Read Central Bicolano Job 31 Bible Online

Job 31 - Central Bicolano bible

Job 31

¹“Nanuga ako na dai nanggad ako mahiling na may karigsokan sa sarong daraga.

²Ano an sakong magigin kahirasan hale sa Dios na nasa kaitaasan, asin ano an sakong pamana sa Makakamhan?

³Bakong minaabot an kapahamakan sa mga bakong matanos, asin an kasakitan sa mga paragibo nin karatan?

⁴Bakong hinihiling niya an sakong mga dalan, asin binibilang an sakong mga lakad?

⁵“Minasumpa ako na dai ako nagin maraot asin mayo akong dinaya.

⁶Timbangon logod ako sa bakong madayang timbangan, asin maaraman logod nin Dios na mayo ako nin kasalan!

⁷Kun nagsuhay ako sa tamang dalan o nagpadagka sa karatan, kun nadigtaan an sakong kamot nin kasalan,

⁸magkararaot logod an sakong mga inani o kakanon logod nin iba an bunga kan sakong tinanom.

⁹“Kun an sakong puso nadagka sa sarong babae, asin naghipa ako sa pintoan kan sakong kataed;

¹⁰magluto logod an sakong agom para sa ibang lalaki, asin makidorog logod siya sa iba.

¹¹Huli ta iyan sarong makaoongis na karatan, sarong kasalan na dapat padusahan kan mga hukom;

¹²iyan garo kalayong nanghahalon sagkod sa Abaddon, na masulo kan gabos kong nasasadirihan.

¹³“Kun dai ko minidbid an deretso kan sakong sorogoon na babae o lalaki, kan magreklamo sinda laban sako,

¹⁴ano an magigibo ko kun maghukom na an Dios? Kun siya magsiyasat, ano an isisimbag ko saiya?

¹⁵Bakong an Dios na naglalang sako iyo man an naglalang sa sakong sorogoon? Bakong saro sana an naglalang samong duwa?

¹⁶“Dai ako nagsayuma na tabangan an dukha; dai ako nagtugot na mamuhay sa kasakitan an mga babaeng balo

¹⁷ni pinabayaan na magutom an mga ilo mantang nagkakan ako.

¹⁸Inataman ko sinda sa bilog kong pagkabuhay.

¹⁹“Kun nakakanumpong ako nin sarong nangangaipo na dai nakakabakal nin gubing,

²⁰tinatawan ko siya nin gubing na gibo sa lana, na gikan sa sadiri kong mga karnero. Dangan inoomaw niya ako sa bilog niyang puso.

²¹“Kun may dinaya akong sarong ilo, ta nahiling kong sa paaging ini manggagana ako sa husgado,

²²matanggal logod sa sakong mga abaga an sakuyang mga takyag, asin mabari logod an sakuyang takyag sa may ngalo-ngaloan.

²³Huli ta natatakot ako sa padusa nin Dios, dai ko nanggad magigibo an siring.

²⁴“Kun nagsarig ako sa bulawan o naglaom ako sa pinong bulawan;

²⁵kun nag-orgulyo ako huli ta dakul an sakong kayamanan o huli ta dakul an natipon kan sakong kamot;

²⁶kun nagsamba ako sa aldaw kan iyan nagsirang, o sa bulan na naghihiro sa kagayonan,

²⁷asin hilom na nadagka an sakong puso, patin hinadokan ko an sakong kamot sa pagtaong galang sa mga iyan;

²⁸ini man sarong kasalan na dapat padusahan kan mga hukom, huli ta dai ako nagin maimbod sa Dios na nasa kaitaasan.

²⁹“Dai ako naogma kan magtios an sakong mga kaiwal, ni nagngisi kan sinda napahamak;

³⁰dai ako nagkasala huli ta dai ko hinagad na magadan sinda.

³¹Naaaraman kan sakong mga trabahador na danay kong pinapasakat sa sakong harong an mga dayuhan.

³²Inalok ko an parabyahe na magdagos sa sakong harong; dai ko sinda pinatorog sa mga tinampo.

³³Hiningowa kan ibang tawo na itago an saindang mga kasalan, alagad dai ko ginibo iyan.

³⁴Dai ako natakot sa anoman na sasabihon kan mga tawo; dai ako nag-alo, ni nag-ontok sa laog kan harong huli ta natakot ako kan saindang pag-olog-olog.

³⁵“Igwa man logod nin magdangog sako! Minasumpa ako na totoo gabos an itinaram ko. Simbagon logod ako kan Makakamhan na Dios! “Kun yaon kuta an sumbong laban sako na sinurat kan sakong kaiwal,

³⁶may orgulyong dadarahon ko iyan sa sakong abaga; ibubugtak ko iyan sa sakong payo na garo sarong korona.

³⁷Sasambiton ko sa Dios an gabos kong gibo, asin dai ako masosopog na mag-atubang saiya.

³⁸“Kun hinabonan an daga na sakong inooma asin inagaw ko iyan sa tunay na kagsadiri—

³⁹kun sakong kinakan an bunga kan tanom na nagtalubo diyan alagad ginutom ko an mga paraoma na nagtanom kaiyan—

⁴⁰kun siring, magtalubo logod an mga tonok embes na mga trigo, asin an mga doot embes na mga sebada.” Digdi natapos an mga tataramon ni Job.