Read Central Bicolano Exodus 27 Bible Online

Exodus 27 - Central Bicolano bible

Exodus 27

¹“Gumibo kamo nin sarong altar na akasya. Kwadrado ini, na dos metros beynte sentimetros an laba asin an lakbang; an langkaw sarong metro may treynta sentimetros.

²An ibabaw kan apat na kanto kan altar, pormahan nindo na garo mga sungay. Ini gibohon na magin sarong pedaso sana sagkod an altar dangan patoson nindo nin bronse an bilog na altar.

³Gumibo kamo nin mga kawa na bubugtakan kan abo; gumibo man kamo nin mga pala, mangko, pansipit saka mga bugtakan nin baga. Gibohon nindo iyan gabos sa bronse.

⁴Gumibo man kamo nin parilyang bronse dangan bugtakan nindo ini nin apat na siningsing na bronse sa lambang kanto.

⁵Dangan sa irarom kan sanipa, ibugtak nindo iyan magpoon sa kabangaan na parte kan altar paibaba.

⁶Gumibo kamo nin mga pasanan na akasya, asin patoson nindo nin bronse

⁷dangan isurok sa mga siningsing tanganing an mga pasanan yaon sa duwang gilid kan altar kun dinadara ini.

⁸Tabla an gamiton nindo sa altar, asin gibohon na mayong laog an tahaw kaini siring sa plano na ipinahiling ko saimo sa bukid.

⁹“An patyo kan Tabernakulo gibohon nindo sa mga kurtina nin hinabol na pinong lino. Sa parteng habagat, kwarenta y kwatro metros an laba kan kurtina

¹⁰na titindihon sa beynteng bronseng harigi na papatindogan sa beynteng bronseng patungtongan. An mga kawit saka mga barat kan harigi gibohon nindo sa plata.

¹¹Siring man an gibohon nindo sa parteng amihan kan patyo.

¹²Para sa parteng solnopan, gumamit kamo nin mga kurtinang beynte y dos metros an laba, sampolong harigi saka sampolong patungtongan.

¹³Para sa parteng sirangan na namumugtakan kan pintoan, beynte y dos metros an lakbang kan patyo.

¹⁴Sa sarong ibong kan pintoan, an mga kurtina igwa nin laba na seis metros sesenta sentimetros, asin igwa nin tolong harigi saka tolong patungtongan.

¹⁵Arog man kaiyan an sa ibong na parte: mga kurtinang seis metros sesenta sentimetros an laba, tolong harigi saka tolong patungtongan.

¹⁶An mismong pintoan bugtakan nindo nin binurdahan na kurtinang panlipod na siyam na metros an laba, gibo sa pinong lino asin telang lana na kolor asul, purpura saka pula. Isabit nindo ini sa apat na hariging napapatindog sa apat na patungtongan.

¹⁷An gabos na harigi sa patyo baratan nindo nin mga pambarat na plata. An mga kawit kan mga harigi gibohon sa plata asin an mga patungtongan gibohon sa bronse.

¹⁸Kwarenta y kwatro metros an laba kan patyo, beynte y dos metros an lakbang asin dos metros beynte sentimetros an langkaw. An mga kurtina gibohon sa hinabol na pinong lino asin an mga patungtongan gibohon sa bronse.

¹⁹An gabos na kagamitan sa laog kan Tabernakulo asin an gabos na palo kaini asin kan patyo gibohon nindo sa bronse.

²⁰“Pagbotan mo an mga Israelita na darahan ka kan pinakamarahay na lana nin oliba para sa ilawan tanganing padagos iyan na maglaad.

²¹Aldaw-bangging aatamanon ni Aaron asin kan saiyang mga aki an ilawan na ibubugtak sa laog kan Tabernakulo, sa luwas kan kurtina saka sa atubangan kan Kaban nin Tipan. An pagboot na ini ootobon kan mga Israelita asin kan saindang mga kapagarakian sagkod pa man.