Read Central Bicolano Job 11 Bible Online

Job 11 - Central Bicolano bible

Job 11

¹Dangan nagsimbag si Zofar na Naamatita:

²“Mayo daw nin masimbag kan siring na kalolongan? Nagigin matanos daw an tawo kun dakul an saiyang itinataram?

³Job, naghohona ka daw na dai mi ika masisimbag? Dai daw kami magirong kun ika magtuyatuya?

⁴Sinasabi mong totoo an saimong tinataram; ipinapahayag mong malinig ka sa atubang nin Dios.

⁵Simbagon ka logod nin Dios!

⁶Sasabihon niya saimo an mga hilom nin kadonongan; may mga bagay na dai malaladop kan isip nin tawo.

⁷“Maaaraman mo daw an mga kasagkoran saka mga kairaroman kan kadakulaan asin kapangyarihan nin Dios?

⁸Halangkaw pa iyan ki sa langit—ano an saimong magigibo? Hararom pa iyan ki sa kinaban kan mga gadan—ano an pwede mong maaraman?

⁹An kadakulaan nin Dios mahiwas pa ki sa daga, asin halakbang pa ki sa dagat.

¹⁰Kun dakopon ka nin Dios asin darahon sa hukoman, siisay an makakaolang saiya?

¹¹Aram nin Dios an mayong halagang mga tawo; nahihiling niya an gabos nindang maraot na gibo.

¹²An mga mangmang mapoon nang magin madonong sa panahon na an lalaw na mga asno mamundag na magaro.

¹³“Tanosa an saimong puso, Job. Unata an saimong kamot pasiring sa Dios.

¹⁴Halea an karatan asin kasombikalan sa saimong harong.

¹⁵Dangan maaatubang mo giraray an kinaban, na mayong kahandalan asin katakotan.

¹⁶Dangan malilingawan mo an gabos mong kasakitan, siring sa mga baha na nakaagi asin dai na nagigiromdoman.

¹⁷An saimong buhay orog pang magigin maliwanag ki sa kaodtohan; an kadikloman kaiyan magigin arog sa kaagahon.

¹⁸Mabubuhay kang matiwasay asin pano nin paglaom; iingatan ka nin Dios asin tatawan nin kapahingaloan.

¹⁹Dai ka matatakot sa saimong mga kaiwal; dakul na tawo an mahagad saimo nin tabang.

²⁰Alagad mahaharap an mga mata kan mga maraot; dai ninda makukua na dalan pasiring sa kaligtasan, asin an saindang magigin paglaom iyo an pagdatong kan kagadanan.”