Read Central Bicolano Exodus 33 Bible Online

Exodus 33 - Central Bicolano bible

Exodus 33

¹Tinaraman nin Kagurangnan si Moises, “Maghale na kamo sa lugar na ini, ika asin an mga tawong ilinuwas mo sa Egipto; magduman kamo sa dagang ipinanuga ko ki Abraham, ki Isaac, ki Jacob sagkod sa saindang mga kapagarakian.

²Susugoon ko an sarong anghel na mangengenot saindo, asin isusubol ko paluwas an mga Cananeo, Amoreo, Heteo, Perezeo, Heveo saka Jebuseo.

³Maduman kamo sa daga na mayaman sa gabos na bagay. Alagad huli ta matagas an saindong payo dai ako maiba saindo ta tibaad tunawon ko kamo sa dalan.”

⁴Kan madangog ini kan mga Israelita, nagmondo sinda asin mayo nang nagsulot nin mga alahas.

⁵Huli ta ipinagboot nin Kagurangnan ki Moises na sabihan an mga Israelita, “Saro kamong banwaan na matagas an payo. Kun mag-iba ako saindo maski dikit sanang panahon, tutunawon ko kamo. Kaya halea nindo ngunyan an saindong mga alahas, asin madesisyon ako kun ano an gigibohon ko sa saindo.”

⁶Kaya magpoon sa Bukid nin Sinai, dai na nagsulot nin mga alahas an mga Israelita.

⁷Ugale na ni Moises na kuahon an tolda asin patindogon sa sarong lugar na harayo sa luwas kan kampo; ini inapod niyang toldang pinagtatagboan. An siisay man na boot makihumapot sa Kagurangnan minaduman sa toldang pinagtatagboan na nasa luwas kan kampo.

⁸Kun minaduman si Moises sa tolda, an gabos na tawo minatirindog sa may pintoan kan saindang mga tolda asin tinatanaw ninda si Moises sagkod na makalaog siya sa toldang pinagtatagboan.

⁹Pakalaog ni Moises, minahilig an hariging panganoron asin minaontok sa may pintoan kan tolda, dangan nakikipag-olay an Kagurangnan ki Moises.

¹⁰Sa oras na mahiling kan mga tawo na an hariging panganoron nasa may pintoan na kan toldang pinagtatagboan, minaduruko sinda gabos sa pagsamba.

¹¹Parating hampangan kun makipag-olay an Kagurangnan ki Moises, siring sa sarong tawo na nakikiolay sa saiyang katood. Pakatapos, minabalik na sa kampo si Moises alagad nawawalat sa toldang pinagtatagboan an saiyang hoben na katabang, si Josue, na aki ni Nun.

¹²Nagsabi si Moises sa Kagurangnan, “Totoo mananggad na sinabihan mo ako na pangenotan ko an mga tawong ini pasiring sa dagang idto, alagad dai mo ako tinaraman kun siisay an makakatabang ko. Nagsabi kang midbid mo ako asin nawiwilihan mo.

¹³Kaya ngunyan, kun totoong nawiwilihan mo ako, pahilingan sako an saimong mga plano, tanganing mamidbid taka asin padagos na mawilihan mo ako. Giromdoma man na pinili mo an banwaan na ini para saimo.”

¹⁴Nagtaram an Kagurangnan, “Iibahan taka asin tatawan nin kapahingaloan.”

¹⁵Nagsimbag si Moises, “Kun dai mo ako iibahan, dai mo kami pagpahaleon sa lugar na ini.

¹⁶Huli ta paanong maaaraman na nawiwilihan mo ako saka an mga tawo? Bako daw huli sa pag-iba mo samo tanganing mapalaen kami, ako saka an saimong banwaan, sa ibang mga tawo sa kinaban?”

¹⁷Nagtaram an Kagurangnan ki Moises, “Gigibohon ko an sinabi mo, huli ta nawiwilihan taka asin midbid takang gayo.”

¹⁸Dangan nagsabi si Moises, “Nakikimaherak ako na ipahiling mo sako an saimong kamurawayan.”

¹⁹Nagsimbag an Kagurangnan, “Papaagihon ko sa atubang mo an gabos kong kamurawayan asin ipapahayag ko an banal kong ngaran. Ako iyo an Kagurangnan; kakaherakan ko an gusto ko, asin tatawan ko nin biyaya an mawilihan ko.

²⁰Alagad dai ko saimo ipapahiling an sakong lalawogon huli ta mayo nin tawong pwedeng makahiling sako dangan padagos na mabuhay.

²¹Uya, igwa nin sarong lugar sa harani ko. Magtindog ka sa ibabaw kan gapo.

²²Mantang nag-aagi an sakong kamurawayan, ibubugtak taka sa sarong barana kan gapo, asin tatahoban taka kan sakong kamot sagkod na ako makaagi.

²³Dangan hahaleon ko an sakong kamot asin mahihiling mo an sakong likod, alagad bakong an sakong lalawogon.”