Read Central Bicolano Job 19 Bible Online

Job 19 - Central Bicolano bible

Job 19

¹Dangan nagsimbag si Job:

²“Sagkod nuarin ako nindo papasakitan asin roronoton huli sa tataramon?

³Makasampolong beses na nindo akong tinuyaw; dai daw kamo nasosopog sa pagraot nindo sako?

⁴Kun totoo man na ako nagkasala, nadadamay daw kamo?

⁵Naghohona kamo na orog kamong marahay asin na an sakong kasakitan nagpapatotoo kan sakong kasalan.

⁶Dai nindo nahihiling na an Dios an kaggibo kaini? Nagbugtak siya nin siod tanganing dakopon ako.

⁷Ikinukurahaw ko an saiyang ginibong kadahasan, alagad mayo nin nagdadangog; mayong naghihinanyog kan inagrangay ko para sa katanosan.

⁸Sinerahan nin Dios an dalan, asin dai ako nakakaagi; tinahoban niya nin kadikloman an sakong agihan.

⁹Kinua niya sako an gabos kong kayamanan saka rinaot an sakong ngaran.

¹⁰Hinahampak niya ako saen man na gilid. Garo kahoy na ginabot niya an sakong paglaom dangan binayaan akong maalang asin magadan.

¹¹Pinalaad niya an saiyang kaanggotan laban sako, asin ibinilang niya akong kaiwal.

¹²Pinapadara niya an saiyang hukbo tanganing salakayon ako; nagkampo sinda dangan pinalibotan an sakong tolda tanganing salakayon.

¹³“Ginibo nin Dios na isikwal ako kan sakong mga tugang; para sa mga nakamidbid sako, ako nagin sarong dayuhan.

¹⁴Mayo na an sakong mga kadugo saka mga katood.

¹⁵Nalingawan na ako kan mga pinadagos ko sa sakong harong; garo sarong dayuhan saka nakikihimanwa an pagmidbid sako kan mga sorogoon kong babae.

¹⁶Kun inaapod ko an sakong sorogoon, dai niya ako sinisimbag— maski kun nakikimaherak akong tabangan niya ako.

¹⁷An parong ko, dai natatagalan kan sakong agom; dai na minadolok sako an mga tugang ko.

¹⁸Binabasang-basang ako maski kan mga sadit na aki; kun minatindog ako, nag-orolay sinda laban sako.

¹⁹Nauuyam sako an mga katood ko na haraning marahay sa puso ko; kinalaban ako kan mga namomotan ko.

²⁰An sakong mga tolang nagdurukot sa sakong kublit saka laman; asin dikit na sanang dai ko ikinaligtas an sakong buhay.

²¹Kaherakan nindo ako, kaherakan nindo ako, o mga katood ko, huli ta hinampak ako kan kamot nin Dios!

²²Tadaw ta kaipuhan pasakitan nindo ako siring kan ginigibo nin Dios? Kulang pa daw an pasakit na ginibo nindo?

²³“Mawot kong nasusurat an sakong mga tataramon, na nasusurat sa sarong libro!

²⁴Sa paagi nin tigib ikaukit logod iyan sa gapo asin ikasurat tanganing magdanay sagkod lamang.

²⁵“Huli ta aram kong an sakong Paratubos nabubuhay, na sa kahuri-hurihi madatong tanganing sorogon ako.

²⁶Maski pakatapos na tunawon nin helang an sakong kublit, mantang yaon pa sa hawak na ini mahihiling ko an Dios.

²⁷Mahihiling ko siya, asin dai na siya magigin dayuhan. “Nanluluya an sakong boot huli ta nagsabi kamo,

²⁸‘Paano ta daw siya mapapasakitan?’ Naghanap kamo nin dahelan tanganing salakayon ako.

²⁹Alagad ngunyan, matakot kamo sa espada— an espada na nagdadara kan kaanggotan nin Dios sa kasalan, tanganing maaraman nindo na igwa nin sarong naghuhukom.”