Read Central Bicolano Job 36 Bible Online

Job 36 - Central Bicolano bible

Job 36

¹Nagsabi pa si Elihu:

²“Maghalat ka pa nin kadikit na panahon, asin ipapahiling ko saimo, huli ta manongod sa Dios an sakong sasabihon.

³Dakul an sakong naaaraman; gagamiton ko gabos iyan tanganing ipahiling ko na matanos an Dios, na sakong Kaglalang.

⁴Totoo an sakong mga tataramon, huli ta an nahihiling mo sa saimong atubang sarong tawong madonong.

⁵“Uya, an Dios mapangyari, asin dai nagbabasang-basang sa kiisay man; mayong anoman na dai niya nasasabotan.

⁶Dai niya tinutugotan na mabuhay an parakasala, alagad tinatawan niya kan saindang deretso an daing sukat.

⁷Dai niya hinahale an pag-ingat sa mga matanos, pinapatukaw niya sinda sa trono siring sa mga hade, asin tinatawan nin kaomawan sagkod pa man.

⁸Alagad kun sinda nakakadenahan asin nagagakodan nin mga pisi nin kasakitan,

⁹ipinapahayag niya sainda an saindang mga kasalan saka kapaabaw-abawan.

¹⁰Ginigibo niyang magdangog sinda sa saiyang mga patanid, na magbakle sa saindang kasalan.

¹¹Kun magkuyog sinda asin maglingkod saiya, sa kauswagan matatapos an saindang mga aldaw, asin an saindang mga taon sa karahayan.

¹²Alagad kun dai sinda maghinanyog, mapapara sinda huli sa dahas, asin magagadan na mayong pakaaram.

¹³“An mga bakong diosnon nagpapadagos sa pagigin anggot, asin dai minahagad nin tabang maski pinapadusahan.

¹⁴Nagagadan sinda na hoben pa, asin an saindang buhay natatapos sa kasosopgan.

¹⁵Alagad tinutukdoan nin Dios an tawo sa paagi nin pagtios, asin ginagamit an kawaraan nin paglaom sa pagpahiling sainda kan katotoohan.

¹⁶“Hinale ka nin Dios sa kasakitan, asin pinapagmate nin katiwasayan; asin saimong lamesa pinano nin pagkakan.

¹⁷Alagad ngunyan pinapadusahan ka sosog sa maninigo saimo.

¹⁸Mag-ingat ka na dai ka madaya kan mga suhol, ni malagalag kan kayamanan.

¹⁹An saimong paghagad nin tabang mayo nin itataong karahayan; an bilong mong kosog dai makakatabang sa saimo ngunyan.

²⁰Dai mo pagmawoton na an banggi dumatong, an panahon na mapapara an mga nasyon.

²¹Pag-ingat, dai ka magkiling sa karatan; itinao saimo an kasakitan tanganing ilikay ka sa kasalan.

²²“An Dios ilinangkaw sa saiyang kapangyarihan; siisay na paratukdo an makakaarog saiya?

²³Siisay an nagtalaga para sa saiya kan saiyang dalan, o siisay an makakasabi, ‘Guminibo ka nin karatan’?

²⁴Giromdomon mong ilangkaw an saiyang gibo, na inawit kan mga tawo.

²⁵Nahiling iyan kan gabos na tawo; pwede tang masdan iyan sa harayo.

²⁶Dai ta nanggad siya mamimidbidan, ni mabibilang an saiyang mga taon.

²⁷“Huli ta siya an minapaitaas kan mga tubig hale sa daga, asin ginigibo niya ining mga tagdo nin uran.

²⁸Pinapabulos niya an uran hale sa mga panganoron, asin pinapahugpa sa katawohan.

²⁹May makakasabot daw kan paglakop kan mga panganoron, kan pagdaguldol hale sa kalangitan na saiyang pinag-eerokan?

³⁰Winawarak niya an saiyang kikilat sa palibot niya, alagad danay na madiklom an kairaroman kan dagat.

³¹Huli sa mga paaging ini hinuhukoman niya an mga nasyon; minatao siya nin labi-labing pagkakan.

³²Pinupugol niya an kikilat, asin pinagbobotan kun arin an boot niyang patamaan.

³³An tanog kaiyan iyo an nagpapahayag dapit saiya, na anggot na nag-iimon laban sa karatan.