Read Central Bicolano Exodus 3 Bible Online

Exodus 3 - Central Bicolano bible

Exodus 3

¹Kan panahon na iyan si Moises iyo an nag-aataman kan mga karnero asin mga kanding kan panugangan niyang si Jetro, na padi kan Midian. Sarong aldaw, inalaw niya an mga hayop pasiring sa solnopan kan kalangtadan sagkod na nakaabot siya sa Sinai, an bukid nin Dios.

²Nagpahiling saiya duman an anghel nin Kagurangnan sa laad nin kalayo na naghahale sa tahaw kan sarong marambong na tinanom. Nahiling niya na nagkakalayo an marambong na tinanom alagad dai man ini nasusulo.

³“Makangangalas!” an sabi niya. “Ranihon ko daw asin hilingon kun tano ta dai ini nasusulo.”

⁴Kan mahiling nin Kagurangnan na nagrarani si Moises, nag-apod siya hale sa tahaw kan nagkakalayong tinanom, “Moises! Moises!” “Uya ako,” an simbag ni Moises.

⁵Nagtaram an Kagurangnan, “Dai ka magrani. Halea an saimong mga sandalyas, huli ta banal an lugar na saimong natitindogan.

⁶Ako an Dios nin saimong mga magurang, an Dios ni Abraham, ni Isaac, asin ni Jacob.” Kaya tinahoban ni Moises an saiyang lalawogon huli ta natakot siyang maghiling sa Dios.

⁷Nagtaram pa an Kagurangnan, “Nahiling ko an grabeng kasakitan kan sakong banwaan sa Egipto. Nadangog ko an saindang inagrangay na iligtas sinda sa mga nag-ooripon sa sainda. Naaaraman ko an gabos nindang tinitios,

⁸kaya naghilig ako tanganing iligtas sinda sa mga Egipcio asin darahon sa dagang matubang, mahiwas asin mayaman sa gabos na bagay. Dadarahon ko sinda sa dagang pinag-eerokan ngunyan kan mga Cananeo, Heteo, Amoreo, Perezeo, Heveo asin Jebuseo.

⁹Nadangog ko an inagrangay kan sakong banwaan asin nahiling ko an pag-api sainda kan mga Egipcio.

¹⁰Ngunyan susugoon taka sa hade tanganing ikaluwas mo sa Egipto an mga Israelita na sakong banwaan.”

¹¹Alagad nagsimbag si Moises sa Dios, “Siisay man ako na maduman sa hade nin Egipto tanganing iluwas sa saiyang nasyon an mga Israelita?”

¹²Nagtaram an Dios, “Iibahan taka, asin iyan an patotoo na sinugo taka. Sa panahon na ikaluwas mo na sa Egipto an mga tawo, sasambahon nindo ako sa bukid na ini.”

¹³Alagad nagsimbag si Moises, “Kun magduman ako sa mga Israelita asin magsabi sainda, ‘Sinugo ako kan Dios nin saindong mga ginikanan,’ dangan hapoton ninda ako kun ano an saimong ngaran, ano an sasabihon ko?”

¹⁴Nagtaram an Dios, “AKO IYO AKO. Sabihan mo sinda: ‘An inaapod na IYO AKO an nagsugo sako sa saindo.’

¹⁵Sabihan mo man an mga Israelita na an Kagurangnan, an Dios kan saindang mga ginikanan, ni Abraham, ni Isaac, asin ni Jacob, iyo an nagsugo saimo sa sainda. Iyo ini an sakong ngaran sagkod pa man. Gigiromdomon ako sa ngaran na ini sa gabos na henerasyon.

¹⁶Lakaw asin tipona an mga lider nin Israel dangan sabihan mo sinda na Ako, an Kagurangnan, an Dios kan saindang mga ginikanan, an Dios ni Abraham, ni Isaac, asin ni Jacob nagpahiling saimo. Sabihan mo na dinalaw ko sinda asin nahiling ko kun ano an ginigibo sainda kan mga Egipcio.

¹⁷Nangangako ako na iluluwas ko sinda sa Egipto na nag-ooripon sa sainda asin dadarahon ko sinda sa mayaman saka matubang na daga kan mga Cananeo, Heteo, Amoreo, Perezeo, Heveo, asin Jebuseo.

¹⁸“Dadangogon ka kan sakong banwaan; dangan, kaiba an mga lider nin Israel, magduman kamo sa hade nin Egipto asin sabihan nindo siya, ‘An Kagurangnan, an Dios kan mga Hebreyo, nagpahiling sa samo. Ngunyan, tugote kaming maglakaw nin tolong aldaw pasiring sa kalangtadan tanganing mag-atang sa Kagurangnan, na samuyang Dios.’

¹⁹Aram kong dai matugot an hade na maghale kamo sagkod na dai siya mapiritan.

²⁰Kaya gagamiton ko an sakong kapangyarihan asin papadusahan ko an Egipto sa paagi nin makangingirhat na mga bagay na gigibohon ko duman. Pakatapos kaiyan papahaleon na niya kamo.

²¹“Gigibohon kong igalang kamo kan mga Egipcio tanganing paghale nindo, may dara kamo.

²²An lambang babaeng Israelita mahagad nin gubing, alahas na plata asin bulawan sa saiyang mga kataed o sa mga Egipciong nag-eerok sa saiyang harong. Isusulot ninda iyan sa saindang mga aki, kaya madadara ninda an kayamanan kan mga Egipcio.”