Read Central Bicolano Job 24 Bible Online

Job 24 - Central Bicolano bible

Job 24

¹“Tadaw ta dai magtalaan an Dios nin panahon sa paghukom, sarong aldaw nin katanosan para sa mga naglilingkod saiya?

²“Hinihiro nin mga tawo an mga muhon tanganing magdakula an saindang daga; hinahabon ninda an karnero nin ibang tawo asin inaayon sa mga hayop ninda.

³Kinukua ninda an mga asno kan mga ilo, asin kinukua ninda an baka kan babaeng balo, sagkod na mabayadan kaini an utang.

⁴Inoolang ninda an mga dukha sa saindang mga deretso; kaya nagtarago gabos an mga mayong sukat.

⁵“Arog sa mga lalaw na asno, an mga dukha naghahanap nin pagkakan sa kalangtadan; mayo sinda nin ibang lugar na makukuahan nin pagkakan para sa saindang kaakian.

⁶Kaipuhan makiani sinda sa mga oma na bako ninda, asin gumuno nin mga ubas sa ubasan nin mga maraot na tawo.

⁷Nagkakatorog sinda sa bilog na banggi na mayo nin gubing, mayo nin tamong para sa lipot.

⁸Nadudumog sinda kan uran na minahugpa sa kabukidan, asin minapaili sa sirong kan kagapoan.

⁹“May mga tawong minaagaw kan mga ilo sa ama sa daghan kan saindang ina; kinukua ninda bilang kabayadan nin utang an mga aki kan mga mayong sukat.

¹⁰Minalakaw na huba, mayong gubing an mga dukha; nagugutom, mantang an inaning trigo pasan ninda.

¹¹Sa mga kaolibahan kan mga maraot nagigibo sinda nin lana; nagpupuga sinda kan mga ubas, alagad nagtitios sinda nin paha.

¹²Hale sa mga syudad, nag-aagrangay an mga nalugadan asin naghihingagdan, alagad dai dinadangog nin Dios an saindang mga pamibi.

¹³“May mga tawong minasikwal sa liwanag; dai ninda iyan nasasabotan asin dai naglalakaw sa dalan na itinutukdo kaiyan.

¹⁴Pagkaaga, minabangon an paragadan tanganing gadanon an dukha saka mayong sukat; pagkabanggi, nakakaagid siya sa sarong mahabon.

¹⁵An lalaking paradorog sa bako niyang agom naghahalat kan pagdiklom, nagsasabing, ‘Mayo nin makakahiling sako’; asin tinatahoban an saiyang lalawogon.

¹⁶Kun banggi, an mga parahabon minalaog sa mga harong kun aldaw, nagtatago sinda asin linilikayan an liwanag.

¹⁷Huli ta an banggi aldaw para sa sainda gabos; katood sinda kan mga kinatatakotan sa kadikloman.”

¹⁸“Sinasabi mo, ‘Inaanod kan baha an mga maraot, minamaldisyon an saindang kahirasan digdi sa daga; dai na siya nagtatrabaho sa saiyang ubasan.

¹⁹Siring na an nyebe pinapara kan init, siring man an parakasala pinapara sa daga kan mga buhay.

²⁰Maski an sadiri niyang ina dai na nakakagiromdom saiya ngunyan; kinakakan siya kan mga ulod asin rinoronot siring sa sarong kahoy na napukan.

²¹Nangyari iyan huli ta dai niya ginalangan an mga babaeng balo, asin dai niya naherakan an mga babaeng baog.

²²Alagad rinaraot nin Dios an buhay kan mga mapangyari huli kan saiyang kapangyarihan; minahiro an Dios—asin nagagadan an tampalasan.

²³Pwedeng tugotan nin Dios na mabuhay sindang matiwasay, alagad an saiyang mga mata nasa pagmasid kan saindang mga dalan.

²⁴Ilinalangkaw sinda sa halipot na panahon, dangan nawawara; naluluyos sinda asin nawawara siring sa mga doot, siring sa ohoy nin trigo na pinutol.

²⁵Kun bako iyan totoo, siisay an mapatunay na nagpuputik ako, asin siisay an makakapahayag na mayo nin kahulogan an sinasabi ko?”