Read Central Bicolano Exodus 4 Bible Online

Exodus 4 - Central Bicolano bible

Exodus 4

¹Dangan naghapot si Moises sa Kagurangnan, “Halimbawang dai magtubod asin magdangog sako an mga Israelita, ano an gigibohon ko kun magsabi sindang dai ka man nagpahiling sa sako?”

²Kaya hinapot man siya nin Kagurangnan, “Ano iyan na nakakapotan mo?” “Sarong sugkod,” an simbag ni Moises.

³Nagtaram an Kagurangnan, “Tapokan iyan sa daga.” Pagkatapokan ni Moises kan sugkod, nagin halas idto, kaya duminulag siya.

⁴Dangan tinaraman nin Kagurangnan si Moises, “Dakopa sa ikog an halas.” Kaya dinakop ni Moises an halas asin ini nagin sugkod giraray.

⁵Nagtaram an Kagurangnan, “Arog kaiyan an gibohon mo tanganing tumubod an mga Israelita na nagpahiling saimo an Kagurangnan, an Dios kan saindang mga ginikanan, an Dios ni Abraham, ni Isaac, asin ni Jacob.”

⁶Nagtaram pa an Kagurangnan ki Moises, “Laogan an saimong kamot sa saimong gubing sa may daghan.” Nagsunod si Moises; kan iluwas niya ini, maputi nang marahay huli sa daot.

⁷“Laogan giraray an saimong kamot,” pasunod nin Dios ki Moises. Ilinaog niya ini asin kan iluwas niya giraray, an saiyang kamot mayo nang daot.

⁸Nagtaram an Dios, “Kun dai ka ninda tubodan sa enot na ngangalasan pwedeng sa ikaduwa.

⁹Kun habo pa nanggad sindang magtubod sa duwang ngangalasan na ini asin habong magdangog saimo, kumua ka nin tubig sa Salog nin Nilo asin iula mo sa mamarang daga. An tubig magigin dugo.”

¹⁰Alagad nagsabi si Moises, “Hare ako pagsugoa, Kagurangnan. Maluya asin kamol akong magtaram. Dati akong maluyang magtaram poon kaidto sagkod ngunyan na makipag-olay ka sako.”

¹¹Nagtaram saiya an Kagurangnan, “Siisay an nagtatao nin ngoso sa tawo? Siisay an may kapangyarihan na gibohon siyang bongog o pola, may pakahiling o buta? Bakong ako, an Kagurangnan?

¹²Kaya lakaw na! Tatabangan takang magpahayag asin tutukdoan taka kan sasabihon mo.”

¹³Alagad nagsimbag si Moises, “Kagurangnan, nakikimaherak ako na iba na sana an sugoon mo.”

¹⁴Huli kaini, naanggot an Kagurangnan ki Moises asin nagtaram, “Bakong yaon an tugang mong Levita na si Aaron? Aram kong marahay siyang magtaram. An totoo, pasiring na siya digdi asin maoogma siyang mahiling ka.

¹⁵Kaolayon mo siya asin sabihan mo kan dapat niyang itaram. Pareho ko kamong tatabangan sa pagtaram asin tutukdoan kan saindong gigibohon.

¹⁶Siya an magigin ngoso mo sa mga tawo, an saimong tagapagtaram sa sainda; asin ika an magigin bilang Dios na mataram sa saiya kan mga isasabi niya.

¹⁷Daraha an sugkod na ini, na iyo an gagamiton mo sa paggibo nin ngangalasan.”

¹⁸Nagpuli si Moises sa panugangan niyang si Jetro asin nagsabi, “Tugote akong magbalik sa Egipto. Aaramon ko kun buhay pa an sakong mga kadugo duman.” Tinugotan siya ni Jetro dangan benendisyonan.

¹⁹Nagtaram an Kagurangnan ki Moises kan yaon pa siya sa Midian, “Magbalik ka sa Egipto, huli ta gadan na an gabos na tawong boot gumadan saimo.”

²⁰Kaya ilinunad ni Moises sa asno an saiyang agom asin mga aki dangan nagpasiring sa Egipto; dara niya an sugkod na ipinadara saiya nin Dios.

²¹Nagtaram giraray an Kagurangnan ki Moises, “Pag-abot mo sa Egipto, gibohon mo nanggad sa atubang kan hade an gabos na ngangalasan na itinao ko sa saimong kapangyarihan. Alagad papatagason ko an puso kan hade, asin dai niya tutugotan na humale an mga tawo.

²²Kaya sabihan mo siyang ako, an Kagurangnan, nagtaram kaini, ‘An Israel iyo an matua kong aking lalaki.

²³Tugotan mong maghale an sakong aki tanganing sambahon ako; kun magsayuma ka, gagadanon ko an matua mong aking lalaki.’”

²⁴Sa sarong lugar na pahingaloan sa dalan pasiring sa Egipto, sinabat nin Kagurangnan si Moises huli ta boot niya ining gadanon.

²⁵Kaya si Zippora, na agom ni Moises, kuminua nin matarom na gapo asin sinerkomsisyon an saiyang aki, dangan idinuta niya an naputol na laman sa bitis ni Moises. Nagsabi si Zippora ki Moises, “Ngunyan ikinasal ka sako huli sa dugo.” Kaya dai ginadan nin Kagurangnan si Moises huli kan ginibong pagserkomsisyon.

²⁷Nagtaram an Kagurangnan ki Aaron, “Magduman ka sa kalangtadan sa pagsabat ki Moises.” Kaya naglakaw siya sa pagsabat ki Moises sa bukid nin Dios; pakahiling niya ki Moises hinadokan niya ini.

²⁸Dangan inistorya ni Moises ki Aaron an gabos na itinaram saiya nin Kagurangnan kan pinapabalik siya sa Egipto, sagkod an manongod sa mga ngangalasan na ipinagboot na gibohon niya.

²⁹Kaya si Moises asin si Aaron nagpasiring sa Egipto dangan tinipon ninda an gabos na lider kan Israel.

³⁰Sinabi sainda ni Aaron an gabos na itinaram nin Kagurangnan ki Moises dangan ginibo ni Moises sa atubang ninda an mga ngangalasan.

³¹Nagtubod sinda, asin kan madangog ninda na dinalaw nin Kagurangnan an banwaan nin Israel saka nahiling an saindang kasakitan sa Egipto, nagduko sinda asin nagsamba.