Read Central Bicolano Job 21 Bible Online

Job 21 - Central Bicolano bible

Job 21

¹Dangan nagsimbag si Job:

²“Dangoga an sakong sasabihon; iyan sana an karangahan na hinahagad ko saindo.

³Tawe ako nin panahon na makapagtaram, dangan pakatapos, tuyatuyaon na ako nindo kun boot nindo.

⁴“Dai man ako nagrereklamo laban sa tawo; igwa ako nin dahelan kun tadaw ta dai ako nakakatios.

⁵Hilinga nindo ako. Bakong an nahihiling nindo tama nang magpangalas saindo?

⁶Kun iniisip ko iyan, nanluluya an sakong boot, asin tinatakigan an sakong laman.

⁷“Tadaw ta itinutugot nin Dios na mabuhay an mga maraot, maggurang saka mag-uswag sa kapangyarihan?

⁸Nagkakaigwa sinda nin mga aki saka makoapo, na saindang namamasdan na nagdadarakula.

⁹An saindang mga harong ligtas sa katakotan, asin mayo diyan an padusa nin Dios.

¹⁰An saindang mga torong baka nakakamaro asin an saindang mga babaeng baka dai nadidipisilan sa pag-ogbon.

¹¹An saindang mga aki nagdadaralagan saka nagkakarawat na garo mga kordero;

¹²maogmang nagsasayaw sinda sa tugtog nin mga plauta.

¹³Namumuhay sinda sa kauswagan asin matoninong na nagagadan.

¹⁴“Sinasabihan ninda an Dios, ‘Humale ka samo. Dai nyamo mawot na maaraman an saimong kabotan.

¹⁵Ano an Makakamhan, ta samo siyang paglingkodan? Ano an pakinabang nyamo kun siya samong pagpamibian?

¹⁶Naghohona sinda na nag-uswag sinda huli kan saindang kapagalan, alagad dai ko maaako an saindang kaisipan.

¹⁷“Pirang beses nang pinalsok an ilaw kan maraot? May napahamak na daw maski saro sainda? Pinadusahan na daw nin Dios sa saiyang kaanggotan an mga maraot,

¹⁸asin hinayop sinda paharayo arog sa dagaming pinapadpad kan doros, o arog sa ata na dinadara kan bagyo?

¹⁹“Sinasabi nindong pinapadusahan nin Dios an aki huli kan kasalan kan saiyang ama. Dai! Dapat padusahan nin Dios an mga nagkasala mismo; dapat na ipahiling niya na ginigibo niya iyan huli kan saindang mga kasalan.

²⁰Dapat pasanon kan mga nagkasala an saindang padusa; dapat na mamatean ninda an kaanggotan kan Makakamhan na Dios.

²¹Huli ta ano pa an pakilabot ninda sa saindang mga pamilya kun sinda magadan na?

²²Pwede daw tukdoan nin sarong tawo an Dios, na naghuhukom maski kaidtong mga nasa halangkaw na mga lugar?

²³“May mga tawong dai naghehelang sagkod sa aldaw na sinda magadan; nagagadan sindang maogma saka mayong kahandalan, an saindang mga hawak nagpapatunay na dakul sindang pagkakan.

²⁵An iba nagagadan na may kapaitan sa saindang kalag, na dai lamang nakanamit nin kaogmahan.

²⁶Alagad an gabos nagagadan dangan ilinulubong; tinatahoban sinda nin mga ulod.

²⁷“Uya, aram ko an saindong mga iniisip, asin an saindong mga plano sa pagpakaraot sako.

²⁸Naghahapot kamo, ‘Haen na ngunyan an harong kan dakulang tawo, an tawong naggibo nin karatan?’

²⁹“Dai kamo naghapot sa mga tawong nagbabaklay? Dai nindo aram an mga baretang dara ninda pagbalik?

³⁰Sa aldaw na anggot an Dios asin nagpapadusa, an mga maraot an danay na nakakaligtas.

³¹Mayong siisay man na masumbong laban sa tawong maraot, o mabalos saiya huli kan saiyang ginibo.

³²Kun siya dinadara na sa lulubngan, sa saiyang pantyon igwa nin bantay.

³³Kadakul na tawo an nakikipaglubong, asin maski an daga luway-luway na minatahob kan saiyang bangkay.

³⁴“Kun siring, paano nindo ako mararanga kan mga tataramon na mayo nin kahulogan? An lambang simbag na itinatao nindo gabos kaputikan!”