Read Central Bicolano Job 32 Bible Online

Job 32 - Central Bicolano bible

Job 32

¹Dai na nagsimbag ki Job an tolong lalaki, huli ta bilog an panarig ni Job na mayo siyang sala.

²Alagad sarong nagmamasid na an ngaran Elihu an naanggot, huli ta tinatawan ni Job nin katanosan an saiyang sadiri asin binabasol an Dios. (Si Elihu aking lalaki ni Barakel, sarong kapagarakian ni Buz, asin gikan sa kamaganakan ni Ram.)

³Anggot man siya sa tolong katood ni Job, huli ta mayo sindang ikinakasimbag maski nagpahayag sindang nasasala si Job.

⁴Si Elihu an pinakaaki sa mga yaon duman, kaya hinalat niyang makatapos sa pagtaram an gabos.

⁵Naanggot siya kan mahiling niyang dai nakasimbag ki Job an tolong lalaki,

⁶kaya nagsabi siya: “Aki pa ako, asin gurang na kamo, kaya nagduwa-duwa ako saka natakot na magpahayag kan nasa isip ko.

⁷Nagsaboot ako na kamo an dapat na magtaram, na kamo an maghiras nin kadonongan.

⁸Alagad an espiritu na yaon sa tawo, an hinangos nin Makakamhan, iyo an nagpapasabot sa tawo.

⁹Bakong an mga gurang an mga madonong, ni an mga may edad an nakakasabot kun ano an matanos.

¹⁰Kaya sinasabi ko, ‘Pagdangog kamo; pabayaan nindo ako na magpahayag kan sakong nasasabotan.’

¹¹“Maigot akong naghinanyog mantang kamo nagtataram asin naghalat mantang kamo naghahanap nin kasabihan na may kadonongan.

¹²Naghinanyog ako saindo, asin uya, mayo kamong itinaram na nagpapatunay na sala si Job, ni may nakasimbag saindo kan mga itinaram niya.

¹³Paano nindo masasabi na nakua nindo an kadonongan? Kaipuhan simbagon nin Dios si Job, huli ta dai nindo siya nasimbag.

¹⁴Kamo an kaolay ni Job, bakong ako, alagad dai ako masimbag saiya siring kan pagsimbag nindo.

¹⁵“Nadaog na sinda ni Job, dai na nakakasimbag; mayo na sindang ikinakataram.

¹⁶Mahalat pa daw ako, huli ta dai sinda nagtataram, huli ta nagtitindog sinda duman, asin dai nagsisimbag?

¹⁷Ako man an masimbag; ako man an mapahayag.

¹⁸Dai na ako makakatagal na dai magtaram. Dai ko na mapupugolan an sakong mga tataramon.

¹⁹Kun dai ako makapagtaram, maputok ako arog sa sarong laogan na anit na pano nin bagong arak.

²⁰Dai ko na matatagalan; kaipuhan magtaram ako.

²¹Mayo ako nin kakampihan ni oomawon na siisay man.

²²Dai ako tataong magtao nin bakong totoong pag-omaw, ta kun gibohon ko iyan, tibaad hidali sana akong gadanon kan sakong Kaglalang.