Read Central Bicolano Job 22 Bible Online

Job 22 - Central Bicolano bible

Job 22

¹Dangan nagsimbag si Elifaz na Temanita:

²“Pwede daw na magkaigwa nin pakinabang an Dios sa tawo? An sarong madonong may pakinabang sa saiya man sana.

³Kaogmahan daw kan Makakamhan kun ika matanos, o may pakinabang daw siya kun gibohon mong matanos an saimong buhay?

⁴Huli daw ta natatakot ka saiya, kun kaya ka niya sinasagwe, asin dinadara sa hukoman?

⁵Bakong dakula nin marahay an saimong karatan? Mayo nin kataposan an saimong mga kasalan.

⁶Hinubaan mo nin gubing an saimong tugang bilang kabayadan ninda saimo kan kwartang inutang.

⁷Dai mo pinainom nin tubig an mga napapagal, asin dai mo pinakakan an mga nagugutom.

⁸Ginamit mo an saimong kapangyarihan asin katongdan tanganing masakop an bilog na daga.

⁹Isinubol mong mayo nin dara an mga babaeng balo, asin hinabonan saka inapi mo an mga ilo.

¹⁰Kaya ngunyan mga siod an nasa palibot mo, dangan bigla na sanang minaabot an takot saimo;

¹¹nagdiklom an saimong ilaw, kaya dai ka na nakakahiling, asin nalalantopan ka nin baha.

¹²“Bakong an Dios nasa itaas kan kalangitan asin pinagdudungawan an mga bitoon, maski ngani an mga ini haralangkaw?

¹³Alagad minahapot ka, ‘Ano an naaaraman nin Dios? Natatahoban siya kan mga panganoron—paano siya makakahukom sato?’

¹⁴Naghohona kang huli sa mahibog na mga panganoron, dai na siya makakahiling, mantang naglalakaw siya sa pagultanan kan daga saka langit.

¹⁵“Magpapadagos ka daw sa paglakaw sa daan na dalan na linakawan kan mga maraot na tawo?

¹⁶Bago nag-abot an saindang panahon, inanod sinda kan sarong baha.

¹⁷Iyo ini an mga tawong nagsikwal sa Dios asin nagtubod na mayo siyang magigibo sainda.

¹⁸Alagad an Dios an nagpayaman sainda— dai ko nanggad malaladop an kasisipan kan mga maraot.

¹⁹Naoogma an mga matanos asin nagngingisi an mga mayong sala kun nahihiling nindang pinapadusahan an mga maraot.

²⁰Rinaraot an gabos na pagsadiri kan mga maraot asin an anoman na matada sinusulo kan kalayo.

²¹“Makipag-oyon ka sa Dios, asin makipagtoninong; sa siring na paagi maabot saimo an karahayan.

²²Akoa an itinatao niyang katukdoan; rimposa sa saimong puso an saiyang mga tataramon.

²³Kaipuhan na magbalik ka sa Dios sa kapakumbabaan asin ontokon mo an gabos na karatan na ginigibo sa saimong harong.

²⁴Tapokan an saimong bulawan; an bulawan nin Ofir iula mo sa nagmarang salog.

²⁵An Makakamhan na Dios iyo logod an magin bulawan mo saka mahalaga mong plata.

²⁶Dangan danay kang mananarig sa Dios asin maaaraman mong siya an ginigikanan kan saimong kaogmahan.

²⁷Kun ika mamibi, masimbag siya saimo, dangan ootobon mo an mga panugang saimong ginibo.

²⁸Sa gabos mong gibo, magkakaigwa ka nin kauswagan, asin magliliwanag an ilaw sa saimong dalan.

²⁹Ibinababa nin Dios an mga mapalangkaw alagad iliniligtas niya an mga mapakumbaba.

³⁰Ililigtas ka niya kun ika mayong sala, kun matanos an saimong ginigibo.