Read Central Bicolano Job 1 Bible Online

Job 1 - Central Bicolano bible

Job 1

¹Igwa kaidto nin sarong lalaki na an ngaran Job, na nag-erok sa daga nin Uz. Matanos siyang tawo asin linikayan niya an paggibo nin maraot.

²Igwa siya nin pitong aking lalaki saka tolong aking babae,

³asin pitong ribong karnero, tolong ribong kamelyo, sangribong baka saka limang gatos na asno. Igwa man siya nin dakul na sorogoon; kaya siya an pinakamayaman na lalaki sa Sirangan.

⁴Nagin kaugalean na kan mga aking lalaki ni Job na turno-turnong magbangkete sa saindang harong, asin danay na inaalok ninda an tolo nindang tugang na babae.

⁵Pagkaaga, kun tapos na an bangkete, amay na minabangon si Job asin minadolot nin mga sakripisyo para sa lambang aki niya tanganing mapabanal sinda. Danay na ginigibo niya ini ta nagsaboot siya na tibaad nagkasala an saro sainda sa dai tinutuyong pag-olog-olog sa Dios.

⁶Kan magdatong an aldaw na maatubang sa Kagurangnan an langitnon na mga linalang, si Satanas yaon man duman sa kaibahan ninda.

⁷Hinapot siya nin Kagurangnan, “Ano an pinagparagibo mo?” Nagsimbag si Satanas, “Nagparalakaw ako sa bilog na kinaban; maski saen ako nakaduman.”

⁸Naghapot giraray an Kagurangnan, “Nanumpongan mo si Job na sakong sorogoon? Mayo nin makakaarog saiya sa kinaban sa kaimbodan asin sa katanosan. Nagsasamba siya sako asin naglilikay sa paggibo nin maraot.”

⁹Nagsimbag si Satanas, “Magsasamba daw si Job saimo kun mayo siyang nakukuang pakinabang diyan?

¹⁰Danay mo siyang sinusurog asin an saiyang pamilya patin an mga rogaring niya. Benebendisyonan mo an gabos niyang gibo, asin tinawan mo siya nin dakul na hayop na pwedeng makapano kan daga.

¹¹Alagad baloang halea an gabos na sadiri niya, kun dai ka niya maldisyonon!”

¹²Sinabihan nin Kagurangnan si Satanas, “Ibinubugtak ko sa kapangyarihan mo an gabos niyang rogaring, alagad dai mo sana siya pagdotdoton.” Kaya naghale si Satanas sa atubang nin Kagurangnan.

¹³Sarong aldaw kan nagbabangkete an mga aki ni Job sa harong kan saindang matuang tugang,

¹⁴sarong sugo an nagdatong na nagdadalagan pasiring ki Job asin nagbareta, “Ginagamit mi an mga baka sa pag-arado kan kaomahan asin nananabsab sa kataed ninda an mga asno,

¹⁵kan magsalakay an mga Sabeo dangan kinua an mga hayop. Ginadan ninda an gabos mong sorogoon pwera sako. Ako sana an nakadulag tanganing magbareta saimo.”

¹⁶Dai pa nakakatapos pagtaram an sorogoon, kan saro pang sorogoon an nag-abot dangan nagsabi, “Tinamaan kan kikilat an mga karnero saka an mga pastor; nagkagaradan sinda gabos. Ako sana an nakadulag tanganing magbareta saimo.”

¹⁷Nagtataram pa an sorogoon kan saro pa an nagdatong asin nagsabi, “Sinalakay kami nin tolong grupo nin mga Caldeo, kinua an mga kamelyo, asin ginadan an gabos mong sorogoon pwera sako. Ako sana an nakadulag tanganing magbareta saimo.”

¹⁸Bago siya nakatapos sa pagtaram, saro pang sorogoon an nagdatong asin nagsabi, “Nagbabangkete an saimong mga aki sa harong kan matua mong aki,

¹⁹kan mag-abot an sarong bagyo. Nagaba an harong asin nadatogan an saimong mga aki; nagkagaradan sinda gabos. Ako sana an nakadulag tanganing magbareta saimo.”

²⁰Dangan nagtindog si Job asin ginisi an saiyang gubing sa kamondoan. Inaris niya an buhok sa saiyang payo dangan nagdapa siya sa daga.

²¹Nagsabi siya, “Huba ako kan iluwas sa tulak kan sakong ina, asin huba akong mabalik. An Kagurangnan an nagtao, asin an Kagurangnan an nagkua. Pag-omawon logod an ngaran nin Kagurangnan!”

²²Maski nangyari an gabos na ini, dai nagkasala si Job, huli ta dai niya binasol an Dios.