Read Central Bicolano Job 27 Bible Online

Job 27 - Central Bicolano bible

Job 27

¹Dangan pinadagos ni Job an saiyang pagtaram:

²“Siring na buhay an Makakamhan na Dios, na naghale kan sakong deretso, asin nagpapait kan sakong buhay—

³mantang igwa ako nin buhay, asin an hinangos nin Dios nasa sakong dungo;

⁴an sakong mga ngabil dai masambit nin ano man na karatan, asin an sakong dila dai magsasabi nin kaputikan.

⁵Dai man logod mangyari sako na ako magsabi na kamo tama; danay kong sasabihon na mayo akong sala sagkod sa aldaw na ako magadan.

⁶Mamomogol ako sa sakong katanosan, asin dai ko iyan bubutasan; dai ako tutuyawon kan sakong konsyensya mantang ako nabubuhay.

⁷“Magin siring logod sa mga maraot an sakong kaiwal, asin sa bakong matanos an mga minatindog laban sako.

⁸Huli ta ano an paglaom kan mga mayong Dios kun bawion na sainda nin Dios an saindang buhay?

⁹Madadangog daw nin Dios an saindang inagrangay, kun dumatong sainda an kasakitan?

¹⁰Mag-oogma daw sinda sa Makakamhan? Mag-aapod daw sinda sa Dios sa gabos na panahon?

¹¹“Tutukdoan ko kamo kun gurano kadakula an kapangyarihan nin Dios, asin ipapaliwanag ko saindo an plano kan Makakamhan na Dios.

¹²Uya, kamo gabos nakahiling na kaiyan; tadaw ta nagtataram kamo nin basang sana?”

¹³“Siring kaini an pagpapadusa kan Makakamhan na Dios sa mga maraot, saka madadahas na tawo.

¹⁴Kun magdakul an saiyang mga aking lalaki, magagadan sinda gabos sa gera; an saiyang mga aki magkukulang nin pagkakan.

¹⁵An mga matada magagadan sa helang, asin dai sinda pagtatangisan kan saindang mga agom.

¹⁶Maski magtambak pa an mga maraot nin plata siring sa tambak nin alpog, asin magkaigwa man nin mga gubing siring kadakul sa laboy;

¹⁷alagad an matanos an masulot kaiyan, asin babangaon kan mga mayong sala an saindang plata.

¹⁸An harong na saindang pinapatindog arog sa harong nin sarong lawa, siring sa payag na ginigibo nin parabantay sa oma.

¹⁹Mayaman sindang minakatorog, alagad dai na iyan mangyayari giraray; sa saindang pagmata, mayo na an saindang kayamanan.

²⁰Maabot sainda an mga katakotan siring sa sarong baha; pagkabanggi, dadarahon sinda nin sarong aripuros.

²¹Bubuhaton sinda kan amihan na doros asin mawawara sinda, sisighidon paluwas sa saindang harong.

²²Mayong herak na hohoyopon sinda kan doros mantang naghihingowa sindang makadulag.

²³Naghahagubohob sainda an doros mantang sinda nagdadaralagan, tinatakot sinda huli sa nakakagadan na kapangyarihan kaiyan.