Read Central Bicolano Job 15 Bible Online

Job 15 - Central Bicolano bible

Job 15

¹Dangan nasimbag si Elifaz na Temanita:

²“Minasimbag daw an tawong madonong sa paagi nin madoros na pakaaram, asin pinapano an saiyang hawak kan doros na hale sa sirangan?

³Makikidiskutiran daw siya sa tataramon na mayong kahulogan o sa mga tataramon na mayong ikakataong karahayan saiya?

⁴Alagad hinahale mo na an pagkatakot sa Dios, asin inoolang mo an paghorophorop sa saiyang atubang.

⁵An saimong karatan nahihiling huli kan saimong tinataram; naghihingowa kang makatago sa likod kan mga tusong tataramon.

⁶An saimong ngoso an nagpapahamak saimo, asin bakong ako; an saimong mga ngabil an nagsasaksi laban saimo.

⁷“Ika daw an enot na tawong namundag? Buhay ka na daw kan gibohon nin Dios an kabukidan?

⁸Nadangog mo daw an mga ginibong plano nin Dios? Ika daw sana an tawong may kadonongan?

⁹Ano an aram mo na dai mi aram? Ano an nasasabotan mo na bakong malinaw samo?

¹⁰Nanodan mi an samong kadonongan sa mga gurang— mga tawong namundag bago an saimong ama.

¹¹“Tadaw ta isinisikwal mo an inaalok na karangahan nin Dios? Sa ngaran niya nakiolay kami sa mahuyong mga tataramon.

¹²Tano ta nagpapadara ka sa saimong puso? Tano ta naglalaad an saimong mga mata?

¹³Naaanggot ka sa Dios asin kinondenar mo siya.

¹⁴“Pwede daw na magin malinig an sarong tawo? Pwede daw na magin matanos an siisay man sa Dios?

¹⁵An Dios dai ngani minasarig sa saiyang mga anghel, maski sinda malinig sa atubang niya;

¹⁶gurano pa daw an tawong makauuyam asin maraot, na minainom nin karatan siring sa pag-inom niya nin tubig!

¹⁷“Ngunyan dangoga, Job, an naaaraman ko.

¹⁸Tinukdoan ako kan mga madonong nin mga katotoohan na saindang nanodan sa saindang mga magurang, asin mayo sindang itinatagong anoman.

¹⁹Ligtas an saindang daga sa mga dayuhan; mayo nin madagka sainda na magrayo sa Dios.

²⁰“An maraot na tawo nang-aapi sa iba mamumugtak sa labi-labing kasakitan mantang siya nabubuhay.

²¹Makangirhat na mga tingog an saiyang madadangog; masalakay an mga tulisan sa oras na iniisip niyang ligtas.

²²Mayo siyang paglaom na makadulag sa kadikloman, huli ta sa tibaad na lugar naghahalat saiya an kagadanan,

²³asin an mga bwitre naghahalat tanganing kakanon an saiyang bangkay. Aram niyang madiklom an maabot niyang mga aldaw;

²⁴an kapahamakan, siring sa mapangyaring hade, naghahalat sa pagsalakay saiya.

²⁵“Huli ta ibinikyaw niya an saiyang kamot tumang sa Dios asin dai niya minidbid an Makakamhan.

²⁶Mapaabaw-abaw saka masombikal an tawong iyan; sa katagasan nin payo, iniitaas niya an saiyang kalasag asin nagdadalagan tanganing labanan an Dios.

²⁸“Siya an tawo na nagsakop nin mga syudad asin nagkamkam nin mga harong na binayaan kan saindang kagsadiri, alagad an gera an marumpag kan mga iyan.

²⁹Dai siya magigin mayaman sa halawig na panahon; gabos niyang nasasadirihan dai magdadanay. Maski an saiyang anino mapapara,

³⁰asin dai siya makakadulag sa kadikloman. Makakaagid siya sa sarong kahoy na nagkasurulo an mga sanga, na an mga burak ipinapalid kan doros.

³¹Kun magpakalolong siya sa pagsarig sa karatan, an karatan an magigin balos niya.

³²Maaalang siya bago mag-abot an panahon, maaalang siring sa sanga asin dai na nanggad magigin berde.

³³Makakaagid siya sa balagon nin ubas na nagkararakdag an mga bunga; siring sa kahoy na oliba na nawaran nin burak.

³⁴Dai magkakaigwa nin kapagarakian an mga bakong diosnon, asin tutunawon nin kalayo an mga harong na napatindog huli sa suhol.

³⁵Ini an mga tawo na nagpaplano nin kasakitan saka naggigibo nin karatan; an saindang mga puso danay na pano nin pandadaya.”