Read Central Bicolano Job 12 Bible Online

Job 12 - Central Bicolano bible

Job 12

¹Dangan nagsimbag si Job:

²“Mayong duda na kamo an tingog kan banwaan, asin pagkagadan nindo magagadan na kaiba nindo an kadonongan.

³Alagad igwa ako nin pakasabot na siring saindo; sa anoman na bagay bako akong menos saindo. Siisay an dai nakakaaram kan gabos nindong sinabi?

⁴Ako nagin ngingisihan ngunyan kan sakong mga katood; ako, na nag-apod sa Dios asin sinimbag niya, ako, na matanos saka mayong sala.

⁵Huli ta dai kamo nasasakitan, ako saindong pinag-olog-olog; hinahampak pa nindo an tawong madali nang matumba.

⁶Alagad an mga mahabon saka an mga mayong Dios nag-eerok sa katoninongan, maski an saindang dios iyo sana an saindang kosog.

⁷“Alagad hapota nindo an mga hayop saka mga gamgam; dakul sindang ikakatukdo saindo.

⁸Hapota nindo an mga linalang sa daga saka sa dagat dapit sa saindang kadonongan.

⁹Gabos sinda nakakaaram na an kamot nin Dios an naggibo sainda.

¹⁰Yaon sa Dios an buhay kan lambang linalang, asin an hinangos kan gabos na tawo.

¹¹Alagad siring na an saindong dila naoogma sa pagnamit kan pagkakan, an saindong mga talinga naoogma man sa pagdangog nin mga tataramon.

¹²“An mga gurang igwa nin kadonongan, alagad an Dios igwa nin kadonongan asin kapangyarihan. An mga gurang igwa nin pakasabot kan katotoohan, alagad an Dios igwa nin pakasabot kan katotoohan saka kan kapangyarihan sa paggibo.

¹⁴Kun minagaba an Dios, mayong nakakahirahay; kun igwa siyang ibinibilanggo, mayo nin nakakapatalingkas.

¹⁵Kun siya dai minatao nin uran, naaalang an daga; kun pinapauran niya, nagkakaigwa nin pagbaha.

¹⁶“An Dios makosog asin danay na mapanggana; nasa irarom kan saiyang kapangyarihan an nadaya asin an nandaya.

¹⁷Ginigibo niyang mangmang an mga parahatol, asin ginigibo niyang lolong an mga hukom.

¹⁸Hinahale niya sa trono an mga hade dangan ginigibo sindang mga bilanggo;

¹⁹ibinababa niya an mga padi asin an mapangyaring mga tawo.

²⁰Pinapaalo niya an mga tawong sinasarigan, asin hinahale niya an kadonongan kan mga gurang.

²¹Sinosopog niya an mga may katongdan asin hinahale an mga kosog kan mga pamayo.

²²Pinapara niya an diklom sa kairaroman, asin ginigibong magliwanag iyan.

²³Pinapakosog asin pinapadakula niya an mga nasyon dangan dinadaog saka rinurumpag niya an mga iyan.

²⁴Hinahale niya an pakasabot kan mga pamayo nin mga banwaan sa daga, dangan pinapalagalag niya sinda sa lugar na mayo nin dalan;

²⁵nagkakapkap sinda sa kadikloman asin siring sa mga burat na minasayasay.