Read Central Bicolano Job 3 Bible Online

Job 3 - Central Bicolano bible

Job 3

¹Pakatapos kaini, nagtaram si Job asin minaldisyon an aldaw kan siya mamundag.

²An sabi niya:

³“Maldisyona an aldaw kan ako mamundag O Dios; maldisyona an banggi kan ako ipangidam!

⁴Gibohang magin kadikloman an aldaw na idto! Dai mo na logod paggiromdomon an aldaw na idto; ni paliwanagan kan ilaw.

⁵Giboha idtong magin sarong aldaw nin kamondoan saka mahibog na kadikloman; tahobi idto nin mga panganoron, asin paraa an aldaw.

⁶Halea an bangging idto sa laog kan taon hare pagtugot na ibilang pa iyan;

⁷ibilang mong mayong namundag sa bangging idto, bangging mayo lamang nin kaogmahan.

⁸Sumpaon logod idto kan mga minasumpa kan aldaw, kan mga nakakapabangon sa Leviatan.

⁹Hare pagtugot na magliwanag saiya an bitoon na makaaga; maglaom logod iyan sa pagdatong nin liwanag, na dai nanggad madatong, ni makahiling kan pirok kan kaagahon;

¹⁰huli ta dai kaiyan sinerahan an pintoan kan tulak nin sakong ina, ni tinago sa sakong mata an kasakitan.

¹¹“Tadaw ta dai ako nagadan sa tulak nin sakong ina o nagadan pakatapos na ako mamundag?

¹²Tadaw ta inako ako kan mga tuhod nin sakong ina? Tadaw ta pinasuso niya ako sa saiyang daghan?

¹³Ta kun kaidto nagadan na ako, kutana nasa pagpahingalo na ako,

¹⁴nagkakatorog siring sa mga hade asin mga parahatol kan kinaban, na nagpatindog giraray kan suanoy na mga erokan.

¹⁵Kutana nagkakatorog ako siring sa mga prinsipe, na nagpano kan saindang mga harong nin bulawan saka plata,

¹⁶o nagkakatorog arog sa sarong aking gadan nang namundag.

¹⁷Sa lulubngan minaontok kan saindang karatan an maraot asin nagkakaigwa nin pahingalo an mga napapagal.

¹⁸Duman nagkakaigwa nin katoninongan an mga bilanggo, ligtas sa mga kurahaw asin magabat na mga pagboot.

¹⁹An sadit asin an dakula yaon man duman, asin an oripon talingkas sa saiyang kagurangnan.

²⁰“Tadaw ta itinutugot mong padagos na mabuhay an tawo sa kasakitan? Tadaw ta tinawan mo nin liwanag an mga tawong nasa kamondoan?

²¹Hinahalat ninda an kagadanan, alagad dai iyan minadatong; mas boot pa ninda an lulubngan ki sa anoman na kayamanan.

²²Dai sinda naoogma sagkod na dai sinda nagagadan asin ilinulubong.

²³Tadaw ta itinatao an liwanag sa tawong an dalan natatago, dalan na sinerahan nin Dios?

²⁴Embes na magkakan, ako nagmomondo; asin sa pag-agrangay, dai nanggad ako napapaontok.

²⁵Gabos kong natatakotan saka nahahandalan nagkakatotoo.

²⁶Mayo akong katoninongan, mayong kapahingaloan, asin daing tapos an sakong kasakitan.”