Read Central Bicolano Job 16 Bible Online

Job 16 - Central Bicolano bible

Job 16

¹Dangan nagsimbag si Job: “Nakadangog na ako nin siring na mga tataramon; gabos kamo makaheherak na mga pararanga.

³Dai pa daw kamo maontok sa pagtaram? Kaipuhan daw na saindo maghale an huring tataramon?

⁴Makakataram man ako siring saindo, kun ako an nasa lugar nindo; pwede kong pagsugponon an mga tataramon laban saindo, asin magtango-tango kan sakong payo.

⁵Pwedeng huli sa hatol mapakosog ko kamo asin padagos na magtaram sa pagranga saindo.

⁶“Alagad anoman an itaram ko dai sako nakakatabang; asin an pag-alo dai nakakahale kan kulog na sakong namamatean.

⁷Pinagal mo nanggad ako, O Dios; itinugot mong magadan an sakong pamilya.

⁸Dinakop mo ako; kaiwal taka. Kublit asin tolang na sana ako, kaya naghona an mga tawo na iyan patotoo na nagkasala ako.

⁹“Sa kaanggotan pinagpurotol-putol ako nin Dios; naglalaad an saiyang mga mata sa pagkaongis sako.

¹⁰Ngingisihan ako kan mga tawo; pinalibotan ninda ako dangan sinampaling.

¹¹Itinao na ako nin Dios sa kamot kan mga maraot; sa mga tawong bakong diosnon.

¹²Namumuhay akong matoninong, alagad kinapotan niya ako sa liog dangan linanog saka rinonot. Ako an ginamit niyang patamaan

¹³kan saiyang pagpana hale sa gabos na lugar— mga bosog na minalagbas asin minalugad sako; minsan siring, dai niya ako naherakan.

¹⁴Daing ontok niya akong linugadan; arog sa sarong anggot na soldados, ako saiyang sinalakay.

¹⁵“Nagsulot ako nin sako, asin daog na nagtukaw ako digdi sa alpog.

¹⁶Namula an sakong lalawogon sa kahihibi; naghubag an sakong mga mata,

¹⁷alagad dai ako nagkasala nin anoman na kadahasan, asin mayong pagsagin-sagin an sakong pamibi.

¹⁸“O daga, hare pagtagoa an mga karatan na ginibo sako! Hare pag-ontoka an sakong inagrangay para sa katanosan!

¹⁹Maski ngunyan, uya, nasa langit an sakong saksi, asin an nagpatotoo para sako yaon sa kaitaasan.

²⁰Pinag-oolog-olog ako kan sakong mga katood; an sakong mga mata nagpapabulos nin luha sa Dios.

²¹Boot kong may makimaherak sa Dios para sako, siring sa sarong tawong nakikimaherak para sa saiyang katood.

²²Huli ta pakalihis pa nin nagkapirang taon, maduman ako sa lugar na mayo nang balikan.