Read Central Bicolano Job 28 Bible Online

Job 28 - Central Bicolano bible

Job 28

¹“Sa katunayan igwa nin mina nin plata, asin nin lugar saen linilinigan an bulawan.

²Kinukua hale sa daga an lansang asin an bronse hale sa gapo na tinutunaw.

³An diklom sa kairaroman sinisiyasat nin mga tawo. Sinisiyasat ninda an kairaroman kan daga asin nagkakalot sinda nin mga gapo sa kadikloman.

⁴Harayo sa pinag-eerokan nin mga tawo o sa lugar na dai pa lamang nabatoyan nin mga bitis, nagmimina an mga tawo. Mamondong nagtatrabaho sinda duman, nagkukulambitay sa mga lubid sa laog kan mga kalot.

⁵Nagtatalubo sa daga an pagkakan, alagad an irarom kaiyan garo binukag nin kalayo.

⁶An mga gapo kan daga igwa nin mga sapiro asin an mga alpog igwa nin bulawan.

⁷Mayong gamgam na nakakaaram kan dalan pasiring sa mina, asin mayo lamang nin bwitre na minalayog sa itaas kaiyan.

⁸Mayo pang leon o ibang lalaw na hayop na nag-agi sa mapungaw na mga dalan na idto.

⁹“Kinakalot nin tawo an pinakamatagas na gapo, asin kinakalot an kabukidan magpoon sa pamitisan.

¹⁰Minagibo sinda nin mga agihan sa mga gapo, asin nahihiling kan saindang mga mata an lambang mahalagang bagay.

¹¹Sinulat ninda an mga ginigikanan kan mga katubigan, tanganing dai na magtagdo, asin dinadara ninda sa liwanag an bagay na natatago.

¹²Alagad saen makukua an kadonongan? Saen kita makakanood nin pakasabot?

¹³“Dai naaaraman nin tawo an halaga nin kadonongan, asin dai iyan nanunumpongan sa daga kan mga nabubuhay.

¹⁴‘Mayo iyan sako,’ an sabi kan kairaroman, ‘Mayo man iyan sako,’ an sabi kan kadagatan.

¹⁵Dai iyan mababakal nin plata o bulawan.

¹⁶An halaga kan kadonongan dai mapapantayan kan pinakapurong bulawan o alahas.

¹⁷An kadonongan mas mahalaga ki sa bulawan, ki sa bulawan na plorera o sa pinakamarahay na salming.

¹⁸An halaga kan kadonongan orog ki sa koral, o sa kristal, o sa mga perlas.

¹⁹An topasyo nin Etiopia dai pwedeng iagid sa kadonongan ni an pinakapurong bulawan.

²⁰“Haen, kun siring, an ginigikanan nin kadonongan? Haen an lugar nin pakasabot?

²¹Mayo pang nabubuhay na nakahiling kaiyan, maski an naglalayog na mga gamgam.

²²An Pagkaraot saka an Kagadanan nagsabi, ‘Huring-huding sana an nadangog nyamo dapit kaiyan.’

²³“An Dios sana an nakakaaram kan dalan, asin siya an tatao kun saen makukua an kadonongan.

²⁴Huli ta nahihiling niya an mga poro kan kinaban, asin an gabos na nasa irarom kan kalangitan.

²⁵Kan itao nin Dios sa doros an kapangyarihan kaiyan asin itinalaan an sukol kan katubigan;

²⁶kan maggibo siya nin sarong pagboot para sa uran, asin nin dalan para sa kikilat;

²⁷dangan niya nahiling an kadonongan saka nabalo an halaga kaiyan— naoyonan niya an kadonongan.

²⁸“Sinabihan nin Dios an mga tawo, ‘Uya, an pagkaigwa nin takot sa Kagurangnan iyo an kadonongan. An pagtalikod sa karatan iyo an pakasabot.’”