Read Central Bicolano Exodus 1 Bible Online

Exodus 1 - Central Bicolano bible

Exodus 1

¹Iyo ini an mga aki ni Jacob na nag-iriba saiya pasiring sa Egipto, kaiba an saindang mga pamilya:

²si Ruben, Simeon, Levi, Juda,

³Issakar, Zabulon, Benjamin,

⁴Dan, Neftali, Gad, asin Aser.

⁵Setenta gabos an kapagarakian ni Jacob. Si Jose na saro pa niyang aki, haloy na sa Egipto.

⁶Dangan nagadan si Jose, an saiyang mga tugang asin an gabos na henerasyon na idto.

⁷Alagad an saindang kapagarakian, an mga Israelita, nagkaigwa nin dakul na mga aki kaya kuminosog sinda asin napano ninda an Egipto.

⁸Dangan nagkaigwa an Egipto nin bagong hade na dai midbid si Jose.

⁹Nagsabi an hade sa saiyang banwaan, “Dakul nang marahay an mga Israelita asin mas makosog na ki sa sato.

¹⁰Kaipuhan magin tuso kita tanganing mapugol an saindang pagdakul, ta kun magkagera, tibaad umapil sinda sa satong mga kaiwal, labanan kita dangan bayaan an satong daga.”

¹¹Kaya nagbugtak sinda nin mga makuring parapamahala tanganing pasakitan an mga Israelita sa paagi nin mga magabat na trabaho. Ipinatugdok sa sainda kan hade an Pitom asin Rameses, mga syudad na sarayan kan mga pagkakan asin kagamitan.

¹²Alagad kun kasuarin pinasakitan an mga Israelita, lalo logod sindang nagdakul asin orog na nakalakop sa daga nin Egipto. Natakot an mga Egipcio sa mga Israelita

¹³kaya ginibo nindang makaherak an buhay kan mga ini sa paagi nin magagabat na trabaho. Mayong pagkaherak na pinirit nindang magtrabaho an mga Israelita sa saindang mga proyektong pagtugdok nin mga edipisyo asin sa gabos na trabaho sa saindang oma.

¹⁵Dangan sinabihan kan hade si Sifra asin si Pua, mga parterang nagpapaaki sa mga babaeng Hebreyo.

¹⁶“Kun kamo magpaaki sa mga babaeng Hebreyo, gadanon nindo an aki kun lalaki alagad pabayaan nindong mabuhay kun babae.”

¹⁷Alagad dai sinunod kan mga partera an pagboot kan hade huli ta may pagkatakot sinda sa Dios; pinabayaan nindang mabuhay an mga aking lalaki.

¹⁸Kaya ipinaapod sinda kan hade dangan hinapot, “Tano ta dai kamo nagsunod? Tadaw ta pinabayaan nindong mabuhay an mga aking lalaki?”

¹⁹Nagsimbag sinda, “Iba kaya an mga babaeng Hebreyo sa mga babaeng taga Egipto; bako sindang masakit mangaki, kaya bago umabot an saro samo, nakapangaki na sinda.”

²⁰Huli kaini, benendisyonan nin Dios an mga partera asin tinawan niya sinda nin dakul na mga aki. Padagos man na nagdakul asin nagkosog an mga Israelita.

²²Kaya nagboot an hade sa mga Egipcio, “Itapok nindo sa Salog nin Nilo an lambang bagong mamundag na lalaki sa mga Hebreyo, alagad pabayaan nindong mabuhay an gabos na aking babae.”