Read Central Bicolano Exodus 18 Bible Online

Exodus 18 - Central Bicolano bible

Exodus 18

¹Nabaretaan ni Jetro, na panugangan ni Moises asin padi sa Midian, an mga ginibo nin Dios para ki Moises asin sa mga Israelita kan iluwas niya sinda sa Egipto.

²Si Jetro an nag-ataman ki Zippora kan ini papulion ni Moises sa Midian,

³kaiba an duwa nindang aki. An ngaran kan saro Gersom (huli ta nagsabi si Moises, “Dayuhan ako sa ibang daga”),

⁴asin an ngaran kan saro Eliezer (huli ta nagsabi siya, “Tinabangan ako kan Dios nin sakong ama, asin ilinigtas niya ako sa kagadanan sa kamot kan hade nin Egipto”).

⁵Ipinag-iba ni Jetro paduman ki Moises an agom asin an duwang aki kaini sa bukid nin Dios na pinagkampohan niya sa kalangtadan.

⁶Nagpatogon si Jetro ki Moises na sinda maabot,

⁷kaya sinabat siya kaini. Nagduko si Moises kan saiyang payo sa pagtaong galang sa saiyang panugangan dangan hinadokan niya ini. Nagkomustahan sinda dangan naglaog sa tolda ni Moises.

⁸Ibinareta ni Moises ki Jetro an gabos na ginibo nin Kagurangnan sa hade asin sa mga Egipcio tanganing iligtas an mga Israelita. Inistorya man niya an kapagalan na namatean ninda sa paglakaw asin kun paano sinda tinabangan nin Kagurangnan.

⁹Naogma si Jetro kan madangog an gabos na karahayan na ginibo nin Kagurangnan sa Israel,

¹⁰asin siya nagsabi, “Omawon an Kagurangnan na nagligtas saindo sa kamot kan hade asin kan mga Egipcio.

¹¹Ngunyan aram ko na nanggad na siya orog ki sa ibang mga dios, huli ta ilinigtas niya an mga Israelita sa pang-aapi sainda kan mga Egipcio.”

¹²Dangan nagdolot si Jetro nin tinutong na atang asin nin iba pang mga dolot sa Dios. Nag-abot si Aaron kaiba an gabos na lider nin Israel tanganing sa kaibahan kan panugangan ni Moises magkarakan sinda sa atubang nin Dios.

¹³Kan sunod na aldaw, nagtukaw si Moises sa paghusay sa mga kaso kan mga tawo, asin napalibotan siya ninda magpoon aga sagkod banggi.

¹⁴Kan mahiling ni Jetro an gabos na ginigibo ni Moises para sa mga tawo, naghapot siya, “Ano ining ginigibo mo? Tadaw ta sinosolo mo an trabaho? Magpoon aga sagkod banggi, napapalibotan ka nin mga tawo sa pagkonsulta saimo.”

¹⁵Nagsimbag si Moises, “Kaipuhan na gibohon ko ini huli ta boot maaraman kan mga tawo an kabotan nin Dios.

¹⁶Kun may duwang tawo na igwang dai pinagkakaoyonan, minadolok sinda sako asin hinuhukoman ko kun siisay sa sainda an tama. Ipinapaliwanag ko sainda an mga pagboot asin mga togon nin Dios.”

¹⁷Dangan nagsabi si Jetro, “Sala an ginigibo mo.

¹⁸Mapagal iyan para sa saimo asin sa mga tawo. Magabat an trabahong iyan asin dai mo kayang gibohon na solo sana.

¹⁹Dangoga ining hatol ko asin ibahan ka logod nin Dios. Maninigo na ika an mag-atubang sa Dios asin magdara saiya kan mga problema kan mga tawo.

²⁰Itukdo mo sa sainda an mga togon saka an mga pagboot nin Dios asin kun paano sinda dapat na mamuhay dangan kun ano an dapat nindang gibohon.

²¹Laen pa kaiyan, magpili ka nin mga tawong maninigo, may pagkatakot sa Dios, mapapaniwalaan asin dai masusuholan. Gibohon mo sindang pamayo nin mga rinibong tawo, ginatos, maningkwenta, asin manampolo.

²²Sinda an maglilingkod bilang mga hukom kan mga tawo sa gabos na panahon. Dadarahon ninda saimo an masakit na mga kaso, alagad sinda na an bahalang maghukom kan mga masayon. Kaya magigin pasil na para saimo huli ta katabang mo sinda sa saimong trabaho.

²³Kun gibohon mo iyan, siring sa pagboot nin Dios, dai ka mapapagal asin madali pang matatawan nin solusyon an arin man na problema kan mga tawo.”

²⁴Sinunod ni Moises an hatol ni Jetro.

²⁵Nagpili siya sa mga Israelita nin mga lalaking maninigo asin ginibo niya sindang pamayo nin mga rinibong tawo, ginatos, maningkwenta asin manampolo.

²⁶Sinda an naglingkod bilang mga hukom kan mga tawo sa gabos na panahon. Dinara ninda ki Moises an masakit na mga kaso alagad sinda na an naghukom kan masayon.

²⁷Dangan tinugotan ni Moises na magpuli na an saiyang panugangan sa sadiring banwa.