Read Central Bicolano Exodus 35 Bible Online

Exodus 35 - Central Bicolano bible

Exodus 35

¹Tinipon ni Moises an bilog na komunidad nin Israel asin sinabihan, “Ini an ipinagboot nin Kagurangnan na gibohon nindo:

²Gibohon nindo an gabos nindong trabaho sa laog nin anom na aldaw, alagad sa ikapitong aldaw magkakaigwa kamo nin sarong Sabbath nin solemning pahingalo para sa Kagurangnan. Gagadanon an siisay man na magtrabaho sa aldaw na iyan.

³Maski an pag-amak nin kalayo dai nindo paggibohon sa saindong mga harong sa aldaw nin Sabbath.”

⁴Sinabihan ni Moises an bilog na komunidad nin Israel, “Ini an ipinagboboot nin Kagurangnan:

⁵Magtao kamo nin dolot sa Kagurangnan. An siisay man na boot magdolot, magtao nin bulawan, plata o bronse;

⁶pinong lino; telang lana na kolor asul, purpura asin pula; telang gibo sa balukag nin kanding;

⁷anit nin lalaking karnero na tinugma nin pula; anit nin kanding; tablang akasya;

⁸lana para sa mga ilawan; pahamot para sa panlahid na lana asin para sa insenso;

⁹mga batong oniks saka iba pang batong pantampok sa efod asin sa pantahob sa daghan kan Halangkaw na Padi.

¹⁰“Magdigdi an lambang saro sa saindo na igwa nin kakayahan sa pagtrabaho asin gibohon nindo an gabos na ipinagboot nin Kagurangnan: an Tabernakulo,

¹¹an tolda asin an mga pantahob kaini, an mga kawit asin an mga tabla kaini, an mga trabisanyo, an mga harigi saka an mga patungtongan kaini;

¹²an Kaban nin Tipan kaiba an mga pasanan, an takop asin an panlipod na kurtina;

¹³an lamesa kaiba an mga pasanan asin an gabos na kagamitan kaini; an tinapay na dolot sa Dios;

¹⁴an kandelero asin an mga kagamitan kaini; an mga ilawan kaiba an lana;

¹⁵an altar nin insenso kaiba an mga pasanan, an panlahid na lana asin an mahamot na insenso, an kurtinang panlipod sa pintoan kan Tabernakulo;

¹⁶an altar na tututongan kan mga atang asin an bronseng parilya, an mga pasanan asin an gabos na kagamitan kaini; an palangganang hanawan asin an tumbawan kaini;

¹⁷an mga kurtina para sa patyo, an mga harigi asin an mga patungtongan kaini; an kurtinang panlipod sa pintoan kan patyo;

¹⁸an mga palo asin an mga lubid na gagamiton sa Tabernakulo sagkod sa patyo;

¹⁹an mga magagayon na gubing na isusulot kan mga padi kun malingkod sinda sa Banal na Lugar—an mga banal na gubing para sa pading si Aaron saka para sa saiyang mga aki.”

²⁰Dangan nagharale an mga Israelita sa atubangan ni Moises,

²¹asin an lambang saro na boot magtabang, nagdolot sa Kagurangnan kan gabos na bagay na kaipuhan sa paggibo kan Tabernakulo, sa pagsamba sagkod sa paggibo kan mga gubing para sa padi.

²²An gabos na boot magdolot, lalaki man o babae, nagdarara nin mga magayon na alpiler, hikaw, singsing, pulseras asin iba pang mga alahas na bulawan dangan idinolot ninda ini gabos sa Kagurangnan.

²³An mga tawo na igwa nin telang pinong lino, telang lana na kolor asul, purpura asin pula, telang hinabol sa balukag nin kanding, anit nin lalaking karnero na tinugma nin pula, o anit nin kanding, nagdarara kan mga ini.

²⁴An lambang saro na makakadolot nin plata o bronse nagdadara kaiyan bilang dolot sa Kagurangnan; siring man an lambang saro na igwa nin kahoy na akasya na magagamit sa Tabernakulo.

²⁵An mga babae na tataong magporon, nagdolot kan mga pinoron nindang torsido nin pinong lino asin nin mga torsidong lana na kolor asul, purpura asin pula.

²⁶Nagporon man sinda nin torsidong hale sa balukag nin kanding.

²⁷An mga lider nagdarara nin mga batong oniks asin iba pang mga bato na itatampok sa efod asin sa pantahob sa daghan;

²⁸nin mga pahamot para sa panlahid na lana saka para sa insenso, asin nin lana para sa mga ilawan.

²⁹Nagdarara kaining mga dolot an gabos na Israelita na boot magtabang, lalaki man o babae, bilang dolot sa Kagurangnan para sa trabaho na ipinapagibo niya ki Moises.

³⁰Sinabihan ni Moises an mga Israelita, “Pinili nin Kagurangnan si Bezalel, na aking lalaki ni Uri saka makoapo ni Hur na gikan sa tribu ni Juda.

³¹Pinano siya nin Dios kan saiyang kapangyarihan asin tinawan nin kakayahan, nin pakasabot asin kadonongan sa manlaen-laen na gibo sa arte:

³²sa pagdibuho sa bulawan, plata asin sa bronse;

³³sa pagtabas nin mga batong pantampok; sa pagdibuho sa kahoy asin sa iba pang mga gibo sa arte.

³⁴Itinao nin Kagurangnan ki Bezalel asin ki Oholiab, na aking lalaki ni Ahisamak na gikan sa tribu ni Dan, an kakayahan sa pagtukdo sa iba kan saindang mga naaaraman.

³⁵Itinao niya sa sainda an kakayahan sa gabos na trabaho nin sarong paraukit, paradibuho asin nin sarong paraburda sa pinong lino, sa telang lana na kolor asul, purpura asin pula, asin nin sarong parahabol nin ano man na klaseng tela—an kakayahan nin sarong trabahador o dibuhista.