Read Central Bicolano Exodus 36 Bible Online

Exodus 36 - Central Bicolano bible

Exodus 36

¹“Si Bezalel, si Oholiab asin an gabos na trabahador na tinawan nin Kagurangnan nin kakayahan asin pakasabot, tanganing maaraman an pagtugdok kan Tabernakulo, iyo an magiribo kan gabos na bagay siring sa pagboot nin Kagurangnan.”

²Inapod ni Moises si Bezalel, si Oholiab asin an iba pang ekspertong lalaki na tinawan nin Kagurangnan nin kakayahan asin boot na magtabang, dangan sinabihan na magpoon nang magtrabaho.

³Inako ninda ki Moises an gabos na dolot kan mga Israelita para sa pagtugdok kan Tabernakulo. Aga-aga, an mga Israelita padagos man giraray sa pagdara ki Moises kan saindang mga dolot.

⁴Kaya nagduman ki Moises an mga ekspertong trabahador

⁵asin nagsarabi saiya, “Sobra nang marahay an dolot kan mga tawo para sa ipinapagibo nin Kagurangnan.”

⁶Kaya nagboot si Moises sa bilog na kampo na ontokon na an pagdara nin dolot para sa Tabernakulo; kaya dai na nagdarara an mga tawo.

⁷Minsan siring, an nadara nang mga dolot sobra man giraray sa paghaman kan gabos na trabaho.

⁸An pinakaeksperto sa mga trabahador iyo an naggibo kan Tabernakulo. Ginamitan ninda ini nin sampolong kurtina nin hinabol na pinong lino asin telang lana na kolor asul, purpura asin pula na binurdahan nin mga kerubin.

⁹Pareho an sukol kan lambang kurtina: dose metros an laba asin duwang metros an lakbang.

¹⁰Magkatarakip na tinahi ninda an limang kurtina asin iyo man an ginibo ninda sa natadang lima.

¹¹Dangan binugtakan ninda nin mga tarotalingang asul na tela an sarong gilid kan enot na tinarakip na limang kurtina. Siring man an ginibo ninda sa ikaduwang tinarakip na limang kurtina.

¹²Singkwentang tarotalinga an itinahi ninda sa lambang gilid kan duwang kurtina; an lambang tarotalinga sa sarong kurtina igwang kahampang na tarotalinga sa ikaduwang kurtina.

¹³Naggibo man sinda nin singkwentang kawit na bulawan na gagamiton sa pagsugpon kan duwang pedasong tinarakip na kurtina.

¹⁴Dangan naggibo sinda nin tolda na pantahob sa Tabernakulo; onseng kurtina na gibo sa balukag nin kanding an ginamit ninda.

¹⁵An lambang kurtina igwa nin parehong sukol na trese metros an laba asin duwang metros an lakbang.

¹⁶Magkatarakip na tinahi ninda an limang kurtina asin iyo man an ginibo ninda sa anom na natada.

¹⁷Dangan tinahian ninda nin singkwentang tarotalinga an enot na pedaso; iyo man an ginibo ninda sa ikaduwa.

¹⁸Naggibo sinda nin singkwentang kawit na bronse na gagamiton tanganing an duwang pedaso magin saro na sana.

¹⁹Naggibo sinda nin duwang pantahob sa tolda: an saro gibo sa anit nin mga lalaking karnero na tinugma nin pula asin an saro gibo sa anit nin mga kanding.

²⁰Naggibo sinda nin mga taranos na tablang akasya para sa Tabernakulo.

²¹An lambang tabla may sukol na kwatro metros an langkaw saka sesenta y seis sentimetros an lakbang,

²²asin igwa nin duwang mitsa na pansugpon. An gabos na tabla igwa kan duwang mitsang ini.

²³Iyo ini an ginibong mga tabla para sa Tabernakulo: beynteng tabla para sa parteng habagat

²⁴asin para sa mga tablang ini naggibo sinda nin kwarentang patungtongan na plata, duwang patungtongan para sa lambang tabla.

²⁵Para sa parteng amihan kan Tabernakulo, beynteng tabla

²⁶asin kwarentang patungtongan na plata; duwang patungtongan para sa lambang tabla.

²⁷Para sa likod kan Tabernakulo, sa parteng solnopan, anom na tabla an ginibo ninda;

²⁸para sa mga kanto sa likod na parte kan Tabernakulo, duwang tabla.

²⁹An duwang tablang ini suhay sa ibaba alagad nagdudukotan sa itaas, sa enot na siningsing. Arog kaini an pagkabugtak ninda kan mga tabla sa duwang kanto.

³⁰Kaya walo gabos an mga tabla sa likod asin dyes y seis an patungtongan na plata, duwa para sa lambang tabla.

³¹Naggibo man sinda nin kinseng trabisanyong akasya, an lima para sa mga tabla na nasa sarong gilid kan Tabernakulo,

³²an lima para sa mga tabla na nasa ibong na gilid, asin an lima para sa mga tabla na nasa likod, sa parteng solnopan.

³³An laba kan mga trabisanyo na ikakana sa kabangaan kan mga tabla, mapoon sa sarong poro asin makakaabot sa ibong na poro kan Tabernakulo.

³⁴Pinatos ninda nin bulawan an mga tabla dangan kinabitan nin mga siningsing na bulawan na susurokan kan mga trabisanyo na patos man nin bulawan.

³⁵Naggibo sinda nin sarong kurtinang hinabol na pinong lino asin mga telang lana na kolor asul, purpura asin pula. Binurdahan ninda ini nin mga kerubin.

³⁶Naggibo man sinda nin apat na hariging akasya, na pinatos ninda nin bulawan asin binugtakan nin mga kawit na bulawan tanganing sabitan kan kurtina. Dangan naggibo sinda nin apat na patungtongan na plata na papatindogan kan mga harigi.

³⁷Para sa pintoan kan tolda, naggibo sinda nin panlipod na kurtinang hinabol na pinong lino asin mga telang lana na kolor asul, purpura asin pula na binurdahan.

³⁸Para sa panlipod na kurtinang ini, naggibo sinda nin limang harigi na igwa nin mga kawit. Pinatos ninda nin bulawan an poro kan mga harigi asin an mga barat kaini. Dangan naggibo sinda nin limang patungtongan na bronse para sa mga hariging ini.