Read Central Bicolano Job 35 Bible Online

Job 35 - Central Bicolano bible

Job 35

¹Nagsabi si Elihu ki Job:

²“Bakong matanos na ika magsabi na mayo ka nin sala sa atubang nin Dios,

³o na maghapot sa Dios, ‘Ano an sakong papakinabangon? Paano ako magin mas marahay ki sa kun ako nagkasala?’

⁴Sisimbagon taka asin an saimong mga katood.

⁵“Hilinga an kalangitan! Masdan mo an mga panganoron, na mas halangkaw ki sa saimo.

⁶Kun nagkasala ka, naapektohan mo daw an Dios? Kun nagdakul an saimong kasalan, nadigtaan mo daw siya?

⁷Natatabangan mo daw an Dios kun ika matanos? Dai nangangaipo nin ano man an Dios hale saimo.

⁸An saimong karatan nakakaraot sa mga kapwa mo tawo, asin an saimong katanosan nakakatabang sa sainda.

⁹“Huli sa pang-aapi, nag-aagrangay an mga tawo; naghahagad sinda nin tabang tanganing ikaligtas sa mapang-api.

¹⁰Alagad mayo nin naghahapot, ‘Haen an Dios na sakong Kaglalang, na nagtatao sako nin paglaom sa panahon nin kasakitan,

¹¹na nagtutukdo sato nin orog ki sa mga hayop kan daga, na nagpapadonong sato ki sa mga gamgam sa kalangitan?’

¹²Minaagrangay sinda, alagad dai siya minasimbag, huli ta mapalangkaw sinda asin maraot na mga tawo.

¹³Totoong gayo na dai dinadangog an mayong halagang inagrangay; dai sinda hihilingon ni dadangogon kan Makakamhan na Dios.

¹⁴“Nagsabi ka, Job, na an Dios dai mo nahihiling; alagad maghalat ka sana huli ta aram niya an kamugtakan mo.

¹⁵Naghohona ka na dai nagpapadusa an Dios, na dai niya pinapahalagahan an kasalan.

¹⁶Mayong mangyayari sa saimong katataram; maliwanag na mayo kang naaaraman.”