Read Central Bicolano Job 30 Bible Online

Job 30 - Central Bicolano bible

Job 30

¹“Alagad ngunyan, pinag-oolog-olog ako kan mga lalaking mas aki pa ki sa sako! An saindang mga ama, danay na mayo nin halaga kaya dai ko sinda tinugotan na makaiba kan sakong mga ayam sa pagbantay kan sakong mga karnero.

²Ano an sakong pakinabang sa saindang kosog, sinda na mga maluya na ngunyan?

³Huli sa kadukhaan asin makuring gutom, rinarangot ninda an mga alang na gamot.

⁴Binubulnot ninda an mga tanom sa kalangtadan dangan saindang kinakakan, maski an mayong namit na gamot nin sarong kahoy!

⁵Pinapalayas sinda sa tahaw nin katawohan; kinukurahawan sinda siring sa mga mahabon.

⁶Kaipuhan na mag-erok sinda sa mga lungib sa mga labot na kinalot sa mga tampi nin mga ampas.

⁷Sa tahaw nin kalangtadan, garong mga hayop sindang nag-uungal; sa irarom nin katonokan duman sinda nagsusurosoan.

⁸Sinda sarong grupo nin mayong halaga na mga tawo, na pinalayas sa daga.

⁹“Ngunyan, ako an saindang nginingisihan, ako an ginibo nindang subahan.

¹⁰Nauuyam asin naghaharayo sinda sako; mayong pagduwa-duwang minakuspa pakahiling sako.

¹¹Huli ta pinaluya ako nin Dios dangan ibinaba, dai na sinda nag-aalangan sa sakong atubang.

¹²Sa too ko nagtitindog an grupong ini; pinapalayas ninda ako; inaandam ninda an huri nindang salakay.

¹³Inaabongan ninda an gabos kong dulagan asin hinihingowa nindang gadanon ako; mayo nin siisay man na makapugol sainda.

¹⁴Minadatong sinda na garong nag-aagi sa mahiwas na labot sa kudal; sa tahaw kan linagabong padagos sindang minadatong.

¹⁵Nadadaog ako kan mga kahandalan; arog sa doros na nag-agi an sakong onra, asin garo sarong panganoron na nawara an sakong kauswagan.

¹⁶“Ngunyan madali na akong magadan; mayo nin ranga para sa sakong kasakitan.

¹⁷Pagkabanggi, nagkukulog an gabos kong tolang; an kulog na nagpapasakit sako dai nag-oontok.

¹⁸Pinupugol ako nin Dios sa sakong kwelyo; asin ginugurumos an mga gubing ko.

¹⁹Itinatapok niya ako sa laboy asin ako nagin arog sa alpog saka abo.

²⁰“Nag-aagrangay ako saimo, O Dios, alagad dai mo ako sinisimbag; asin kun ako namimibi, dai mo ako hinihinanyog.

²¹Nagin makuri ka sa sako; sa paagi kan mapangyari mong kamot pinapasakitan mo ako.

²²Tinutugotan mong ipadpad ako kan doros; pinapalunad mo ako diyan, asin itinatapok mo sa tahaw kan makosog na bagyo.

²³Aram kong dadarahon mo ako sa sakong kagadanan, an huring padudumanan kan gabos na nabubuhay.

²⁴Alagad, an yaon sa tambak nin mga gaba dai daw maitaas kan saiyang kamot, asin sa saiyang kasakitan maghagad nin tabang?

²⁵Dai daw ako naghibi para sa tawong nasasakitan? Dai daw ako nagmondo para sa mga mayong sukat?

²⁶Alagad kan maghanap ako kan marahay, nagdatong an karatan; asin kan maghalat ako kan liwanag nag-abot an kadikloman.

²⁷An sakong puso nariribong, asin dai nanggad natotoninong; an mga aldaw nin kasakitan nagdadangadang sa pagsabat sako.

²⁸Naglalakaw akong mamondo, asin mayong kaalingan; nagtitindog ako sa tahaw nin katiriponan tanganing maghagad nin tabang.

²⁹Ako tugang na lalaki kan mga lalaw na ayam, asin danay na kaibahan kan mga darakulang gamgam.

³⁰Malalata na an sakong kublit; halangkaw nin marahay an sakong kalentura.

³¹Kun kaidto nadadangog ko an maoogmang musika, ngunyan, pagmomondo asin pagtatangis an nadadangog ko na sana.