Read Central Bicolano Exodus 34 Bible Online

Exodus 34 - Central Bicolano bible

Exodus 34

¹Tinaraman nin Kagurangnan si Moises, “Magtabas ka nin duwang tablang gapo arog kan mga naenot asin isusurat ko diyan an mga tataramon na isinurat ko sa naenot na mga tablang gapo na binaraak mo.

²Kaipuhan andam ka na noodmang aga asin tumukad ka sa Bukid nin Sinai sa pagsabat sako duman sa alitoktok kan bukid.

³Dai ka mag-iba nin siisay man sa pagtukad mo; mayo nanggad nin mahiling na tawo sa arin man na parte kan bukid, asin mayo nanggad nin magsabsab na hayop sa pamitisan kan bukid.”

⁴Kaya nagtabas si Moises nin duwang tablang gapo arog kan mga naenot asin pagkaagang amay dinara niya an mga ini sa alitoktok kan Bukid nin Sinai siring sa pagboot nin Kagurangnan.

⁵Naghilig an Kagurangnan sa sarong panganoron, nagtindog sa kaibahan niya duman, asin nagpahayag kan saiyang banal na ngaran, an Kagurangnan.

⁶Nag-agi an Kagurangnan sa atubangan niya asin nagtaram, “Ako, an Kagurangnan, iyo an Dios na maugayon asin maheherakon, an dai tolos naaanggot asin ipinapahiling ko an danay kong pagkamoot saka pagkamaimbod.

⁷Inootob ko an sakong panuga sa ribo-ribong henerasyon asin pinapatawad ko an karatan saka an kasalan; alagad sakuyang papadusahan an mga aki saka mga makoapo sagkod sa ikatolo asin sa ikaapat na henerasyon huli sa mga kasalan kan saindang mga magurang.”

⁸Nagduko tolos si Moises asin nagsamba.

⁹Dangan nagsabi siya, “O Kagurangnan, kun totoong nawiwilihan mo ako, nakikimaherak ako na ibahan mo kami, maski matagas an payo kan mga tawong ini. Patawadon mo kami kan samong mga karatan saka mga kasalan, asin akoa kami bilang sadiri mong banwaan.”

¹⁰Nagtaram an Kagurangnan ki Moises, “Makikipagtipan ako ngunyan sa banwaan nin Israel. Sa atubangan ninda, magibo ako nin ngangalasan na dai pa lamang nagigibo sa bilog na daga, o sa arin man na nasyon. Mahihiling kan gabos na tawo an darakulang bagay na gigibohon ko, huli ta magibo ako nin makangingirhat na bagay para saimo.

¹¹Otobon nindo an ipinagboboot ko ngunyan na aldaw. Mantang kamo naglalaog sa daga, papahaleon ko an mga Amoreo, Cananeo, Heteo, Perezeo, Heveo asin Jebuseo.

¹²Dai nanggad kamo makipagtipan sa mga nag-eerok sa dagang dudumanan nindo huli ta iyan an magigin siod nindo.

¹³Gabaon nindo an saindang mga altar, rumpagon an saindang mga sagradong harigi asin palodon an mga simbolo kan saindang diosang si Asera.

¹⁴“Dai kamo magsamba sa ibang dios, huli ta ako an Kagurangnan, na an ngaran Maimon, sarong maimon na Dios.

¹⁵Dai kamo makipagtipan sa mga nag-eerok sa daga huli ta sa pagsamba ninda kan saindang mga paganong dios-dios dangan sa pagsakripisyo sa sainda, iimbitaran ninda kamong makisumaro sa sainda asin masusugotan kamong kumakan kan mga idinolot ninda sa saindang mga dios-dios;

¹⁶dangan tibaad agomon kan saindong mga aking lalaki an saindang mga aking babae, na masugot sainda na magtalikod sako asin magsamba sa saindang mga paganong dios-dios.

¹⁷“Dai kamo maggibo nin mga metal na dios-dios.

¹⁸“Selebraron nindo an Pyesta kan Tinapay na Mayo nin Lebadura. Siring sa ipinagboot ko saindo, pitong aldaw kamong magkakan nin tinapay na mayo nin lebadura sa bulan nin Abib, huli ta ini an bulan kan paghale nindo sa Egipto.

¹⁹“Sadiri ko an lambang matuang aking lalaki asin an lambang matuang lalaking baka, karnero saka kanding.

²⁰Tutuboson nindo nin lalaking karnero an lambang matuang asno. Kun dai nindo tutuboson, babarion nindo an liog kaiyan. Balukaton nindo an lambang matuang aking lalaki. “Mayo nin magdolok sako na daing darang dolot.

²¹“Magtrabaho kamo sa laog nin anom na aldaw, alagad magpahingalo kamo sa ikapitong aldaw; magpahingalo kamo maski sa panahon nin pag-arado o nin pag-ani.

²²“Selebraron nindo an Pyesta nin Mga Semana pagpoon kan saindong pag-ani kan enot na bunga nin trigo, asin sa kataposan kan taon, selebraron nindo an Pyesta nin mga Harong-harong.

²³“Tolong beses sa sarong taon, an gabos na lalaking Israelita maatubang sako, sa Kagurangnan Dios, an Dios nin Israel.

²⁴Huli ta mantang kamo naglalaog, papahaleon ko an mga banwaan asin papahiwason ko an saindong teritoryo; mayo nin siisay man na magmamawot na sakopon an saindong daga sa panahon na maatubang kamo sako sa tolong pyestang ini.

²⁵“An hayop na iaatang nindo sako dai nindo pag-ibahan nin tinapay na igwa nin lebadura. An hayop na binuno nindo sa Pyesta nin Paskwa, dai nindo pagpaagahan.

²⁶“Taon-taon dadarahon nindo sa harong nin Kagurangnan na saindong Dios an pinakamarahay sa mga enot na bunga kan saindong daga. “An ogbon na karnero o kanding, dai nindo paglutoon sa gatas nin saiyang ina.”

²⁷Nagtaram an Kagurangnan ki Moises, “Isurat mo an mga tataramon na ini huli ta iyo ini an kakosogan kan pakikipagtipan ko saimo asin sa Israel.”

²⁸Nagdanay si Moises sa kaibahan nin Kagurangnan sa laog nin kwarentang aldaw asin kwarentang banggi; dai siya nagkakan o nag-inom. Isinurat niya sa duwang tablang gapo an mga tataramon kan tipan—an Sampolong Togon.

²⁹Kan maghilig si Moises hale sa Bukid nin Sinai na dara an Sampolong Togon, dai niya naaraman na nagliliwanag an saiyang lalawogon huli sa pakikipag-olay niya sa Kagurangnan.

³⁰Kan hilingon si Moises ni Aaron asin kan mga Israelita, nahiling ninda na nagliliwanag an saiyang lalawogon, kaya natakot sindang magdolok saiya.

³¹Alagad inapod sinda ni Moises. Nagdolok saiya si Aaron sagkod an mga lider nin Israel asin kinaolay niya sinda.

³²Pakatapos, nagdolok saiya an gabos na Israelita asin itinao sainda ni Moises an gabos na togon na itinaram saiya nin Kagurangnan duman sa Bukid nin Sinai.

³³Pakataram sainda ni Moises tinahoban niya nin belo an saiyang lalawogon.

³⁴Kun nagduduman sa toldang pinagtatagboan si Moises tanganing makipag-olay sa Kagurangnan, hinahale niya an saiyang belo. Pagluwas niya, ipinapaisi niya sa mga Israelita an ipinagboboot nin Kagurangnan,

³⁵asin nahihiling kan mga tawo na nagliliwanag an saiyang lalawogon. Kaya tinatahoban giraray ni Moises nin belo an saiyang lalawogon sagkod sa masunod niyang pakipag-olay sa Kagurangnan.