Read Central Bicolano Exodus 25 Bible Online

Exodus 25 - Central Bicolano bible

Exodus 25

¹Nagtaram an Kagurangnan ki Moises,

²“Sabihan mo an mga Israelita na magtao nin dolot sako. Akoon mo an anoman na boot nindang idolot.

³Ini an mga dolot na aakoon mo: bulawan, plata, bronse;

⁴pinong lino, telang lana na kolor asul, purpura saka pula; telang gibo sa balukag nin kanding;

⁵anit nin lalaking karnero na tinugma nin pula; anit nin kanding; tablang akasya;

⁶lana para sa mga ilawan; pahamot para sa panlahid na lana asin para sa insenso;

⁷mga batong oniks asin iba pang batong pantampok sa efod asin sa pantahob sa daghan kan Halangkaw na Padi.

⁸Pagibohon mo an mga tawo nin sarong Tabernakulo para sako, tanganing mag-erok ako sa kaibahan ninda.

⁹An Tabernakulo asin an gabos na kasangkapan kaiyan gibohon nindo siring sa plano na ipapahiling ko saimo.

¹⁰“Gumibo kamo nin sarong Kaban na akasya, syento dyes sentimetros an laba, sesenta y seis sentimetros an lakbang asin sesenta y seis sentimetros an langkaw.

¹¹Patoson nindo nin purong bulawan an laog asin an luwas kaiyan dangan bugtakan nindo nin moldurang bulawan sa palibot.

¹²Gibohan nindo iyan nin apat na siningsing na bulawan asin itakod nindo sa apat na bitis; duwang siningsing sa mag-ibong na gilid kan kaban.

¹³Gumibo man kamo nin mga pasanan na akasya, saka patoson nindo nin bulawan

¹⁴asin isurok sa mga siningsing na nasa duwang gilid kan Kaban.

¹⁵Dai nanggad iyan paghaleon sa namumugtakan na mga siningsing.

¹⁶Dangan ilaog mo sa Kaban an duwang tablang gapo na nasusuratan kan mga togon na itatao ko saimo.

¹⁷“Gumibo kamo nin takop na purong bulawan, syento dyes sentimetros an laba asin sesenta y seis sentimetros an lakbang.

¹⁸Gumibo man kamo nin duwang kerubin sa pinulpog na bulawan,

¹⁹saro para sa mag-ibong na poro kan takop. Gibohon nindo na magin saro sanang pedaso nin bulawan an mga kerubin sagkod an takop.

²⁰Maghahampangan an duwang kerubin sa ibabaw kan takop, na matatahoban kan nakaunat nindang mga pakpak.

²¹Ilaog mo sa Kaban an duwang tablang gapo dangan takopan mo.

²²Diyan taka tatagboon sa ibabaw kan takop, sa tahaw kan duwang kerubin; diyan ko itataram saimo an sakong mga togon para sa banwaan nin Israel.

²³“Gumibo kamo nin sarong lamesa na akasya, otsenta y otso sentimetros an laba, kwarenta y kwatro sentimetros an lakbang asin sesenta y seis sentimetros an langkaw.

²⁴Patoson nindo iyan nin purong bulawan asin palibotan nin moldurang bulawan.

²⁵An palibot kaiyan bugtakan nindo nin sanipa na pito may kabangang sentimetros an lakbang asin palibotan nindo nin moldurang bulawan.

²⁶Apat na siningsing na bulawan an gibohon nindo para sa lamesa, dangan itakod nindo sa apat na kanto na namumugtakan kan apat na bitis.

²⁷Itakod nindo harani sa sanipa an mga siningsing na surokan kan mga pasanan na gagamiton sa pagdara kan lamesa.

²⁸Akasya an gamiton nindo sa paggibo kan mga pasanan asin patoson nindo iyan nin bulawan.

²⁹Gumibo kamo nin mga plato para sa insenso. Gumibo man kamo nin kalis, dulay saka mangko para sa dolot na arak. Iyan gabos gibohon nindo sa purong bulawan.

³⁰Ibugtak nindo an lamesa sa atubangan kan Kaban nin Tipan, asin sa ibabaw kan lamesa, danay nindong bugtakan nin dolot na tinapay.

³¹“Gumibo kamo nin sarong kandelerong purong bulawan; an bitis asin an kahawakan kaiyan gibohon nindo sa pinulpog na bulawan. Gibohon nindong saro sanang pedaso an kandelero sagkod an mga dekorasyon na burak, kaiba an mga bukol saka an mga petalo.

³²Bugtakan nindo nin anom na sanga, an mag-ibong na gilid kan kandelero, tolong sanga lambang gilid.

³³An lambang sanga samnohan nindo nin tolong burak na arog sa mga bukad na burak nin almendras na may kaibang mga bukol asin mga petalo.

³⁴An kahawakan kan kandelero samnohan man nindo nin apat na burak na arog sa mga bukad na burak nin almendras na may kaibang mga bukol saka mga petalo.

³⁵Bugtakan nindo nin sarong bukol sa irarom kan lambang pades kan anom na sanga.

³⁶An mga bukol, an mga sanga pati an kandelero gibohon nindo sa saro sanang pedaso nin pinulpog na bulawan.

³⁷Gumibo man kamo nin pitong ilawan para sa kandelero dangan ibugtak nindo sa ibabaw tanganing magliwanag iyan pasiring sa atubangan.

³⁸Gibohon nindo sa purong bulawan an pansipit sa mitsa asin an mga bandehado.

³⁹Treynta y singko kilos nin purong bulawan an gamiton nindo sa paggibo kan kandelero sagkod kan gabos na kagamitan kaiyan.

⁴⁰Kaipuhan sunodon nanggad nindo an plano na ipinahiling ko saimo sa bukid.