Read Central Bicolano Exodus 24 Bible Online

Exodus 24 - Central Bicolano bible

Exodus 24

¹Nagtaram an Kagurangnan ki Moises, “Tumukad kamo pasiring sako, ika, si Aaron, si Nadab, si Abihu asin an setenta kan kamagurangan nin Israel; asin mantang harayo pa kamo, magsamba kamo sako.

²Ika sana an magdolok sako; dai magrani an iba. Dai magtukad sa bukid an mga tawo.”

³Nagduman si Moises sa mga tawo asin ipinahayag sainda an gabos na togon saka mga pagboot nin Kagurangnan. Sarabay na nagsimbag an mga tawo, “Gigibohon mi an gabos na itinaram nin Kagurangnan.”

⁴Isinurat ni Moises an gabos na pagboot nin Kagurangnan. Pagkaagang amay nagtugdok siya nin altar sa pamitisan kan bukid. Nagpatindog siya nin doseng hariging gapo para sa doseng tribu nin Israel.

⁵Dangan nagsugo siya nin nagkapirang hoben na lalaki nin Israel na magdolot nin mga tinutong na atang asin magsakripisyo nin mga baka bilang dolot para sa katoninongan.

⁶Kinua ni Moises an kabanga kan dugo kan ginadan na mga hayop asin ibinugtak sa mga palanggana; an kabanga inula niya sa altar.

⁷Pakatapos, kinua niya an libro nin tipan, na nasusuratan kan mga togon nin Kagurangnan, dangan binasa nin makosog sa atubang kan mga tawo. An mga Israelita nagsimbag, “Susunodon mi an Kagurangnan asin gigibohon mi an gabos niyang pagboot.”

⁸Kinua ni Moises an dugo sa mga palanggana dangan iwinirik sa mga tawo. Nagsabi siya, “Ini an dugo nin pakipagtipan nin Kagurangnan kan itao niya saindo an mga togon na ini.”

⁹Nagturukad sa bukid si Moises, si Aaron, si Nadab, si Abihu asin an setentang mga lider nin Israel.

¹⁰Duman nahiling ninda an Dios nin Israel. An natutungtongan niya garo baldosa na gibo sa mga gapong sapiro na arog sa langit kaasul.

¹¹Dai inano nin Dios an mga kamagurangan nin Israel. Nahiling ninda an Dios dangan nagkarakan asin nag-irinom sinda.

¹²Nagtaram an Kagurangnan ki Moises, “Tumukad ka sa bukid pasiring sako asin maghalat ka huli ta itatao ko saimo an duwang tablang gapo na sinuratan ko kan mga togon asin kan mga pagboot na itutukdo mo sa mga tawo.”

¹³Kaya nag-andam si Moises saka si Josue na saiyang katabang dangan nagpoon si Moises sa pagtukad sa bukid nin Dios.

¹⁴Sinabihan ni Moises an mga lider, “Halaton nindo kami digdi sagkod na kami magbalik. Mawawalat sa kaibahan nindo si Aaron asin si Hur, kaya kun siisay man saindo an igwa nin problema, magdolok sainda.”

¹⁵Dangan nagtukad si Moises asin an bukid natahoban nin panganoron.

¹⁶An kamurawayan nin Kagurangnan nag-ontok sa Bukid nin Sinai. Sa paghiling kan mga Israelita, an kamurawayan nin Kagurangnan arog sa malaad na kalayo sa alitoktok kan bukid. Anom na aldaw na natahoban nin panganoron an bukid. Sa ikapitong aldaw, hale sa panganoron, inapod nin Kagurangnan si Moises.

¹⁸Nagpadagos sa pagtukad sa bukid si Moises pasiring sa panganoron. Nag-erok siya duman sa laog nin kwarentang aldaw asin kwarentang banggi.