Read Central Bicolano Esther 9 Bible Online

Esther 9 - Central Bicolano bible

Esther 9

¹Nag-abot an ikatreseng aldaw kan bulan nin Adar, an aldaw na itinalaan sa paggibo kan pagboot kan hade, an aldaw na hinahalat kan mga kaiwal kan mga Judio tanganing sakopon ninda an mga ini. Alagad nadaog sinda kan mga Judio.

²Nagtiripon an mga Judio sa lambang syudad na pinag-eerokan ninda tanganing labanan an siisay man na boot magkulog sainda. Mayo nin nagtindog laban sainda huli ta natakot sainda an gabos na tawo.

³An totoo, an gabos na opisyal sa probinsya—an mga gobernador, mga administrador, asin mga representante kan hade—nagtarabang sa mga Judio huli ta gabos sinda takot ki Mardokeo.

⁴Aram na kan bilog na imperyo na si Mardokeo saro nang mapangyaring tawo sa palasyo asin nag-oorog an saiyang kapangyarihan.

⁵Kaya sinalakay asin ginadan kan mga Judio an gabos nindang kaiwal asin ginibo ninda an boot nindang gibohon sa gabos na naoongis sainda.

⁶Duman sa Susa, sa mismong pangenot na syudad, limang gatos na lalaki an ginadan kan mga Judio.

⁷Kaiba sa mga nagadan iyo si Parsandata, Dalfon, Aspata, Porata, Adalia, Aridata, Parmasta, Arisai, Aridai, saka Vaizata, an sampolong aking lalaki ni Haman, an kaiwal kan mga Judio. Alagad dai ninda sinamsam an mga pagsadiri kan mga kaiwal.

¹¹Kan aldaw man sanang idto ibinareta sa hade an bilang kan nagadan sa Susa.

¹²Nagsabi an hade ki Reyna Esther, “Digdi sana sa Susa limang gatos na lalaki an nagadan kan mga Judio, kaibahan an sampolong aking lalaki ni Haman. Orog pa gayod an ginibo ninda sa mga probinsya! Ano pa an boot mong hagadon? Sabihan sako asin makakamtan mo iyan.”

¹³Nagsimbag si Esther, “Kun pagmarahayon kan hade, itugot pa logod sa aga sa mga Judio sa Susa, an ginibo ninda ngunyan na aldaw. Dangan ipabitay mo an mga bangkay kan sampolong aking lalaki ni Haman.”

¹⁴Kaya nagboot an hade na gibohon an siring; sarong dekreto an pinaluwas sa Susa, asin binitay an bangkay kan sampolong aking lalaki ni Haman.

¹⁵Kan ikakatorseng aldaw kan bulan nin Adar, nagtiripon giraray an mga Judio sa Susa asin nakagadan pa sinda nin tolong gatos na lalaki. Alagad dai ninda sinamsam an mga pagsadiri kan mga kaiwal.

¹⁶An mga Judio sa mga probinsya nagtiripon man tanganing depensahan an saindang buhay. Naubos ninda an mga kaiwal kan magadan ninda an setenta y singko mil na naoongis sainda. Alagad dai ninda sinamsam an pagsadiri kan mga kaiwal.

¹⁷Nangyari ini kan ikatreseng aldaw kan bulan nin Adar. Nagpahingalo sinda kan ikakatorseng aldaw asin maogmang nagpyesta sa aldaw na ini.

¹⁸Alagad nagpyesta an mga Judio sa Susa kan ikakinseng aldaw huli ta ginaradan ninda an mga kaiwal kan ikatrese saka ikakatorse dangan nag-ontok sinda kan ikakinseng aldaw.

¹⁹Ini an dahelan kun tadaw ta pinagseselebrar kan mga Judio na nag-eerok sa saradit na mga banwa an ikakatorseng aldaw kan bulan nin Adar bilang sarong aldaw nin kaogmahan asin karakanan, aldaw nin pagtao nin regalo sa lambang saro.

²⁰Ipinabugtak ni Mardokeo sa talaan an mga pangyayaring ini dangan sinuratan niya an gabos na Judiong nasa harani man o nasa harayo, sa bilog na imperyo nin Persia.

²¹Pinagbotan niya sinda na selebraron taon-taon an ikakatorse asin ikakinseng aldaw kan bulan nin Adar bilang pyesta.

²²Ini an mga aldaw na nagkaigwa nin kapahingaloan an mga Judio sa saindang mga kaiwal; ini an bulan na naribayan nin kaogmahan an saindang kasakitan saka nin pagselebrar an saindang pagmondo. Sinuratan sinda ni Mardokeo na selebraron an mga aldaw na ini sa paagi nin pagkarakan, pag-orogma, dangan pagtao nin mga kakanon sa lambang saro asin sa mga dukha.

²³Kaya nagkuyog an mga Judio sa pagboot ni Mardokeo asin an pagselebrar nagin kaugalean na ginigibo ninda taon-taon.

²⁴Huli ta an kaiwal kan mga Judio na si Haman na aking lalaki ni Hammedata, an Agageo,—nagripa (inapod ining “purim”) tanganing aramon an aldaw para sa paggadan kan mga Judio.

²⁵Alagad nagduman si Esther sa hade asin nagpaluwas an hade nin nasusurat na mga pagboot na gibohon ki Haman an maraot na plano kaini laban sa mga Judio. Binitay siya saka an saiyang mga aking lalaki.

²⁶Kaya an pyestang ini inapod na Purim, sarong tataramon na an kahulogan “ripa.” Huli kan surat ni Mardokeo asin huli kan gabos na nangyari sainda,

²⁷ginibo ining pagsusundon kan mga Judio para sa saindang sadiri, sa mga kapagarakian ninda, asin sa siisay man na boot magin Judio, na sa talaan na panahon, taon-taon, seselebraron ninda an duwang aldaw na ini sosog sa pagboot ni Mardokeo.

²⁸Napagkaoroyonan kan mga Judio na an duwang aldaw na ini dapat na giromdomon asin selebraron kan lambang pamilya sa lambang henerasyon, sa lambang probinsya patin sa lambang syudad. An pagselebrar kan Pyesta nin Purim dai oontokon kan mga Judio, ni lilingawan kan saindang mga kapagarakian an paggiromdom kaini.

²⁹Kaiba ni Mardokeo, nagsurat man si Reyna Esther na aki ni Abihail. Itinao niya an bilog niyang kapangyarihan sa saiyang surat manongod sa Purim, na isinurat na kaidto ni Mardokeo.

³⁰An surat ipinanongod sa gabos na Judio, asin an mga kopya ipinadara sa syento beynte y syeteng mga probinsya kan Imperyo nin Persia. An surat nagmawot nin katoninongan asin katiwasayan para sa mga Judio,

³¹saka nagboot sainda asin sa saindang mga kapagarakian na selebraron an aldaw nin Purim sa talaan na panahon, siring na nag-ako sinda nin mga pagsusundon para sa pag-ayuno saka para sa mga panahon nin pagmomondo. Ipinagboot ini ni Mardokeo saka ni Reyna Esther.

³²An pagboot ni Esther na nagpapatotoo kan mga pagsusundon para sa Purim, isinurat sa sarong libro.