Read Central Bicolano Job 10 Bible Online

Job 10 - Central Bicolano bible

Job 10

¹“Naoongis ako sa sakong buhay. Hinanyoga an mapait kong inagrangay.

²Dai mo ako pagkondenaron, O Dios. Sabihi ako! Anong kaso an isinasangat mo laban sako.

³Marahay daw para saimo an mang-api, an magbasang-basang kan gibo nin saimong mga kamot, asin an mag-ogma sa plano kan mga maraot?

⁴Siring daw kan sa tawo an saimong mga mata? An nahihiling mo daw arog kan nahihiling ninda?

⁵Siring daw sa mga aldaw nin tawo an saimong mga aldaw, o sa mga taon nin tawo an saimong mga taon?

⁶Kun siring, tadaw ta hinahanap mo an sakong mga kasalan, asin sinisiyasat an gabos kong karatan?

⁷Aram mong mayo ako nin kasalan, saka mayo nin magligtas sako sa saimong kapangyarihan.

⁸“Mga kamot mo an naggibo asin naghaman sako, asin ngunyan iyan man sana an magadan sako.

⁹Giromdoma na ginibo mo ako hale sa laboy; boot mong magin kabokabo ako giraray?

¹⁰An ama ko tinawan mo nin kosog tanganing magibo ako; pinatalubo mo ako sa tulak nin sakuyang ina.

¹¹Hinaman mo an sakong hawak na igwang mga tolang saka mga ugat, dangan tinahoban mo iyan nin kublit saka laman.

¹²Tinawan mo ako nin buhay saka danay na pagkamoot, asin an saimong pangataman an nag-ingat sako.

¹³Alagad aram ko na sa bilog na panahon, hilom na nagpaplano ka tanganing pasakitan ako.

¹⁴Binabantayan mo ako tanganing mahiling kun ako nagkakasala, tanganing dai mo ako mapatawad.

¹⁵Kun ako maraot, herak man sako! Alagad kun ako matanos, dai ako makakapaabaw-abaw, huli ta napapano ako nin kasosopgan asin nahihiling ko an sakong kasakitan.

¹⁶Kun ilangkaw ko an sakong sadiri hahanapon mo ako siring sa leon; minagibo ka pa nin mga milagro tanganing kulogan ako.

¹⁷Danay kang igwa nin saksi laban sako; saimong pinapadakula an kaanggotan mo sako; bagong pagsalakay an danay mong iniisip laban sako.

¹⁸“Tadaw, O Dios, ta itinugot mong ako mamundag? Marahay pang nagadan na ako bago nahiling nin siisay man.

¹⁹An ilubong paghale sa tulak kaagid man sana kan dai lamang nabuhay.

²⁰Bakong madali na akong magadan? Pabayae ako! Tugoteng ipag-ogma ko an natatadang panahon,

²¹bago ako magduman saen mayo na nin makakabalik, sa daga na mamondo saka madiklom,

²²daga nin kadikloman, mga anino, saka karibongan, na an ilaw iyo an madikloman.”