Read Central Bicolano Exodus 2 Bible Online

Exodus 2 - Central Bicolano bible

Exodus 2

¹Kan panahon na ini, may sarong lalaki sa tribu ni Levi na nag-agom nin sarong babaeng katribu niya.

²Nagbados an babae asin nag-aki nin lalaki. Kan mahiling kan ina na magayon an aki, tolong bulan niya ining itinago.

³Alagad kan dai na niya ini pwedeng itago, kuminua siya nin basket na gibo sa bariw asin linahidan niya nin aspalto tanganing dai laogon nin tubig. Ilinaog niya an saiyang aki sa basket, dangan iwinalat sa tahaw kan mga talahib sa gilid kan salog.

⁴An aki binantayan kan tugang niyang babae sa horoharayo tanganing hilingon kun ano an mangyayari saiya.

⁵Kan magduman sa salog an aking babae kan hade tanganing magkarigos, mantang naglalakaw-lakaw sa pangpang an saiyang mga katabang, nahiling niya an basket sa tahaw kan mga talahib. Ipinakua niya idto sa sarong katabang.

⁶Kan bukasan niya an basket, nahiling niya an aking lalaki na naghihibi kaya naherak siya. “Saro ini sa mga aking Hebreyo,” an sabi niya.

⁷Nagrani sa prinsesa an tugang kan aki dangan naghapot, “Gusto mong ihanap taka nin babaeng Hebreyo na mag-aataman sa aking iyan?”

⁸“Sige, ihanap mo ako,” an simbag kan prinsesa. Kaya naghale an aking babae asin kinua niya an ina kan aki.

⁹Sinabihan kan prinsesa an babae, “Atamanon mo an aking ini asin babayadan taka.” Kaya dinara kan babae an aki asin inataman.

¹⁰Kan dakula na an aki, ibinalik siya kan saiyang ina sa prinsesa, asin inako siya kaini bilang sadiring aki. Nagsabi an prinsesa, “Ngangaranan ko siyang Moises huli ta hinawas ko siya sa tubig.”

¹¹Kan soltero na si Moises, dinalaw niya an kapwa niya mga Hebreyo, asin nahiling niyang pinapasakitan sinda sa paagi nin magagabat na trabaho. Nahiling pa niya kan pinapakol nin sarong Egipcio an sarong kapwa niya Hebreyo.

¹²Nangalag-kalag si Moises asin kan mahiling niyang mayo man nin ibang tawo, ginadan niya an Egipcio dangan tinahoban nin baybay.

¹³Sunod na aldaw, nagbalik siya asin nahiling niyang nag-iiwal an duwang Hebreyo. Hinapot niya an may sala, “Tadaw ta kinukulog mo an kapwa mo Hebreyo?”

¹⁴Nagsimbag an lalaki, “Siisay an nagbugtak saimo na magin samong pamayo asin hukom? Ano, gagadanon mo man ako arog kan ginibo mo sa Egipcio?” Natakot si Moises asin nagsaboot, “Aram na palan an ginibo ko.”

¹⁵Kan maaraman kan hade an nangyari, naghingowa siyang gadanon si Moises, alagad nagdulag ini pasiring sa Midian tanganing duman na mag-erok. Kan nagtutukaw si Moises sa may bubon, uminabot an pitong aking daraga ni Jetro na padi kan Midian, tanganing magharok nin tubig para sa mga raraan kan mga karnero asin kanding kan saindang ama.

¹⁷May nag-abot man na mga pastor asin pinalayas sinda. Alagad sinurog ni Moises an mga babae asin pinainom an mga hayop ninda.

¹⁸Pagpuli ninda, naghapot an saindang ama, “Tadaw ta naamay kamo ngunyan?”

¹⁹“Sinurog kaya kami nin sarong Egipcio kan palayason kami kan mga pastor,” an simbag ninda. “Ihinarok pa ngani niya kami nin tubig dangan pinainom an mga hayop.”

²⁰“Haen siya?” an hapot ni Jetro sa saiyang mga aki. “Tano ta binayaan nindo siya duman? Balik kamo asin alokon nindo siyang magkakan digdi sato.”

²¹Pinagmarahay ni Moises na duman na mag-erok. Dangan ipinaagom ni Jetro saiya an aki niyang si Zippora.

²²Nag-aki si Zippora nin lalaki. Nagsaboot si Moises, “Ngangaranan ko siyang Gersom huli ta saro akong dayuhan sa dagang ini.”

²³Pakalihis nin halawig na panahon, nagadan an hade nin Egipto, alagad an mga Israelita padagos na nasa kaoripnan. Kaya nag-agrangay sinda sa sobrang pagtios—inagrangay na nakaabot sa Dios.

²⁴Nadangog sinda nin Dios asin nagiromdoman niya an saiyang tipan ki Abraham, ki Isaac asin ki Jacob.

²⁵Nahiling niya an kamugtakan kan mga Israelita kaya naherak siya sainda.