Read Central Bicolano Exodus 29 Bible Online

Exodus 29 - Central Bicolano bible

Exodus 29

¹“Ini an gigibohon mo sa pagkonsagra ki Aaron asin sa mga aki niyang lalaki tanganing maglingkod sako bilang mga padi. Kumua ka nin sarong torilyong baka saka duwang lalaking karnero na mayo nin kaninan.

²Gamiton mo an pinakamarahay na arinang trigo, alagad mayo nin lebadura, asin gumibo ka nin mga tinapay na igwang lana, nin mga tinapay na mayong lana, asin nin maninipis na biskwit na linahidan nin lana.

³Ibugtak mo iyan gabos sa sarong basket dangan idolot mo sako kaiba an torilyong baka saka an duwang lalaking karnero.

⁴“Ipag-iba mo si Aaron saka an saiyang mga aking lalaki sa may pintoan kan Tabernakulo dangan karigoson mo sinda duman.

⁵Pakatapos, isulot mo ki Aaron an mga gubing na sa padi—an tunikang may burda, an efod, an abito kan efod, an pantahob sa daghan asin an habay.

⁶Ibugtak mo sa saiyang payo an mitra asin igakod mo sa atubangan kan mitra an banal na korona.

⁷Dangan kuahon mo an lana, iula mo sa saiyang payo asin lahidan mo siya.

⁸“Padolokon mo saimo an saiyang mga aki dangan sulotan mo sinda kan tunika;

⁹hagkosan mo an saindang habayan dangan bugtakan mo nin turban an saindang payo. Iyan an gigibohon mo sa pagkonsagra ki Aaron asin kan saiyang mga aki. Sinda asin an saindang mga kapagarakian an maglilingkod sako bilang padi sagkod pa man.

¹⁰“Darahon mo sa atubangan kan Tabernakulo an torilyong baka asin sabihan mo si Aaron saka an saiyang mga aki na iduta an saindang mga kamot sa ibabaw kan payo kan torilyong baka.

¹¹Dangan bunoon mo an torilyong baka sa atubangan ko, duman sa may pintoan kan Tabernakulo.

¹²Kumua ka nin dikit na dugo kan torilyong baka asin sa paagi kan saimong muro, lahidan mo an sungay kan altar; an natadang dugo iula mo gabos sa pamitisan kan altar.

¹³Kuahon mo an gabos na taba na nakakatahob kan bituka, an pinakamarahay na parte kan katoy, an duwang bato kaiba an taba kaiyan asin tutongon mo gabos sa altar bilang atang sako.

¹⁴Alagad an karne kan torilyo, an anit asin an odo kaiyan tutongon mo sa luwas kan kampo. Ini an atang na mahale kan mga kasalan kan mga padi.

¹⁵“Dangan kuahon mo an saro sa duwang karnerong lalaki asin sabihan mo si Aaron saka an saiyang mga aking lalaki na iduta an saindang mga kamot sa ibabaw kan payo kan karnero.

¹⁶Bunoon mo an karnero, salodon an dugo asin iwirik mo sa apat na gilid kan altar.

¹⁷Pedasohon mo an karnero, hugasan an bituka asin an mga bitis dangan kaiba an payo asin an ibang mga pedaso,

¹⁸tutongon mo an bilog na karnero sa ibabaw kan altar bilang sarong tinutong na atang. An parong kan dolot na ini nawiwilihan ko.

¹⁹“Kuahon mo an saro pang karnero asin sabihan mo si Aaron saka an saiyang mga aki na iduta an saindang mga kamot sa ibabaw kan payo kan karnero.

²⁰Bunoon mo an karnero, kumua ka nin dikit na dugo kaini asin lahidan mo an hikawan kan toong talinga ni Aaron sagkod kan saiyang mga aki, asin an tanggurangan kan saindang toong kamot saka kan saindang toong bitis. An ibang dugo iula mo sa apat na gilid kan altar.

²¹Kumua ka nin dikit na dugo na nasa altar saka dikit na lana, dangan wirikan mo si Aaron asin an saiyang mga gubing, an mga aki niya saka an saindang mga gubing. Dangan si Aaron asin an saiyang mga aki patin an saindang mga gubing makokonsagra na sako.

²²“Kuahon mo man an taba kan karnero, an matabang ikog, an taba na nakakatahob sa bituka, an pinakamarahay na parte kan katoy, an duwang bato kaiba an taba asin an toong hita (huli ta iyo ini an karnero para sa ordenasyon).

²³Sa basket nin tinapay na mayo nin lebadura na idinolot sako, kumua ka nin sarong tinapay, saka sarong tinapay na igwang lana, sarong tinapay na mayong lana, asin sarong biskwit.

²⁴Ibugtak mo iyan gabos sa mga kamot ni Aaron asin kan saiyang mga aki dangan iitaas ninda iyan sako bilang sarong espesyal na dolot.

²⁵Dangan kuahon mo iyan sa sainda asin tutongon mo sa altar, sa ibabaw kan tinutong na atang, bilang sarong dolot na pagkakan sako. An parong kan dolot na ini nawiwilihan ko.

²⁶“Kuahon mo an daghan kan karnero dangan iitaas mo sako bilang sarong espesyal na dolot. Ini an parte kan hayop na mapapasaimo.

²⁷“An daghan asin an hita kan karnerong ginagamit sa ordenasyon iitaas sako bilang sarong espesyal na dolot asin lalaenon para ki Aaron saka sa saiyang mga aki.

²⁸Sagkod pa man ini an sakong pagboot na kun madolot an mga tawo kan dolot para sa katoninongan, an daghan saka an hita kan hayop lalaenon para sa mga padi. Ini an dolot sako kan mga tawo.

²⁹“Pagkagadan ni Aaron, an saiyang mga gubing na sa padi itatao sa saiyang mga aki, dangan isusulot ninda kun sinda lahidan nin lana asin ordenan.

³⁰An aking kasalihid sa pagkapadi ni Aaron masulot kan gubing na ini sa laog nin pitong aldaw kun siya maglaog sa Tabernakulo tanganing maglingkod sa Banal na Lugar.

³¹“Kuahon mo an karnero nin ordenasyon asin sa sarong banal na lugar labonan mo an karne kaini.

³²Ini asin an natadang tinapay sa basket ipakakan mo ki Aaron sagkod sa saiyang mga aki sa may pintoan kan Tabernakulo.

³³Kakakanon ninda an dolot para sa pagpatawad kan kasalan kan sinda konsagrahon asin ordenan. Mga padi sana an makakan kan mga pagkakan na ini huli ta ini banal.

³⁴Kun may natada pang karne o tinapay kinaagahan, dai ini pagkakanon kundi suloon huli ta ini banal.

³⁵“Gibohon mo an seremonya nin pag-orden ki Aaron sagkod kan saiyang mga aki sa laog nin pitong aldaw siring sa ipinagboot ko saimo.

³⁶Aroaldaw maatang ka nin lalaking baka bilang dolot sa pagpatawad kan kasalan. Huli kaini malilinigan an altar. Dangan lahidan mo ini nin lana tanganing makonsagra.

³⁷An paglinig asin pagkonsagra kan altar gibohon mo sa laog nin pitong aldaw. Dangan an altar magigin banal, asin an ano man na makaduta diyan, magigin banal.

³⁸“Sagkod pa man, ini an idodolot nindo sa ibabaw kan altar: duwang korderong manangtaon an edad sa aroaldaw.

³⁹Idolot nindo an sarong kordero pagkaaga asin an saro pagkabanggi.

⁴⁰An enot na kordero ibahan nindo nin sarong kilo kan pinakamarahay na arinang trigo na minasa sa sarong litrong lana nin oliba. Iula nindo an sarong litrong arak bilang dolot.

⁴¹An ikaduwang kordero idolot nindo pagkabanggi asin ibahan nindo nin arina, lana nin oliba saka arak na pareho kadakul kan sa pagkaagang dolot. Ini sarong dolot na pagkakan para sa sako asin an parong kaini nawiwilihan ko.

⁴²Sa gabos na panahon, ining tinutong na atang idodolot nindo sako sa may pintoan kan Tabernakulo, saen tatagboon ko kamo tanganing kaolayon.

⁴³Diyan ko tatagboon an banwaan nin Israel, asin magigin banal an lugar na iyan huli kan sakong kamurawayan.

⁴⁴Kokonsagrahon ko an Tabernakulo asin an altar; siring man si Aaron sagkod an saiyang mga aki kokonsagrahon ko tanganing maglingkod sinda sako bilang mga padi.

⁴⁵Mag-eerok ako sa kaibahan kan banwaan nin Israel, asin ako an magigin Dios ninda.

⁴⁶Mamimidbid ninda na ako iyo an Kagurangnan na saindang Dios, na nagluwas sainda sa Egipto tanganing mag-erok sa kaibahan ninda. Ako an Kagurangnan na saindang Dios.