Read Central Bicolano Job 34 Bible Online

Job 34 - Central Bicolano bible

Job 34

¹Dangan nagsabi si Elihu:

²“Mga madodonong na lalaki, dangoga nindo an sakong itataram, asin paghinanyog kamo sako, kamo na nakakaaram;

³huli ta binabalo kan talinga an mga tataramon siring na ninanamitan kan dila an kakanon.

⁴Pilion ta an matanos; kita an magsabi kun ano an marahay.

⁵Huli ta nagtaram si Job, ‘Mayo akong sala, asin hinale sako nin Dios an sakong katanosan;

⁶maski igwa ako nin deretso, ibinibilang akong putikon; an sakong lugad dai nabobolong, maski mayo akong kasalan.’

⁷“Anong klaseng tawo an siring ki Job? Dai nanggad siya minagalang sa Dios.

⁸Nakikiiba siya sa mga paragibo nin karatan asin minalakaw sa kaibahan kan mga makasalan.

⁹Nagsasabi siyang, mayo nanggad nin pakinabang an tawo kun siya magsunod sa kabotan nin Dios.

¹⁰“Kaya dangoga nindo ako, kamong mga lalaking may pakasabot! Magibo daw an Makakamhan na Dios nin karatan?

¹¹Binabalosan niya an tawo sosog sa saiyang gibo, asin tinatratar sinda sosog sa maninigo.

¹²Sa katotoohan, an Dios dai magibo nin karatan, an Makakamhan dai mabiko kan katanosan.

¹³Siisay an nagtao sa Dios nin kapangyarihan? Siisay an nagbugtak saiyang pamayo kan kinaban?

¹⁴Kun bawion nin Dios an hinangos nin buhay,

¹⁵magagadan an gabos na nabubuhay asin mabalik sa alpog na saiyang pinaghalean.

¹⁶“Kun igwa kamo nin pakasabot, dangoga ini; hinanyoga an sakong sasabihon.

¹⁷Maghahade daw an sarong naoongis sa hustisya? Kokondenaron daw nindo an mapangyari asin matanos,

¹⁸na minasabi sa sarong hade, ‘Mayo kang halaga,’ asin sa mga pamayo, ‘Maraot kang tawo’;

¹⁹na dai nagpapahiling nin pagpapalaen sa mga prinsipe, ni minapaorog sa mayaman ki sa dukha, huli ta gabos sinda gibo kan saiyang mga kamot?

²⁰Pwede sanang magadan nin hidali kun banggi an sarong tawo. Hahampakon nin Dios an mga tawo dangan nawawara sinda; mayo nin kapagalan na ginagadan niya an mga mapangyari.

²¹Huli ta nagmamasid siya sa mga gawe kan mga tawo, asin nahihiling niya an gabos nindang lakad.

²²Mayong limpoy o mahibog na kadikloman na pwedeng tagoan kan paragibo nin karatan.

²³Huli ta dai pa an Dios nagtalaan nin panahon para sa kiisay man tanganing mag-atubang sa saiyang paghukom.

²⁴Maski mayo nin pagsisiyasat, hinahale niya an mga tawong mapangyari, dangan isinasalihid niya an iba sa lugar ninda.

²⁵Kaya huli ta aram niya an saindang mga gibo dinadaog niya sinda asin rinoronot pagkabanggi.

²⁶Pinapadusahan niya an mga parakasala sa atubang nin kadaklan,

²⁷huli ta nag-ontok sinda sa pagsunod saiya, asin dai sinda nagkuyog kan gabos niyang pagboot.

²⁸Sinda an nagin dahelan kan pag-agrangay sa Dios kan mga dukha, asin nadangog niya an inagrangay kan mga nasasakitan.

²⁹“Kun siya magtoninong, siisay an makondenar? Kun tagoon niya an saiyang lalawogon, siisay an makakahiling saiya, nasyon man o tawo?

³⁰Mayo nin anoman na magigibo an mga nasyon tanganing maolang an mga bakong diosnon sa pagsakop sainda.

³¹“Huli ta may nakapagsabi na daw sa Dios, ‘Nagtios na ako kan padusa; dai na ako magibo nin karatan;

³²tukdoe ako kan dai ko nahihiling; kun nakagibo ako nin karatan, dai ko na iyan gigibohon giraray’?

³³Huli ta minasalungat ka sa ginigibo nin Dios, maglalaom ka daw na gigibohon niya an boot mo? An pagdesisyon nasa saimo, bakong sako; tarami kami ngunyan kun ano an iniisip mo.

³⁴“Masabi sako an mga lalaking may pakasabot, asin mataram an madonong na makakadangog sako:

³⁵‘Nagtataram si Job na mayo nin pakasabot, an saiyang mga tataramon mayo nin kahulogan.’

³⁶Isipa nindo an gabos na isinasabi ni Job; mahihiling nindo na nagtataram siya siring sa sarong maraot na tawo.

³⁷Huli ta an saiyang kasalan dinadagdagan niya nin pagtumang; pinag-olog-olog niya an Dios sa satong atubang.”