Read Central Bicolano Job 20 Bible Online

Job 20 - Central Bicolano bible

Job 20

¹Dangan nagsimbag si Zofar na Naamatita:

²“Pinapaanggot mo ako, Job. Dai ko na mapupugolan an pagsimbag saimo.

³Sarong insulto an sinabi mo, alagad aram ko kun paano an pagsimbag saimo.

⁴Dai mo pa ini naaaraman sa mga kasuanoy, poon na ibugtak an tawo sa ibabaw nin daga,

⁵na an kaogmahan kan maraot dai naghahaloy, asin an kaogmahan kan mga mayong Dios halipot?

⁶Maski an saiyang langkaw makaabot sa kalangitan, asin an saiyang payo makaabot sa mga panganoron,

⁷arog kan saiyang odo, mawawara siya sagkod lamang. Hahanapon siya kan mga nakakamidbid saiya, alagad dai siya ninda makukua.

⁸Mawawara siya siring sa pangatorogan, siring sa sarong bisyon sa banggi, asin dai na mahihiling giraray.

⁹Mawawara siya sa lugar na dati niyang erokan;

¹⁰an saiyang mga aki an magbabayad kan saiyang mga hinabon sa mga dukha.

¹¹Dating hoben saka makosog an saiyang hawak, alagad madali na iyan na magin alpog.

¹²“Marahay an namit kan karatan para saiya kaya tinago niya an iba kaiyan sa irarom kan saiyang dila,

¹⁴alagad an kakanon nagin mapait sa saiyang tulak, mapait siring sa arin man na hudong.

¹⁵Isinusuka kan maraot an kayamanan na saiyang hinabon; binabawi iyan nin Dios, maski nasa tulak na niya.

¹⁶An hinahalon kan maraot garo man sana hudong; ginagadan siya kaiyan siring sa makamandag na halas.

¹⁷Dai siya makakaligtas tanganing mahiling an mga salog nin lanang oliba o an mga sapa na nagbubulos nin gatas saka dugos.

¹⁸Ibabalik niya an bunga kan saiyang kapagalan, asin dai niya mahahalon iyan; an ganansya kan saiyang negosyo dai niya mapapakinabangan,

¹⁹huli ta inapi niya saka pinabayaan an mga dukha, asin an bako niyang harong sinadiri niya.

²⁰Huli ta mayong kapahingaloan an saiyang kapasloan, ngapit mayong matatada sa saiyang nawiwilihan.

²¹Mayong natatada pakatapos niyang magkakan; kaya an saiyang kauswagan dai magdadanay.

²²Sa kapanoan kan saiyang kauswagan, maroronot siya kan gabos na gabat nin kamondoan.

²³Pakakana siya kan gabos niyang mawoton! Papadusahan siya nin Dios sa saiyang kaanggotan saka kadagitan.

²⁴Kun magdulag siya sa lansang na espada, bronseng bosog an magadan saiya.

²⁵Malagbas sa saiyang hawak an bosog; an nagkikinang na poro kaiyan magtatagdo nin dugo, asin maabot saiya an takot.

²⁶An gabos niyang kayamanan mawawara; susuloon siya asin an saiyang pamilya kan kalayong bakong tawo an nagpagkot.

²⁷Ihahayag kan kalangitan an saiyang mga kasalan, asin matindog laban saiya an kinaban.

²⁸Mawawara an gabos niyang pagsadiri, na kukuahon saiya sa aldaw kan kaanggotan nin Dios.

²⁹“Iyo ini an palad kan mga maraot, an pamanang itinalaan para sainda nin Dios.”