Read Central Bicolano Job 17 Bible Online

Job 17 - Central Bicolano bible

Job 17

¹Ronot na an sakong espiritu. Tapos na an mga aldaw ko; andam na para sako an lulubngan.

²Minamasdan ko an mapait na pag-olog-olog sako kan gabos.

³Dai ako nagpuputik, O Dios. Akoa an sakong tataramon. Mayo nin mapatotoo sa sakong tinataram.

⁴Sinerahan mo an saindang mga isip sa pagsabot, kaya dai mo sinda papangganahon.

⁵Igwang kasabihan, na an siisay man na nagpapasaluib sa saiyang katood huli sa kwarta, magtitios huli kaiyan an saiyang mga aki.

⁶Ngunyan ginagamit kan mga tawo an kasabihan na ini laban sako; minadigdi sinda dangan linulutaban an sakong lalawogon.

⁷Nahaharap na ako huli sa kamondoan; an gabos na kabtang kan sakong hawak maniwang na siring sa anino.

⁸Minangalas kaini an mga tawong matanos, asin kinokondenar ninda ako bilang sarong bakong diosnon na tawo.

⁹An mga nagsasabing sinda iginagalang, orog na minatubod na sinda matanos.

¹⁰Alagad kun gabos sinda nagdatong dangan nagtindog sa atubangan ko, mayo akong makukuang maski saro na madonong sa sainda.

¹¹“Lihis na an sakong mga aldaw; dai naotob an sakong mga plano; nawara an sakong paglaom.

¹²Alagad an sakong mga katood nagsasabi na an banggi, aldaw; na madali nang magliwanag, alagad aram kong padagos akong nasa kadikloman.

¹³An natatada kong paglaom iyo an kinaban kan mga gadan, saen mahigda ako sa pagkatorog sa kadikloman.

¹⁴Aapodon kong ama an lulubngan, asin an mga ulod na nagkakakan sako aapodon ko na sakong ina saka mga babaeng tugang.

¹⁵Haen kun siring an sakong paglaom? Siisay an nakakahiling kaiyan para sako?

¹⁶Dai maiba sako an paglaom sa panahon na maghilig ako sa kinaban kan mga gadan.”