Read Central Bicolano Exodus 10 Bible Online

Exodus 10 - Central Bicolano bible

Exodus 10

¹Dangan nagtaram an Kagurangnan ki Moises, “Magduman ka sa hade. Pinatagas ko an saiyang puso asin an puso kan saiyang mga opisyal tanganing ikapahiling ko sainda ining mga ngangalasan,

²siring man tanganing ikaosip nindo sa saindong mga aki asin mga makoapo kun paano ginibong ngingisihan an mga Egipcio kan ipahiling ko sainda an mga ngangalasan. Kamo gabos makakamidbid na ako an Kagurangnan.”

³Kaya nagduman si Moises saka si Aaron sa hade asin sinabihan, “An Kagurangnan, an Dios kan mga Hebreyo, nagtaram, ‘Sagkod nuarin ka magmamatagas sa atubangan ko? Tugoteng humale an sakong banwaan tanganing makapagsamba sinda sako.

⁴Kun padagos kang magsayuma, an saimong banwaan dadarahan ko nin mga doron sa aga.

⁵Huli sa kadakulan, matatahoban ninda an daga. Kakakanon ninda an gabos na dai naraot kan yelo, sagkod an nagkataradang mga kahoy.

⁶Mapapano nin mga doron an saimong palasyo, an mga harong kan saimong mga opisyal sagkod kan saimong mga nasasakopan. Mas grabe ini ki sa mga naenot na nahiling kan saimong mga ginikanan.’” Pakasabi kaini, naghale si Moises.

⁷Sinabihan an hade kan saiyang mga opisyal, “Sagkod nuarin kita riribokon kan tawong ini? Tugote nang humale an mga lalaking Israelita tanganing makapagsamba sinda sa Kagurangnan na saindang Dios. Dai mo pa nahihiling na raot na an Egipto?”

⁸Kaya pinabalik giraray sa hade si Moises saka si Aaron. Sinabihan sinda kan hade, “Pwede na kamong maghale asin magsamba sa Kagurangnan na saindong Dios. Alagad siisay nanggad an mahale?”

⁹Nagsimbag si Moises, “Gabos kami mahale—magpoon sa gurang sagkod sa aki, lalaki man o babae. Kaipuhan na darahon mi man an samong mga karnero, mga kanding saka mga baka, huli ta mapyesta kami para sa Kagurangnan.”

¹⁰Nagsabi an hade, “Minasumpa ako sa ngaran nin Kagurangnan na dai ko nanggad tutugotan na umiba an mga babae asin mga aki! Maliwanag na nag-iisip kamong magrebelde laban sako.

¹¹Dai pwede! An mga lalaki sana an makakahale tanganing magsamba sa Kagurangnan kun iyan an gusto nindo.” Pakasabi kaini, isinubol sinda paluwas.

¹²Dangan nagtaram an Kagurangnan ki Moises, “Unata paitaas an saimong kamot tanganing dumagsa an mga doron sa daga nin Egipto, asin uboson an gabos na tinanom na natada kan uran nin yelo.

¹³Kaya itinaas ni Moises an saiyang sugkod, dangan pinahoyop nin Kagurangnan an doros hale sa sirangan sa bilog na aldaw asin banggi. Pagkaaga, nadara na kan doros an mga doron.

¹⁴Duminagsa an mga doron sa bilog na daga nin Egipto. Iyo ini an pinakamahibog na doron na dai pa nahiling kaidto o mahihiling ngapit.

¹⁵Nangitom an daga huli sa doron. Inubos kaini an gabos na tinanom asin an gabos na prutas kan mga kahoy na natada kan uran nin yelo. Mayong nawalat maski sarong dahon sa arin man na kahoy o tinanom sa bilog na daga nin Egipto.

¹⁶Ipinaapod tolos kan hade si Moises saka si Aaron asin sinabihan, “Nagkasala ako sa Kagurangnan na saindong Dios siring man sa saindo.

¹⁷Patawada ako ngunyan na sana sa pagkakasala kong ini asin ipamibi mo ako sa Kagurangnan na saindong Dios na haleon sako an magabat na padusang ini.”

¹⁸Binayaan ni Moises an hade dangan namibi sa Kagurangnan.

¹⁹Pinahoyop nin Kagurangnan an makosog na doros hale sa solnopan asin ipinalid kaini an mga doron pasiring sa Dagat na Pula. Mayong natada maski sarong doron sa bilog na daga nin Egipto.

²⁰Alagad pinatagas nin Kagurangnan an puso kan hade kaya dai niya tinugotan na humale an mga Israelita.

²¹Nagtaram an Kagurangnan ki Moises, “Unata paitaas an saimong kamot tanganing magkaigwa nin mahibog na kadikloman na matahob kan daga nin Egipto, sarong kadikloman na mamamatean kan gabos.”

²²Kaya itinaas ni Moises an saiyang kamot, asin nagdiklom an Egipto sa laog nin tolong aldaw;

²³dai nagkahirilingan an mga Egipcio asin dai nin siisay man na nakahale sa saiyang namumugtakan. Alagad maliwanag sa lugar kan mga Israelita.

²⁴Inapod kan hade si Moises asin sinabihan, “Lakaw na kamo sa pagsamba sa Kagurangnan; ipag-iba nindo maski an mga babae sagkod mga aki. Alagad mawawalat digdi an saindong mga karnero, mga kanding, asin mga baka.”

²⁵Nagsimbag si Moises, “Dangan ika na an matao samo nin mga hayop na iaatang sa Kagurangnan na samong Dios.

²⁶Dai pwede iyan! Dadarahon mi an samong mga hayop; mayong mawawalat maski saro. Kami sana an kaipuhan magpili kan mga hayop na iaatang sa Kagurangnan na samong Dios. Sagkod na dai kami nakaabot duman, dai mi maaaraman kun arin na mga hayop an iaatang saiya.”

²⁷Alagad pinatagas na naman nin Kagurangnan an puso kan hade kaya dai ini nagtugot na humale sinda.

²⁸“Humale ka sa atubangan ko,” an sabi niya ki Moises. “Dai ka na magpahiling sako! Sa oras na mahiling taka, magagadan ka!”

²⁹“Kukuyogon ko an sinabi mo!” an simbag ni Moises. “Dai na nanggad ako mapahiling saimo!”