Read Central Bicolano Job 13 Bible Online

Job 13 - Central Bicolano bible

Job 13

¹“Nadangog ko na an gabos mong sinasabi. Nasasabotan ko iyan gabos; pareho an satong naaaraman. Dai ako nahuhudyan saindo sa bagay na iyan.

³Alagad nakikipagdiskutiran ako bako saindo, kundi sa Dios; boot kong ipahayag saiya an sakong kaso.

⁴Tinatahoban nindo nin kaputikan an saindong kamangmangan; garo kamo mga doktor na dai nakakabolong kan mga may helang.

⁵Mag-alo sana kamo, asin iisipon nin tawo na madonong kamo!

⁶“Pagdangog kamo mantang ipinapahayag ko an sakong kaso.

⁷Tadaw ta nagpuputik kamo? Sa paghona nindo magkikinabang an Dios sa saindong kaputikan?

⁸Makakadepensa daw kamo para sa Dios? Kamo daw an maatubang kan kaso para saiya?

⁹Makakakua daw nin karahayan an Dios sa saindo kun siyasaton niya kamo? Madadaya daw nindo siya siring kan pagdaya nin sarong tawo sa saiyang kapwa?

¹⁰Maski pa hilom an gawe nindong pagpalaen, sasagweon niya nanggad kamo,

¹¹asin matatakot kamo kan saiyang kapangyarihan.

¹²Garo mga abo na mayo nin halaga an saindong mga kasabihan; an saindong mga tataramon malumoy siring sa laboy.

¹³Mag-alo kamo asin pataramon nindo ako, dangan mangyari na an mangyari.

¹⁴“Andam ako sa anoman na pag-alaman.

¹⁵Ano kun gadanon ako nin Dios; mayo na ako nin paglaom. Alagad isasaysay ko saiya an sakong kaso.

¹⁶Tibaad pa an sakong kapangahasan iyo an magligtas sako, huli ta mayo nin maraot na tawo na nangangahas na mag-atubang sa Dios.

¹⁷Ngunyan, dangoga nindo an sakong paliwanag.

¹⁸Andam ako sa pagpahayag kan sakong kaso, huli ta aram kong nasa katanosan ako.

¹⁹“Madigdi ka daw sa pagsumbong sako, O Dios? Kun iyo, dai na ako magirong; andam na akong magadan.

²⁰Alagad itugot mo sako an duwang bagay, asin dai ako matago sa saimong atubang;

²¹ontoka an pagpadusa mo sako, asin dai mo ako paggadanon sa takot.

²²“Ika ngona an magtaram, O Dios, asin sisimbagon taka. O ako an saimong paenoton, asin ika an magsimbag.

²³Ano an sakong mga kasalan? Anong mga karatan an sakong naginibo? Paaraman sako an mga iyan!

²⁴“Tadaw ta linilikayan mo ako? Tadaw ta ibinibilang mo ako na sarong kaiwal?

²⁵Garo na ako pinapadpad na dahon, saimo pa daw tatakoton? Siring ako sa alang na dagami, saimo pa daw lalamagon?

²⁶“Mga mapait na sumbong an dara mo laban sako, sagkod kaidtong nagibo ko kan aki pa ako.

²⁷Kadena an iginagapos mo sa sakong mga bitis; binabantayan mo an lambang lakaw ko, asin sinisiyasat pati an mga gira ko.

²⁸Huli kaiyan, naroronot ako siring sa lapang kahoy, arog sa gubing na ginagatob nin kino.