Read Central Bicolano Job 18 Bible Online

Job 18 - Central Bicolano bible

Job 18

¹Dangan nagsimbag si Bildad na Suhita:

²“Dai na daw maalo an mga tawong siring saimo, Job? Kun magdangog ka, pwede kitang mag-orolay.

³Tadaw ta iniisip mong mga mangmang kami siring sa mga hayop?

⁴Ika man sana an nakukulogan sa saimong kaanggotan. Mawawaraan daw nin mga nag-eerok an daga huli ta ika naaanggot? Hihiroon daw nin Dios an kabukidan huli sana saimo?

⁵“Papalsokon man giraray an ilaw kan maraot; an laad kan saiyang kalayo dai na magliliwanag.

⁶Magdidiklom an ilawan sa saiyang tolda.

⁷Pinahalipot an mga pusog niyang mga lakad asin an saiyang mga plano iyo an malampog saiya.

⁸Huli ta dinadara siya sa hikot kan saiya man sanang bitis, asin naglalakaw siya pasiring sa kalot.

⁹Matutongtongan niya an sarong litag, sarong siod an madakop saiya.

¹⁰Sarong litag para saiya an tinago sa daga; sarong siod an ibinugtak sa saiyang agihan.

¹¹“Sa palibot niya naghahalat an kahandalan; nagsusunod ini saiya saen man siya magduman.

¹²Dati siyang mayaman, alagad nagugutom siya ngunyan; an kapahamakan danay na nakaamba asin naghahalat sa kataed niya.

¹³Sarong nakakagadan na helang an naglalakop sa bilog niyang hawak, na nakakapalapa kan mga kamot saka mga bitis niya.

¹⁴Hinale siya sa tolda na saiyang sinarigan, dangan dinara sa hade nin kahandalan.

¹⁵Nag-eerok sa saiyang tolda an bako niyang kadugo— pakatapos na mawirikan asin malinigan iyan nin asupre.

¹⁶Naaalang an saiyang mga gamot, asin an saiyang mga sanga naluluyos.

¹⁷Napapara sa kinaban an saiyang dangog, an saiyang ngaran dai na magigiromdoman.

¹⁸Aalawon siya paluwas sa daga kan mga nabubuhay, aalawon hale sa liwanag pasiring sa kadikloman.

¹⁹Mayo siya nin aki o kapagarakian sa tahaw nin saiyang banwaan; mayong natadang buhay sa dati niyang erokan.

²⁰Pinagtatarakigan an gabos na nakakadangog kan nangyari saiya, magpoon sa sirangan sagkod sa solnopan.

²¹Iyan an nangyayari sa mga maraot, sa mga dai nagmimidbid sa Dios.”