nagpahayag na sinda mga Judio, huli ta natakot sinda sa mga Judio.