Read Central Bicolano Exodus 22 Bible Online

Exodus 22 - Central Bicolano bible

Exodus 22

¹“Kun an sarong tawo maghabon nin sarong baka o sarong karnero, dangan ini saiyang binuno o ipinabakal, mabayad siya nin limang baka para sa sarong baka o apat na karnero para sa sarong karnero.

²Dapat niyang bayadan an saiyang hinabon; kun dai siyang ibabayad, siya an ipapabakal bilang oripon tanganing mabayadan niya an saiyang hinabon. Kun an hinabon na hayop, baka, asno o karnero man, buhay pang nakua sa saiya, an sarong hayop babayadan niya nin duwa. “Kun bangging nadakop asin nagadan an nagsalakat sa sarong harong, dai sasalaon an nakagadan. Alagad kun aldaw ini nangyari, sisimbagon niya an buhay kan nagadan.

⁵“Kun an sarong tawo magpasabsab kan saiyang mga hayop sa sarong oma o ubasan o kun binutasan niya an saiyang mga hayop asin nanabsab ini sa oma kan iba, an ano man na naraot sa oma babayadan kan kagsadiri kan hayop; ibabayad niya an pinakamarahay na produkto hale sa saiyang oma o ubasan.

⁶“Kun an sarong tawo magsulo sa saiyang oma, asin magkanap an kalayo sa kadootan pasiring sa oma kan iba dangan nasulo an tindog pang mga tinanom o an mga inaning tinambak na, an nagsulo mabayad kan gabos na nasulo.

⁷“Kun ipasaray nin sarong tawo sa saiyang kataed an saiyang kwarta o an ano man na pagrogaring niya, asin hinabon ini sa harong kan nagsaray, mabayad nin doble an mahabon kun siya madakop.

⁸Alagad kun dai madakop an mahabon, an nagsaray iaatubang sa Dios tanganing magsumpa na dai niya hinabon an pagrogaring na iwinalat saiya.

⁹“Sa lambang kaso nin pag-iriwal manongod sa mga pagrogaring arog kan baka, asno, karnero, gubing asin iba pa, an duwang tawo na parehong nagsasabi, ‘Iyo ini an nawawara ko’, iaatubang sa Dios. An ipahayag nin Dios na igwang sala, mabayad nin doble sa tunay na kagsadiri.

¹⁰“Kun ipaataman nin sarong tawo sa saiyang kapwa an sarong asno, baka, karnero o ano man na hayop, asin ini nagadan o nalugadan o kaya nawara alagad mayo nin nakahiling,

¹¹an nag-ataman maatubang sa Kagurangnan asin masumpa na dai niya hinabon an hayop. Kun dai hinabon an hayop, matubod an kagsadiri sa sumpa kan nag-ataman asin dai niya ini papabayadon.

¹²Alagad kun hinabon saiya an hayop, kaipuhan bayadan niya an kagsadiri.

¹³Kun an hayop ginadan nin mga lalaw na hayop, ipapahiling kan nag-ataman an natadang parte kan hayop bilang ebidensya asin dai siya kaipuhan magbayad para sa ginadan na hayop.

¹⁴“Kun an sarong tawo nagsubli nin sarong hayop asin ini nalugadan o nagadan na dai an kagsadiri, babayadan ini kan nagsubli.

¹⁵Alagad kun yaon duman an kagsadiri kan mangyari ini, dai na mabayad an nagsubli; kun an hayop inarkila, an arkila iyo na an magigin bayad.

¹⁶“Kun matentaran asin madorogan nin sarong lalaki an sarong birhen na dai pa nakatalaan na ikasal, kaipuhan tawan niya ini nin dote dangan papakasalan.

¹⁷Alagad kun habong ipakasal kan ama an saiyang aking babae, an lalaki dapat magtao sa ama kan kantidad na pareho kan dote para sa sarong birhen.

¹⁸“Dai nindo pagtugotan na mabuhay an babaeng mangkukulam.

¹⁹“Dapat gadanon an siisay man na magdorog sa hayop.

²⁰“Dapat gadanon an siisay man na mag-atang sa arin man na dios-dios, huli ta ako sana, an Kagurangnan, an dapat dolotan nin atang.

²¹“Dai nindo pagpasakitan o pagdaog-daogon an sarong dayuhan; giromdomon nindo na nagin mga dayuhan man kamo sa Egipto.

²²Dai nindo pagpasakitan an mga babaeng balo o an mga ilo.

²³Kun pasakitan nindo sinda dangan maghagad sinda sako nin tabang, ako, an Kagurangnan, matabang sa sainda.

²⁴Maaanggot ako asin gagadanon ko kamo sa gera. Mababalo an saindong mga agom asin maiilo an saindong mga aki.

²⁵“Kun kamo magpautang nin kwarta sa mga dukha sa sakong banwaan, dai nindo pag-arogon an ibang parapautang; dai nindo sinda pagpatuboan.

²⁶Kun kuahon nindo an alikboy nin saindong kapwa bilang sangra, iuli nindo iyan saiya bago magsolnop an aldaw,

²⁷huli ta iyo sana iyan an gamit niyang tamong na makakapahimbong kan saiyang hawak. Ano pa an gagamiton niya sa pagkatorog? Kun maghagad siya sako nin tabang, dadangogon ko siya huli ta ako maheherakon.

²⁸“Dai kamo maglanghad sa Dios asin dai nindo pagsumpaon an sarong namamayo kan saindong banwaan.

²⁹“Dai nindo pag-abalahon an pagdolot nin mga tinagba kan saindong inani, kan saindong arak asin kan lana na hale sa mga oliba. “Itao nindo sakuya an saindong matuang aking lalaki.

³⁰Itao man nindo sakuya an matua kan saindong mga baka asin mga karnero; pitong aldaw an hayop sa kaibahan nin saiyang ina, dangan sa ikawalong aldaw itao nindo iyan sako.

³¹“Kamo an sakuyang banwaan, kaya dai nanggad nindo pagkakanon an karne kan arin man na hayop na ginadan nin mga lalaw na hayop; itao nindo iyan sa mga ayam.