Read Central Bicolano Exodus 38 Bible Online

Exodus 38 - Central Bicolano bible

Exodus 38

¹Ginibo man ni Bezalel sa akasya an altar na tututongan kan mga atang. Kwadrado ini, na dos metros may beynte sentimetros an laba, asin siring man an lakbang. An langkaw sarong metro may treynta sentimetros.

²An ibabaw kan apat na kanto kan altar pinorma niya na garo mga sungay; ini sarong pedaso sana sagkod an altar. Dangan pinatos niya sa bronse an bilog na altar.

³Ginibo man niya an gabos na kagamitan kan altar: mga kawa, mga pala, mga mangko, mga kawit asin mga bugtakan nin baga. Ginibo niya ini gabos sa bronse.

⁴Ginibo niya an parilyang bronse dangan ibinugtak sa irarom kan sanipa magpoon sa kabangaan na parte kan altar paibaba.

⁵Ginibo niya an apat na siningsing na susurokan kan mga pasanan asin ikinabit sa apat na kanto kan parilyang bronse.

⁶Ginibo niya an mga pasanan sa akasya asin pinatos sa bronse an mga ini.

⁷Isinurok niya an mga pasanan sa mga siningsing na nasa duwang gilid kan altar tanganing ini an gamiton sa pagdara kan altar. Tabla an altar asin ginibo niya na mayong laog an tahaw kaini.

⁸Ginibo niya an bronseng palanggana asin an bronseng tumbawan hale sa mga salming kan mga babaeng naglilingkod sa pintoan kan Tabernakulo.

⁹An patyo ginibo niya sa mga kurtina nin hinabol na pinong lino. Sa parteng habagat, kwarenta y kwatro metros an laba kan kurtina na

¹⁰natitindi sa beynteng bronseng harigi na napapatindog sa beynteng bronseng patungtongan. An mga harigi igwa nin mga kawit asin mga barat na gibo sa plata.

¹¹An patyo sa parteng amihan ginibo niya siring kan sa parteng habagat.

¹²Sa parteng solnopan, an patyo igwa nin mga kurtinang beynte y dos metros an laba, may sampolong harigi asin sampolong patungtongan. An mga harigi igwa man nin mga kawit saka mga barat na gibo sa plata.

¹³Sa parteng sirangan, sa namumugtakan kan pintoan, beynte y dos metros man an lakbang kan patyo.

¹⁴Sa sarong ibong kan pintoan, an mga kurtina igwa nin laba na seis metros sesenta sentimetros, asin igwa nin tolong patungtongan.

¹⁵Arog man kaiyan an sa ibong na parte; mga kurtinang seis metros sesenta sentimetros an laba, tolong harigi saka tolong patungtongan.

¹⁶An gabos na kurtina na nakapalibot sa patyo ginibo niya sa hinabol na pinong lino.

¹⁷Ginibo niya sa bronse an mga patungtongan, alagad ginibo niya sa plata an mga kawit, an mga barat sagkod an mga patos kan poro kan mga harigi. An gabos na harigi sa palibot kan patyo binaratan niya nin mga barat na plata.

¹⁸An kurtinang panlipod sa pintoan kan patyo ginibo niya sa hinabol na pinong lino asin sa mga telang lana na kolor asul, purpura asin pula na binurdahan. An sukol kaini siam na metros an laba asin duwang metros an langkaw, arog kan mga kurtina kan patyo.

¹⁹An kurtinang panlipod sa pintoan natitindi sa apat na harigi na napapatindog sa apat na bronseng patungtongan. An mga kawit, an patos kan poro kan mga harigi asin an mga barat gibo sa bronse.

²⁰An mga palo kan Tabernakulo asin kan patyo gibo gabos sa bronse.

²¹Uya an lista kan kantidad kan mga metal na ginamit sa Tabernakulo, na sinarayan kan duwang tablang gapo na sinuratan kan Sampolong Togon. An paglista ipinagboot ni Moises asin ginibo kan mga Levita na nagtrabaho sa irarom kan pamamahala ni Itamar na aki ni Aaron na padi.

²²Ginibo ni Bezalel, na aki ni Uri saka makoapo ni Hur na gikan sa tribu ni Juda, an gabos na ipinagboot nin Kagurangnan ki Moises.

²³Katabang ni Bezalel si Oholiab, na aki ni Ahisamak na gikan sa tribu ni Dan, na sarong paraukit, paradibuho asin parahabol nin pinong lino saka mga telang lana na kolor asul, purpura asin pula.

²⁴An gabos na bulawan na idinolot sa Kagurangnan para sa pagpatindog kan Tabernakulo uminabot sa sangribong kilo, sosog sa kinaugalean na timbang kan Tabernakulo.

²⁵An plata na natipon sa pagsenso kan mga tawo uminabot sa tres mil, kwatro syentos treynta kilos sosog sa kinaugalean na timbang kan Tabernakulo.

²⁶An kantidad na ini iyo an total na ibinayad kan gabos na tawong nabilang sa senso, na uminabot sa seis syentos tres mil, kinyentos singkwenta katawo magpoon sa beynteng taon an edad paitaas. An lambang saro nagbayad nin kabangang siklo, sosog sa kinaugalean na timbang kan Tabernakulo.

²⁷Sa plata, tres mil kwatro syentos kilos an nagamit sa paggibo kan sanggatos na patungtongan para sa Tabernakulo asin para sa kurtina, treynta y kwatro kilos na plata para sa lambang patongtongan.

²⁸An natadang treynta kilos na plata ginamit ni Bezalel sa paggibo nin mga barat, mga kawit, asin nin mga patos kan poro kan mga harigi.

²⁹An bronse na idinolot sa Kagurangnan uminabot sa dos mil, kwatro syentos beynte singko kilos.

³⁰Ini ginamit ni Bezalel sa paggibo kan mga patungtongan para sa pintoan kan Tabernakulo, kan bronseng altar kaiba an bronseng parilya, asin kan gabos na kagamitan kaini;

³¹kan mga patungtongan para sa patyo asin para sa pintoan kaini, saka kan gabos na palo kan Tabernakulo sagkod kan patyo.