Read Central Bicolano Job 37 Bible Online

Job 37 - Central Bicolano bible

Job 37

¹“Pinapakutabkutab an puso ko kan bagyo.

²Paghinanyog kamo gabos sa tingog nin Dios, sa daguldol na naghahale sa saiyang ngoso.

³Isinusubol niya iyan sa ibaba kan bilog na kalangitan, asin an saiyang kikilat sa mga poro kan kinaban.

⁴Dangan nadadangog an ragubrob kan saiyang tingog, an magayon na tanog kan daguldol, mantang daing ontok an pagsilyab kan kikilat.

⁵Sa pagboot nin Dios, nangyayari an makangangalas na mga bagay, an mga darakulang bagay na dai nyato masasabotan.

⁶Huli ta sinasabihan niya an nyebe, ‘Maghugpa ka sa daga’; asin an tagiti saka an uran, ‘Magin makosog ka.’

⁷Pinapaontok niya sa pagtrabaho an gabos na tawo, tanganing mahiling ninda an gabos niyang gibo.

⁸Dangan minalaog sa saindang lungib an mga hayop asin duman sinda minaontok.

⁹Naghahale sa habagat an makokosog na doros, asin sa amihan an doros na sobra an lipot.

¹⁰An katubigan pinapatagas kan hinangos nin Dios, asin ginigibo niya ining matagas na yelo.

¹¹Minasilyab an kikilat hale sa mga panganoron,

¹²mantang naghihiro sinda sa pagboot nin Dios. Ginigibo ninda an gabos na pagboot nin Dios maski saen sa bilog na kinaban.

¹³An Dios minapadara nin uran tanganing baribihon an saiyang daga; pwede niyang ipadara iyan sa pagpadusa sa mga tawo o sa pagpahiling kan saiyang pagkamoot.

¹⁴“Hinanyoga ini, Job, pag-ontok asin horophoropa an makangangalas na mga gibo nin Dios.

¹⁵Aram mo daw kun paano itinatao nin Dios an pagboot asin minasilyab an kikilat sa mga panganoron?

¹⁶Aram mo kun paano naglalataw an mga panganoron sa kalangitan, an bunga kan makangangalas na kakayahan nin Dios?

¹⁷Dai mo naaaraman iyan! An aram mo sana iyo an pagtios kan init kun minahuyop sa daga an doros na gikan sa habagat.

¹⁸Matatabangan mo daw an Dios sa pagbiklad kan kalangitan asin sa pagpatagas kaiyan siring sa pinakintab na metal?

¹⁹Tukdoe kami kun ano an samong sasabihon sa Dios; mayo nin laog an samong isip; mayo kami nin masasabi.

²⁰Dai ko hahagadon na makipag-olay ako sa Dios; tadaw ta tatawan ko siya nin oportunidad na gadanon ako?

²¹“Ngunyan an liwanag sa kalangitan nakakasula, dai ta kayang hilingon; asin an langit nalinigan na kan doros.

²²Nahihiling sa amihan an bulawan na kinang, asin natatakot kita huli sa kamurawayan nin Dios.

²³Dakula nin marahay an kapangyarihan nin Dios, kaya dai kita nakakadolok saiya; matanos siya asin maimbod sa pagtratar kan katawohan.

²⁴Kaya natatakot saiya an mga tawo; dai niya pinapahalagahan an siisay man na nagsasagin-sagin na madonong.”