Read Central Bicolano Job 29 Bible Online

Job 29 - Central Bicolano bible

Job 29

¹Dangan pinadagos ni Job an saiyang pagtaram:

²“Kun ikakabalik ko sana an nakaaging mga aldaw, mga aldaw kan an Dios ako inaataman;

³kan an saiyang ilaw iyo an nagliliwanag kan ako naglakaw sa kadikloman;

⁴mga aldaw kan ako nasa kauswagan, kan an pakipagkatood nin Dios nasa sakong harong.

⁵An Makakamhan na Dios yaon kaidto sa kaibahan ko, asin nakapalibot sako an gabos kong kaakian.

⁶Dakul na gatas an itinao sako kan sakong mga kanding saka baka, asin sa magapong daga nagtalubo an sakong mga oliba.

⁷Kun minatiripon an mga magurang kan syudad, asin minatukaw ako sa kaibahan ninda,

⁸minagilid an mga hoben na lalaki pakahiling ninda sako, dangan minatindog an mga gurang sa paggalang sako.

⁹Minaontok sa pagtaram an mga lider kan banwaan;

¹⁰maski an darakulang tawo minaalo.

¹¹“Gabos na nakahiling asin nakadangog sako minasabing paladan ako.

¹²Minatabang ako sa mga dukha, kun sinda minaagrangay; minatabang ako sa mga ilo na mayo nin makikilingan.

¹³Benebendisyonan ako kan tawong madali nang magadan, asin ginigibo kong mag-awit sa kaogmahan an babaeng balo.

¹⁴Isinulot ko an katanosan, asin nagubingan ako kaiyan; an sakong hustisya nakakaagid sa sarong abito saka sarong turban.

¹⁵Ako an nagin mata kan buta asin an nagin mga bitis kan pilay.

¹⁶Ako an nagin ama kan dukha, asin kinampihan ko an dayuhan sa saiyang kasakitan.

¹⁷Rinaot ko an kapangyarihan kan makuring mga tawo, asin ilinigtas ko an saindang mga biktima.

¹⁸“Danay akong naglaom na mabuhay nin halawig dangan magadan sa sadiring harong sa karangahan.

¹⁹Arog ako sa sarong kahoy na an mga gamot danay na may tubig, na an mga sanga bilog na bangging igwa nin ambon.

²⁰Danay akong inoomaw kan lambang saro asin dai ako ipinasopog kan sakong kosog.

²¹Kun minatao ako nin hatol, an mga tawo minaalo, asin maigot na minadangog sa sinasabi ko;

²²mayo na sindang ikinadagdag pakatapos ko. Nagsaromsom sainda siring sa uran an sakong mga tataramon;

²³inako iyan kan lambang saro siring kan pag-ako kan mga paraoma sa uran pakatapos kan tig-initan.

²⁴Hinuyuman ko sinda kan mawaraan sinda nin pagsarig; an magayagaya kong lalawogon iyo an nagpakosog kan boot ninda.

²⁵Ako an namahala saka naggibo kan mga desisyon; pinangenotan ko sinda arog kan pangengenot nin sarong hade sa saiyang hukbo, asin rinanga ko sinda sa saindang kamondoan.