Read Central Bicolano Job 33 Bible Online

Job 33 - Central Bicolano bible

Job 33

¹“Alagad ngunyan, Job dangoga nin marahay an gabos kong sasabihon.

²Andam na ako sa pagtaram kan nasa isip ko.

³Tudok sa sakong puso an gabos kong tataramon, asin nagsasabi ako kan katotoohan.

⁴An espiritu nin Dios an naglalang sako asin an hinangos kan Makakamhan an nagtao sako nin buhay.

⁵“Simbaga ako kun kaya mo; pakarahaya an saimong mga itataram.

⁶Ika asin ako pareho sana sa atubang nin Dios; pareho kitang hinaman hale sa laboy.

⁷Kaya mayo nin dahelan na matakot ka sako; dai taka dadaogon.

⁸“Sa katunayan, uya an mga nadangog ko saimo:

⁹‘Malinig ako, mayo nin kasalan; dalisay ako, asin mayo nin ginibong karatan.

¹⁰Alagad nakakakuang mga dahelan an Dios tanganing salakayon ako, asin ibinibilang niya ako na sarong kaiwal.

¹¹An sakong mga bitis saiyang kinakadenahan, asin minamasdan niya an gabos kong hiro.’

¹²“Alagad sinasabihan taka, Job, nasasala ka. Mas dakula an Dios ki sa arin man na tawo.

¹³Tadaw ta nakikipasuhay ka saiya sa pagsabing, ‘Dai niya sisimbagon an arin man sa sakong tataramon?’

¹⁴Huli ta an Dios nagtataram sa saro o sa duwang paagi, maski dai iyan naaabot kan pag-isip nin tawo.

¹⁵Kun banggi mantang nagkakatorog an mga tawo, minataram an Dios sa paagi nin mga pangatorogan asin mga bisyon.

¹⁶Ipinapadangog niya sainda an mga boot niyang itaram, asin natatakot sinda sa saiyang mga patanid.

¹⁷An Dios nagtataram sainda tanganing paontokon sinda sa pagkakasala asin ilikay sinda sa pagigin mapaabaw-abaw.

¹⁸Ilinilikay niya sa kagadanan an saindang kalag, asin an saindang buhay sa pagkapahamak sa espada.

¹⁹An tawo sinasagwe nin Dios sa paagi nin helang, asin nin kulog sa saiyang mga tolang;

²⁰kaya ikinakauyam niya an tinapay, asin mayo siyang gana maski sa masiram na pagkakan.

²¹Minaniwang siya nin marahay, kaya haros nahihiling na an saiyang mga tolang;

²²madali na siyang magduman sa kinaban kan mga gadan.

²³“Tibaad may magdatong na anghel sa pagsurog saiya— saro sa rinibong anghel nin Dios, na nagpapagiromdom sa tawo kan saindang katongdan.

²⁴Sa pagkaherak masabi an anghel, ‘Talingkasi siya! Dai siya dapat magduman sa kinaban kan mga gadan. Uya an pantubos tanganing makatalingkas siya.’

²⁵Magigin hoben asin makosog giraray an saiyang hawak;

²⁶kun siya mamibi, sisimbagon siya nin Dios; may kaogmahan na masamba siya sa Dios; tatanoson giraray nin Dios an gabos na bagay para saiya.

²⁷Masabi siya sa atubang nin mga tawo, ‘Nagkasala ako. Dai ako naggibo kan matanos alagad ilinigtas ako nin Dios.

²⁸Dai niya itinugot na magduman ako sa kinaban kan mga gadan, asin buhay ako sagkod ngunyan!’

²⁹“Gigibohon nin Dios an gabos na ini sa sarong tawo, makaduwa o makatolong beses;

³⁰iliniligtas niya an buhay nin sarong tawo asin tinatawan siya kan kaogmahan nin pagkabuhay.

³¹“Paghinanyog, Job, dangoga ako; pag-alo, asin mataram ako.

³²Simbaga ako, kun igwa ka nin itataram; pagtaram, huli ta boot kong tawan ka nin katanosan.

³³Alagad kun dai, pagdangog sako; pag-alo, asin tutukdoan taka kun paano magin madonong.”