Read Central Bicolano Job 2 Bible Online

Job 2 - Central Bicolano bible

Job 2

¹Pag-abot kan aldaw na maatubang giraray sa Kagurangnan an langitnon na mga linalang, yaon man duman si Satanas sa kaibahan ninda.

²Hinapot siya nin Kagurangnan, “Saen ka nagparaduman?” Nagsimbag si Satanas, “Nagparalakaw ako sa bilog na kinaban; maski saen ako nakaduman.”

³Naghapot giraray an Kagurangnan, “Nanumpongan mo si Job na sakong sorogoon? Mayong makakaarog saiya sa kinaban sa kaimbodan asin sa katanosan. Nagsasamba siya sako asin naglilikay sa paggibo nin maraot. Dinagka mo akong tugotan taka na salakayon siya maski mayo nin dahelan, alagad siring sa dati, maimbod pa giraray siya.”

⁴Nagsimbag si Satanas, “Itatao nin tawo an gabos tanganing mabuhay sana.

⁵Alagad kulogon mo an saiyang hawak asin mamaldisyonon ka niya!”

⁶Kaya sinabihan nin Kagurangnan si Satanas, “Ibinubugtak ko siya sa saimong kapangyarihan, alagad dai mo siya paggadanon.”

⁷Kaya naghale si Satanas sa atubang nin Kagurangnan asin pinano niya nin mga gatok an bilog na hawak ni Job.

⁸Dangan nagkua si Job nin sarong pedaso kan pasang koron tanganing kagawon an saiyang mga lugad asin nagtukaw siya sa tambak nin abo.

⁹Sinabihan siya kan saiyang agom, “Sagkod ngunyan, maimbod ka pa giraray sa Dios? Maldisyonon mo siya, asin magadan ka na!”

¹⁰Nagsimbag si Job, “Garo ka lolong na babae kun magtaram! Tama daw na an marahay sana an akoon ta sa kamot nin Dios asin dai kita mag-ako nin kasakitan?” Maski nangyari ining kasakitan ki Job, mayo siyang sinabi na tumang sa Dios.

¹¹Kan maaraman kan tolong katood ni Job an gabos na karatan na nag-abot saiya, dinalaw ninda siya. An tolong ini iyo si Elifaz na hale sa syudad nin Teman, si Bildad na hale sa daga nin Sua, asin si Zofar na hale sa daga nin Naama. Nagkaoroyon sindang magdalaw ki Job tanganing rangahon ini.

¹²Harayo pa sinda, nahiling na ninda si Job, alagad dai ninda namidbidan. Kan mamidbid na ninda siya, naghiribi asin nagharaya sinda. Ginirisi ninda an saindang gubing sa kamondoan dangan nagpatoron nin alpog sa itaas saka sa saindang payo.

¹³Dangan nagturukaw sinda sa kaibahan ni Job sa laog nin pitong aldaw asin banggi; dai sinda nagtaram nin anoman saiya, huli ta nahiling ninda na makuri an saiyang pagtios.