Read Central Bicolano Exodus 15 Bible Online

Exodus 15 - Central Bicolano bible

Exodus 15

¹Dangan si Moises asin an mga Israelita nagkanta kaining awit sa Kagurangnan: “An Kagurangnan sakong aawitan huli ta dakulang panggana saiyang nakamtan; mga kabayo asin mga lunad man itinapok niya sa kadagatan.

²An Kagurangnan an sakong kosog asin awit, siya an sakong kaligtasan; siya an sakong Dios, kaya sakong oomawon; Dios nin sakong ama, kaya sakong papalangkawon.

³An Kagurangnan sarong paralaban; Kagurangnan an saiyang ngaran.

⁴“Mga karwahe asin hukbo nin Egipto sa dagat saiyang itinapok; mga piling opisyal gabos, sa Dagat na Pula nagkaralamos.

⁵Tinahoban sinda kan dagat na hararom; siring sa gapo, tolos sindang nag-irarom.

⁶“An too mong kamot, O Kagurangnan, makangingirhat sa kosog; an mga kaiwal rinoronot kan too mong kamot.

⁷Mga kaiwal dinaog kan saimong dakulang kapangyarihan; garo dagaming sinulo kan saimong kaanggotan.

⁸Hinoyopan mo an dagat asin an tubig uminitaas, tuminindog na garo lanob; asin an kairaroman tuminagas.

⁹Nagsabi an kaiwal, ‘Lalamagon ko sinda asin dadakopon; saindang kayamanan sakong babangaon; gabos na magustohan sakong kukuahon asin sa bagsik kan espada gabos sasamsamon.’

¹⁰Alagad sa saro mong hinangos, O Kagurangnan, an mga Egipcio nalamos, siring sa timga na nag-irarom tolos.

¹¹“Kagurangnan, siisay sa mga dios an arog saimo? An arog saimo na makangangalas an kabanalan? Mga milagro asin gibo mong ngangalasan, siisay an makakaarog kaiyan?

¹²Saimong inunat an too mong kamot, asin an mga kaiwal hinalon kan daga.

¹³Maimbod sa panuga, nangenot ka sa mga tawong saimong ilinigtas; sinda inantabayan mo kan saimong kosog pasiring sa saimong banal na daga.

¹⁴Nakadangog an mga banwaan asin tinarakigan; mga Filisteo makuring takot an namatean.

¹⁵Mga lider nin Edom napano nin katakotan; makokosog na lalaki sa Moab pinagtarakigan; nawaraan nin isog gabos na taga Canaan.

¹⁶Pakahiling kan saimong kosog, O Kagurangnan, takot asin takig sinda inabotan, siring sa gapo dai sinda nakahiro sagkod na makaagi an saimong banwaan, mga tawong ilinigtas mo sa kaoripnan.

¹⁷Dinara mo sinda asin itinanom sa sadiri mong bukid, an lugar, O Kagurangnan, na pinili mo bilang saimong erokan, an Templo na saimong hinaman.

¹⁸Ika, O Kagurangnan, an maghahade sagkod nuarin pa man.”

¹⁹An mga Israelita nagbalyo sa dagat na an linakawan iyo an mamarang daga. Alagad kan lamagon sinda sagkod sa dagat kan mga nakakabayo asin mga nakakarwaheng Egipcio, ibinalik nin Kagurangnan sa dating rarom an tubig asin natahoban sinda.

²⁰Si Miriam, an propetang tugang ni Aaron, nagkua kan saiyang tamborin, dangan nagsurunod saiya an gabos na kababaehan na nagtutugtog kan saindang mga tamborin asin nagsasayaw.

²¹Kinantahan sinda ni Miriam: “Mag-awit kamo sa Kagurangnan huli ta saiyang nakamtan mamurawayon na kapangganahan. Mga kabayo asin mga lunad man, itinapok niya sa kadagatan.”

²²Sa pangengenot ni Moises, naghale an mga tawo sa Dagat na Pula asin nagpasiring sa kalangtadan nin Sur. Tolong aldaw na sindang nagralakaw, alagad mayo sindang nakuang tubig.

²³Dangan nakaabot sinda sa Mara, alagad dai ninda nainom an tubig duman huli ta mapait, kaya Mara an ngaran kan lugar.

²⁴Nagreklamo ki Moises an mga Israelita, “Ano an samong iinomon?”

²⁵Kaya namibi sa Kagurangnan si Moises, asin ipinahiling saiya nin Kagurangnan an sarong kaputol na kahoy. Kinua ini ni Moises dangan itinapok sa tubig asin nahale an pait kan tubig. Sa lugar na idto itinao sainda nin Kagurangnan an mga pagboot na saindang pagkukuyogon asin duman sinda pinagbalo.

²⁶Nagtaram siya, “Kun bilog na puso nindo akong susunodon huli kan paggibo nin matanos asin huli sa pag-otob kan sakong mga togon saka mga pagboot, dai ko kamo papadusahan kan arin man sa mga kahelangan na ipinadara ko sa mga Egipcio. Ako, an Kagurangnan an saindong parabolong.”

²⁷Dangan nakaabot sinda sa Elim, saen igwa nin doseng burabod asin setentang poon nin palma. Duman sinda nagkampo sa kataed kan mga tubig.