Read Central Bicolano Job 26 Bible Online

Job 26 - Central Bicolano bible

Job 26

¹Dangan nagsimbag si Job:

²“Natabangan mo nanggad an tawong mayo nin kapangyarihan! Linigtas mo an maluya!

³Hinatolan mo an tawong mayo nin kadonongan, asin ipinahayag mo an tunay na pakaaram!

⁴Siisay sa paghona mo an madangog kan saimong mga tataramon? Siisay an nagpasabong saimo na magtaram nin siring?”

⁵“An espiritu kan mga gadan tinatakigan sa katubigan sa irarom kan daga.

⁶An kinaban kan mga gadan huba sa atubang nin Dios; mayo nin nakakatahob kaiyan sa panhiling niya.

⁷Biniklad nin Dios an langit sa amihan dangan saiyang binitay an daga sa tahaw kan kahiwasan.

⁸Pinapano niya nin katubigan an mahibog na mga panganoron, asin dai ini nagigisi sa gabat kaiyan.

⁹Tinatahoban niya an lalawogon kan bulan, asin sa ibabaw kaiyan binibiklad niya an panganoron.

¹⁰Linaen niya an liwanag sa kadikloman huli sa sarong bilog na saiyang ginibo sa ibabaw kan katubigan.

¹¹Sa saiyang pagsagwe, an mga harigi nin kalangitan tinatakigan.

¹²Huli kan saiyang kapangyarihan, napatoninong an dagat; huli kan saiyang pakasabot, an impaktong si Rahab nagadan.

¹³An saiyang hinangos nakapalinaw kan kalangitan; ginadan kan kamot niya an nagdudulag na halas.

¹⁴Alagad an mga ini sadit sanang kabtang kan saiyang kakayahan, mga hininghing sana na satong nadangog. Siisay an makakasabot kan kadakulaan kan saiyang kapangyarihan?”