Read Central Bicolano Exodus 8 Bible Online

Exodus 8 - Central Bicolano bible

Exodus 8

¹Dangan nagtaram an Kagurangnan ki Moises, “Dumuman ka sa hade asin sabihan mo siya na ini an itinaram nin Kagurangnan, ‘Tugotan mong humale an sakuyang banwaan tanganing makapagsamba sinda sako.

²Kun magsayuma ka, papadusahan ko an bilog na Egipto sa paagi nin mga talapang.

³An Salog nin Nilo mapapano nin mga talapang na maharawas sa tubig, asin maralaog sa saimong palasyo, sa saimong kwarto saka higdaan, sa mga harong kan saimong mga opisyal saka kan mga Egipcio. Lalawogon man ninda maski an saindong mga horno sagkod mga pinaglulutoan.

⁴Luluksohan ninda kamo, ika, an saimong mga opisyal asin an mga Egipcio.’”

⁵Nagtaram an Kagurangnan ki Moises, “Sabihan mo si Aaron na unaton an saiyang kamot na may sugkod sa tangod kan mga salog, mga kanal, saka mga sapa tanganing paluwason an mga talapang asin panoon kaini an daga nin Egipto.”

⁶Kaya inunat ni Aaron an saiyang kamot sa tangod kan katubigan nin Egipto asin nagruluwas an mga talapang patin napano kaini an daga nin Egipto.

⁷Alagad ginamit kan mga salamangkero an saindang tagong kadonongan, asin nagpaluwas man sinda nin mga talapang.

⁸Dangan ipinaapod kan hade si Moises saka si Aaron asin sinabihan, “Ipamibi nindo sa Kagurangnan na haleon ining mga talapang asin tutugotan ko nang humale an mga tawo tanganing makapag-atang sa Kagurangnan.”

⁹Nagsimbag si Moises, “Ikakaogma kong maaraman kun nuarin taka ipapamibi, ika, an saimong mga opisyal sagkod an saimong mga nasasakopan. Dangan mawawara an mga talapang asin mayong matatada kundi an mga yaon sa Salog nin Nilo.”

¹⁰Nagsimbag an hade, “Ipamibi mo ako sa aga.” Nagsabi si Moises, “Gigibohon ko an hinahagad mo tanganing maaraman mo na mayo nin ibang dios na arog sa Kagurangnan, na samong Dios.

¹¹Ika, an saimong mga opisyal, sagkod an saimong banwaan dai na iistorbohon kan mga talapang huli ta mawawara na ini asin mayong ibang matatada kundi idtong nasa salog.”

¹²Dangan binayaan ni Moises saka ni Aaron an hade. Siring sa panuga niya sa hade, ipinamibi ni Moises sa Kagurangnan na haleon an mga talapang.

¹³Dinangog siya nin Kagurangnan. Nagkagaradan an gabos na talapang sa mga harong, sa mga natad, sagkod sa mga oma.

¹⁴Tinambak kan mga Egipcio an mga gadan na talapang, na nakapabata sa Egipto.

¹⁵Kan mahiling kan hade na garadan na an mga talapang, nagmatagas na naman siya asin dai niya dinangog si Moises saka si Aaron, sosog sa itinaram nin Kagurangnan.

¹⁶Nagtaram an Kagurangnan ki Moises, “Sabihan mo si Aaron na pakolon kan saiyang sugkod an daga, asin an alpog sa bilog na Egipto magigin mga noknok.”

¹⁷Kaya pinakol ni Aaron kan saiyang sugkod an daga, asin an gabos na alpog sa Egipto nagin mga noknok na nagpasakit sa mga tawo saka sa mga hayop.

¹⁸Nagbalo an mga salamangkero na magpaluwas nin mga noknok alagad mayo sindang naginibo. Maski saen igwa nin noknok.

¹⁹Nagsabi sa hade an mga salamangkero, “An Dios an kaggibo kaini!” Alagad nagmatagas an hade asin dai niya dinangog si Moises saka si Aaron sosog sa itinaram nin Kagurangnan.

²⁰Nagtaram an Kagurangnan ki Moises, “Sa agang amay magduman ka sa salog. Sabaton mo an hade sa pagduman niya sa salog dangan sabihan mo siya na nagtaram an Kagurangnan, ‘Tugotan mong humale an sakuyang banwaan tanganing makapagsamba sinda sako.

²¹Pinapatanidan taka na kun magsayuma ka, mapadara ako nin mga langaw bilang padusa sa saimo, sa saimong mga opisyal sagkod sa saimong mga nasasakopan. An mga harong kan mga Egipcio mapapano nin mga langaw asin an daga matatahoban kaini.

²²Alagad ililigtas ko an Goshen, na pinag-eerokan kan sakong banwaan, tanganing maaraman mo na Ako, an Kagurangnan, iyo an mapangyari sa dagang ini.

²³Ipapahiling ko an kalaenan kan sakong banwaan sa saimong banwaan. An ngangalasan na ini mangyayari sa aga.’”

²⁴Pinatotoohan nin Kagurangnan an saiyang itinaram. Nagpadara siya nin kadakul na langaw sa palasyo kan hade asin sa mga harong kan saiyang mga opisyal. Rinaot kan mga langaw an bilog na daga nin Egipto.

²⁵Ipinaapod kan hade si Moises saka si Aaron dangan sinabihan, “Lakaw asin mag-atang kamo sa saindong Dios digdi sa banwaan na ini.”

²⁶“Bakong tama na gibohon mi iyan,” an simbag ni Moises, “huli ta maaanggot an mga Egipcio sa gigibohon ming pagdolot nin mga hayop sa Kagurangnan na samong Dios. Kun digdi kami magdolot asin mahiling kami kan mga Egipcio, dai daw ninda kami gapoon?

²⁷Kaipuhan na maglakaw kami nin tolong aldaw pasiring sa kalangtadan tanganing mag-atang sa Kagurangnan na samong Dios, siring sa ipinagboot niya samo.”

²⁸Nagsabi an hade, “Tutugotan ko kamong mag-atang sa Kagurangnan na saindong Dios duman sa kalangtadan, bastang dai kamo magrayo. Ipamibi mo ako.”

²⁹Nagsimbag si Moises, “Pakahale ko digdi, mamimibi ako sa Kagurangnan tanganing sa aga magharale an mga langaw sa saimo, sa saimong mga opisyal sagkod sa saimong mga nasasakopan. Alagad dai mo na nanggad kami pagdayaon asin dai mo na pag-olangon an mga tawo sa pag-atang sa Kagurangnan.”

³⁰Naghale si Moises dangan namibi sa Kagurangnan.

³¹Ginibo nin Kagurangnan an hinagad ni Moises: hinale niya an mga langaw sa hade, sa saiyang mga opisyal sagkod sa saiyang mga nasasakopan; mayong natada maski sarong langaw.

³²Alagad nagmatagas na naman an hade, asin dai tinugotan na humale an mga tawo.